58-нҗи хекая

Давут ве Голят

ФИЛИСТИЛИЛЕР ене-де ысрайыллылара гаршы сөвешмәге гелдилер. Давудың үч агасы инди Саулың гошунында гуллук эдйәрди. Шонуң үчин бир гезек Ессе Давуда: «Агаларыңа бугдай ве бирнәче чөрек әкит. Оларың хал-ягдайыны билип гайт» диййәр.

Давут харбы дүшелгә гелип, доганларыны тапмак үчин гөни сөвеш мейданына ылгап баряр. Шол вагт филистили Голят атлы әпет адам сөвешмек үчин өңе чыкяр. Ол 40 гүнден бәри эртир ирден ве агшамара ысрайыллыларың үстүнден гүлйәрди. Ол: «Бир адамы сайлаң, гой, ол мениң билен сөвешсин. Эгер ол мени еңип өлдүрсе, онда сизиң гулуңыз боларыс. Йөне оны мен еңип өлдүрсем, онда сиз бизиң гулумыз боларсыңыз. Эгер-де сизиң гайратыңыз етйән болса, мениң билен сөвешмек үчин бирини сайлаң» дийип гыгыряр.

Давут эсгерлерден: «Бу филистилини өлдүрип, Ысрайылдан масгарачылыгы айран адама нәме берерлер?» дийип сорады.

Эсгерлер: «Ол адама Саул көп байлык билен гызыны берер» дийип җогап бердилер.

Эмма хемме ысрайыллылар Голятдан горкяр, себәби ол җуда даявды. Онуң бойы 3 метре голай, шейле-де онуң янында галканыны гөтерйән бир эсгер бар.

Кәбир эсгерлер Саул патышаның янына барып: «Голят билен сөвешмәге Давут чыкмакчы» диййәр. Эмма Саул Давуда: «Сен бу филистили билен сөвешип билмерсиң. Чүнки сен өрән яш, ол болса бүтин өмрүни эсгерликде гечирди» диййәр. Давут болса оңа: «Какамың гоюнларыны айы я ёлбарс аланда, мен олары өлдүрипдим. Бу филистили билен хем шейле болар. Ехова маңа көмек эдер» дийип, җогап берйәр. Шонда Саул: «Бар, Ехова сениң билен болсун» диййәр.

Давут деряның бойы билен ашак дүшйәр, бәш саны йылманак дашы сайлап торбасына саляр. Соңра сапаныны алып, әпет адамың өңүне чыкяр. Голят оны гөренде, өз гөзүне ынанмаяр. Оңа Давуды өлдүрмек аңсат ялы гөрүнйәр.

Голят: «Мениң яныма бир якынлаш, мен сени ит-гуша иймит эдейин» дийип, оңа хайбат атяр. Эмма Давут: «Сен маңа гаршы гылыч, галкан хем найза билен гелйәң, мен болса Ехованың ады билен барян. Шу гүн Ехова сени мениң элим билен өлдүрер» диййәр.

Давут хем Голята тарап ылгаяр. Торбасындан дашы чыкаряр, сапанына салып, бар гүйҗи билен зыңяр. Даш Голятың гөни келлесине дегйәр ве ол шол бада өлйәр! Филистилилер иң гүйчли эсгериниң йыкыланыны гөрүп гачярлар. Ысрайыллылар оларың ызындан етип, сөвешде еңиш газанярлар.

1 Патышалар 17:1—54.