63-нҗи хекая

Акылдар патыша Сүлейман

СҮЛЕЙМАН патыша беллененде җуда яшды. Ол Ехованы сөййәрди. Какасы Давудың маслахатларына эерйәрди. Ехова Сүлейманы говы гөрйәрди. Шонуң үчин бир гиҗе онуң дүйшүнде: «Сениң нәме арзувың бар?» дийип сораяр.

Сүлейман Ехова: «Эй, Худайым Ехова, хөкүмдарлык эдерден мен гаты яш, халкыңа догры хөкүмдарлык этмәге маңа акылдарлык бер» диййәр.

Ехова Сүлейманың дилегине бегенип: «Сен өзүңе узак яш, байлык дилемән, эйсем акылдарлык диледиң. Мен саңа ер йүзүнде хич кимде болмадык акылдарлык берерин. Шейле хем мен саңа сениң сорамадык задыңы, байлык хем шөхрат берерин» диййәр.

Шондан соң Сүлейманың янына ики аял кын сораг билен гелйәр. Оларың бири: «Мен шу аял билен бир өйде яшаян. Мениң оглум болды, ики гүнден болса онуң оглы болды. Соңра бир гиҗе онуң оглы өлүпдир. Мен ятыркам ол өлен чагасыны мениң янымда гоюп, мениң чагамы болса алып гидипдир. Оянамда өли чаганың мениң чагам дәлдигини билдим» дийип гүррүң берйәр.

Бейлеки аял болса онуң сөзүни бөлүп: «Ёк! Дири чага мениңки, өли чага болса онуңкы!» диййәр. Биринҗи аял оңа: «Ёк! Өли чага сениңки, мениңки болса дири!» дийип нәразылык билдирйәр. Шейдип олар җедел эдйәрлер. Бу җедели Сүлейман нәдип чөзеркә?

Ол гылыч гетирмеги буйруп: «Дири чаганы икә бөлүң-де, бу аялларың хер бирине ярыны бериң» диййәр.

Чаганың хакыкы эҗеси: «Сакланың! Чаганы өлдүрмәң, оны ол аяла бериң!» дийип ялбаряр. Бейлеки аял болса: «Чаганы икә бөлүң, гой, ол хич биримизе-де болмасын» дийип, өз диенини этдирҗек боляр.

Шонда Сүлейман: «Чаганы өлдүрмәң! Чаганы биринҗи аяла бериң ол онуң хакыкы эҗеси» диййәр. Бу аял чагасыны сөййәнлиги үчин оны өлдүртмән бейлеки аяла бермәге разыды. Шонда Сүлейман бу аялың чаганың хакыкы эҗесидигини билйәр. Халк Сүлейманың җедели чөзүши барада эшидип, шейле акылдар патышасының бардыгына бегенйәр.

Сүлейманың хөкүмдарлыгында Худай халка бугдайың, арпаның, үзүмиң, инҗириң ве бейлеки мивелериң бол хасылыны берйәр. Халк говы гейнип, оңат җайларда болчулыкда яшаярды.

3 Патышалар 3:3—28; 4:29—34.