37-нҗи хекая

Сежде этмек үчин чадыр

БУ ЯСАЛАН задың нәмедигини билйәңми? Ехова сежде этмек үчин йөрите ясалан чадыр. Халк оны Мүсүрден чыкып, бир йыл геченсоң ясады. Йөне кимиң гөркезмеси боюнча ясаландыгыны билйәңми?

Ол Ехованың гөркезмеси боюнча ясалды. Муса бу гөркезмәни Сина дагында Еховадан алыпды. Ехованың гөркезмеси боюнча чадыры сөкүп болярды. Башга ере гөчүленде болса, ене-де гурнап болярды. Шейлеликде, чөлде бир ерден башга ере гөченлеринде ысрайыллылар чадыры яны билен алып гидйәрдилер.

Эгер-де сен чадырың кичи отагына серетсең, ол ерде сандык гөрерсиң. Бу әхт сандыгы. Онуң үстүнде ики саны алтындан ясалан перишде, ягны керуби бар. Оларың херси бир тарапында ерлешйәр. Худай ики саны текиз дашың йүзүне он табшырыгы ене-де язды, себәби өңкүсини Муса дөвүпди. Олар әхт сандыгының ичинде сакланяр. Шейле-де онуң ичинде манналы гап бар. Маннаның нәмедиги ядыңдамы?

Ехова Мусаның доганы Харуны баш руханы эдип беллейәр. Ол Ехова сежде этмекде халка баштутанлык эдйәр. Онуң огуллары хем руханы.

Инди болса чадырың улы отагына серет. Ол кичи отагдан ики эссе улы. Ол ерде ичинден түссе чыкян сандыгы гөрйәңми? Бу гурбан эдилйән ер. Руханылар онуң үстүнде бухур дийип атландырылян якымлы ыслы өсүмлиги якярлар. Онсоңам бу ерде еди чыралы шемдан дур. Үчүнҗиси стол, онуң үстүнде он ики саны чөрек гойлупдыр.

Чадырың ховлусында сувлы улы леген бар. Бу сувлы легенден руханылар ювуняр. Шейле-де бу ерде гурбан эдилйән улы ер бар. Онда сойлан маллары якып, Ехова гурбан берйәрлер. Чадыр дүшелгәниң гөни ортасында ерлешйәр, ысрайыллылар болса онуң төверегиндәки чадырларда яшаярлар.

Чыкыш 25:8—40; 26:1—37; 27:1—8; 28:1; 30:1—10, 17—21; 34:1, 2; Еврейлер 9:1—5.