75-нҗи хекая

Бабылдакы дөрт яш йигит

НЕБУКАДНЕЗАР патыша ысрайыллыларың иң билимлисини Бабыла әкидйәр. Ол иң гөрмегей ве акыллы йигитлери сайлаяр. Шу суратда сен оларың дөрдүсини гөрйәң. Оларың бириниң ады Даниел, бейлеки үчүсине бабыллылар Шадрак, Мешак ве Абеднего дийип ат дакдылар.

Небукаднезар бу яш йигитлере көшкде хызмат эдилишини өвретҗек боляр. Олара үч йыллап окув гечйәрлер. Соңра кынчылыклары чөзмәге көмек эдер ялы, оларың иң акыллыларыны сайлаҗакды. Окув дөврүнде патыша яш йигитлериң берк ве сагдын болмагыны ислейәр. Шонуң үчин өз иймитлениши ялы, олары говы ийдирип-ичирмеги буюряр.

Бу яш Даниеле серет. Небукаднезарың баш хызматкәри Ашпеназа Даниелиң нәме диййәнини билйәңми? Ол оңа патышаның сачагындан иймек ислемейәндигини айдяр. Ашпеназ биынҗалык болуп: «Сизиң нәме ийип-ичмелидигиңизи патыша эййәм чөзди. Сиз бейлеки яш йигитлер ялы сагдын болмасаңыз, ол мени өлдүрер» диййәр.

Шонда Даниел өзүне ве үч достуна Ашпеназың гөзегчи беллән гаравулының янына гидйәр. Ол гаравула: «Бизе диңе гөк өнүм ве сув берип он гүн сынла. Соңра бизи патышаның сачагындан иййән яш йигитлер билен деңешдирип гөр, шонда кимиң сагдындыгыны гөрерсиң» диййәр.

Гаравул онуң билен ылалашяр. Он гүн геченде Даниел ве онуң үч досты бейлеки яш йигитлерден сагдын гөрүнйәр. Шонуң үчин гаравул олара патышаның сачагындан иймән, мундан бейләк хем гөк өнүм иймәге ругсат берйәр.

Үч йыл геченден соң, әхли яш йигитлери Небукаднезарың янына гетирйәрлер. Небукаднезар оларың хер бири билен гүррүң гечиренде, яшларың ичинде Даниелиң ве онуң үч достуның иң акыллысыдыгына гөз етирйәр. Шол себәпли олары көшкде көмекчи эдип галдыряр. Патыша Даниеле, Шадрага, Мешага ве Абеднега нәхили меселе я-да кынчылык билен йүзленсе-де, оларың җогабы патышаның руханыдыр акылдарларының җогабындан он эссе говуды.

Даниел 1:1—21.