74-нҗи хекая

Горкмаян адам

ХАЛКЫҢ яш йигидиң үстүнден гүлшүне серет. Онуң кимдигини билйәңми? Ол Худайың белли пыгамбери Еремия.

Ёшия патыша юртдакы бутлары ёк эдип башланда, Ехова Еремияны пыгамбер беллейәр. Еремия болса өзүни гаты яш сайяр. Йөне Ехова оны голдаҗакдыгыны вада берйәр.

Еремия ысрайыллылара эрбетлигиңизи гоюң диййәр. Ол «миллетлериң сежде эдйән таңрылары ялан» диййәр. Эмма ысрайыллыларың көпүси хак Худай Ехова сежде эденден, бутлара сежде эденини говы гөрйәрди. Еремия адамлара Худайың берҗек җезасы барада айданда, онуң үстүнден гүлйәрлер.

Бирнәче йылдан Ёшия арадан чыкяр, үч айдан онуң оглы Ехояким патыша боляр. Еремия ене-де халка: «Сиз дүзелмесеңиз, Иерусалим харабачылыга өврүлер» диййәр. Руханылар оны тутуп: «Бу сөзлериң үчин сени өлдүрмели» дийип гыгырышярлар. Соңра олар Ысрайылың шазадаларына: «Еремия шәхеримизе дил етирйәр, оны өлдүрмели» диййәрлер.

Еремия инди нәме эдеркә? Ол горкмады! Гайтам, олара: «Мен сизе Ехованың сөзлерини айдярын. Эгер-де сиз дүзелмесеңиз, Ехова Иерусалими харабачылыга өврер. Йөне сиз бир зады билиң, сиз мени өлдүрсеңиз, догры адамы өлдүрдигиңиз болар» диййәр.

Шазадалар Еремияны өлдүрмейәр, йөне ысрайыллылар эрбетлигине галяр. Соңра Бабылың патышасы Небукаднезар Иерусалиме гаршы сөвешйәр. Ахырсоңы Небукаднезар ысрайыллылары гул эдйәр. Мүңлерче адамы болса Бабыла алып гидйәр. Кесеки адамлар сени өйүңден нәтаныш юрда алып гитселер, нәхили боларды?

Еремия 1:1—8; 10:1—5; 26:1—16; 4 Патышалар 24:1—17.