69-нҗы хекая

Бир гызҗагаз абрайлы адама лөмек эдйәр

БУ ГЫЗҖАГАЗЫҢ нәме барада гүррүң берйәнини билйәңми? Ол Ехованың Элиша пыгамбери хакда ве онуң Худайың көмеги билен эден тәсин ишлери барада гүррүң берйәр. Бу аял ысрайыллы дәл, шонуң үчинем ол Ехова барада хич зат биленок. Гел, бу аялың өйүне гызҗагазың нәдип дүшенини билели.

Бу аял сириялы, онуң адамсы Нааман болса, Сирия гошунының баштутаны. Сириялылар гызҗагазы есирлиге алып, Нааманың аялының хызматкәри этдилер.

Нааманың ягдайы агырды, ол хейвере кесели билен кеселледи. Бу кесел билен кеселлән адамың эти бөлек-бөлек болуп гопяр. Шонуң үчин гызҗагаз Нааманың аялына: «Эгер-де хоҗайыным, Ехованың Ысрайылдакы пыгамбериниң янына барса, онда пыгамбер оны хейвере кеселинден беҗерерди» диййәр. Тизден буларың гүррүңи барада онуң адамсы хем эшидйәр.

Нааманың сагаласы гелйәр, шонуң үчинем ол Ысрайыла гидйәр. Ысрайыла барып, ол Элишаның өйүне тарап уграяр. Элиша болса, хызматкәрини иберип, Наамана Иордан дерясында еди гезек чүмүп чыкмагы буюряр. Нааман гаты гахарланып: «Мениң юрдумдакы дерялар Ысрайылың хемме деряларынданам говудыр» дийип гидйәр.

Эмма онуң хызматкәрлериниң бири: «Хоҗайын, эгер-де саңа Элиша кын зады буйран болса, сен эдердиң. Онда оңа гулак асып, деря чүмүп чыкмак аңсат дәлми нәме?» дийди. Нааман хызматкәриниң айданыны эдип, Иорданда еди гезек чүмүп чыкяр. Шондан соң, онуң эндамы беркәп сагаляр.

Нааман бегенҗинден яңа, Элишаның янына барып: «Инди мен догруданам Ысрайылың Худайының ер йүзүнде еке-тәк хак Худайдыгыны билдим! Хайыш эдйәрин, менден бу совгады кабул эт» диййәр. Элиша оңа: «Ёк, алҗак дәл» диййәр. Ол совгат алмагың нәдогрудыгыны билйәрди, чүнки оны Ехова сагалтды. Йөне совгады Элишаның хызматкәри Гехазың аласы гелйәр.

Шонуң үчин Гехаз Нааманың ызындан етип: «Элиша яңы гелен достлары үчин совгатларыңдан кәбир зады алҗак диййәр» дийди. Элбетде, ол ялан сөзлейәрди. Эмма Нааман онуң ялан сөзлейәндигини билмейәр. Шонуң үчин кәбир совгатлары берйәр.

Гехаз өйүне долананда, Элиша эййәм хемме зады билйәрди. Муны оңа Ехова айтды. Ол: «Сениң бу эден эрбетлигиң үчин Нааманың хейвере кесели саңа гечер» дийди. Эдил шобада онуң айдышы ялы хем болды!

Мундан биз нәме өвренип билерис? Биринҗиден, бу гызҗагаз ялы Ехова барада гүррүң бермели. Мунуң пейдасы көп. Икинҗиден, Нааманың башда улумсы болшы ялы, улумсы болмалы дәл, биз Худайың гуллукчыларына гулак асмалы. Үчүнҗиден болса, биз Гехаз ялы ялан сөзлемели дәл. Биз Мукаддес Язгылардан көп пейдалы затлары өвренйәрис герек?

4 Патышалар 5:1—27.