44-нҗи хекая

Рахав ичалылары гизлейәр

БУ АДАМЛАР ховп астында. Бу ерден тизрәк гитмеселер, олары өлдүрерлер. Олар Ысрайыл ичалылары, олара көмек эдйән аялың ады болса Рахав. Рахав Эриха шәхериниң галасында яшаяр. Гел, бу адамлара нәме үчин ховп абананыны билели.

Ысрайыллылар Иордан дерясындан гечип, Кенган юрдуна гирмәге тайярдылар. Йөне олар энтек юрда гирмәнкә, Ешув ики саны ичала: «Гидиңде, юрды ве Эриха шәхерини гөрүп гелиң» дийип табшыряр.

Ичалылар Эриха барып, Рахавың өйүне тарап уграярлар. Йөне кимдир бири: «Шу гүн агшам ики саны ысрайыллы бизиң юрдумызы гөрмек үчин шәхере гелди» дийип, Эриханың патышасына шугуллаяр. Муны билип, ол Рахавың өйүне адам иберйәр. Олар: «Өйүңе гелен адамлары дашарык чыкар!» дийип буюряр. Эмма Рахав ичалылары җайың үчегинде гизлейәр. Шонуң үчинем: «Бир нәтаныш адамлар-а гелди, йөне оларың ниредендигини билемок. Гараңкы дүшүп башланда дервезелер япылманка гитдилер. Эгер тизлешсеңиз, олары тутуп билерсиңиз!» дийди. Ол адамлар хем оларың ызындан гитдилер.

Олар гиденсоң, Рахав ховлукмачлык билен үчеге чыкып: «Бу юрды Ехованың сизе берҗекдигини билйәрин. Мүсүрден чыканыңызда онуң Гызыл деңзи гурадандыгыны ве сизиң ики патышаны, ягны Сихоны хем-де Огы өлдүрендигиңизи эшитдик. Мен сизе ягшылык этдим, хайыш эдйән, сиз-де маңа ягшылык эдиң. Мениң какамы, эҗеми хем-де доганларымы ве уяларымы дири галдырҗакдыгыңыза сөз бериң» дийип, ичалылардан хайыш эдйәр.

Ичалылар Рахавың хайышыны битирҗекдигини сөз берйәрлер, йөне шонда-да ол аялың кәбир этмели затлары барды. Ичалылар оңа: «Бу гызыл йүпи алып, әпишгәңе даң ве хемме гарындашларыңы өйүңе йыгна. Биз Эриханы басып алмага геленимизде, әпишгәңдәки йүпи гөрүп сениң өйүңден хич кими өлдүрмерис» дийдилер. Ичалылар Ешувың янына гайдып геленлеринде, болан бар зады гүррүң бердилер.

Ешув 2:1—24; Еврейлер 11:31.