61-нҗи хекая

Давут патыша боляр

САУЛ Давуды тутмак үчин ене бир гезек сынанышяр. Ол өзүне эсгерлериң говусындан 3 000 санысыны сайлап, Давудың гөзлегине чыкяр. Давут муны эшидип, Саулың гошуны билен ниреде дүшләнини билмек үчин ичалы иберйәр. Соңра Давут эсгерлерден: «Саулың дүшелгесине мениң билен хайсыңыз гитҗек?» дийип сораяр.

Давудың аял доганы Зеруяның оглы Абишай: «Мен гидерин» диййәр. Саул ве эсгерлери уклап ятырка, Давут ве Абишай ювашлык билен гизлинликде оларың болян ерине баряр. Олар Саулың башуҗундакы найзасыны ве күйзесини алярлар. Олары хич ким гөрмейәрем, эшитмейәрем, себәби хеммелер ятырды.

Давут билен Абишайың ниредедигине серетсене! Олар гачып, ховпсуз ерде дагың үстүнде дур. Давут Ысрайыл гошунының ёлбашчысы Абнере: «Сен нәме үчин патышаңы гораңок? Ханы серет! Онуң найзасы билен сув ичйән күйзеси ниреде?»

Шол вагт Саул ояняр. Ол Давуды сесинден танап: «Давут, бу сенми?» дийип сораяр. Ашакда дуран Саул билен Абнери гөрйәңми?

Давут:

— Хава, мен патышахым. Сен нәме үчин мени ызарлаяң? Мен саңа нәме яманлык этдим? Ине, сениң найзаң. Сизиңкилерден бири гелип оны әкитсин — дийди.

Саул:

— Мен ялңышыпдырын — дийип боюн аляр. Соңра Давут өз ёлы билен гидйәр, Саул болса өйүне гайдяр. Давут ичини гепледип: «Хачанам болса Саул мени өлдүрер, филистилилериң юрдуна гачмалы» диййәр. Оңа филистилилери алдап, оларың тарапдары болан болмак башардяр. Шейдип Давут оларың юрдуна гачяр.

Арадан бираз вагт геченсоң, филистилилер Ысрайылың үстүне чозярлар. Бу сөвешде Саул ве Ёнатан арадан чыкяр. Давут муңа гаты гынанып: «Доганым Ёнатан, сениң өлениңе гынанян. Мен сени шейле сөййәрдим!» диен овадан айдым дүзйәр.

Шондан соң, Давут Ысрайылың Хеброн шәхерине доланяр. Бу ерде Саулың оглы Ишбошети патыша сайлан адамлар билен, Давуды патыша сайлаҗак адамлар сөвешйәр. Ахыры Давудың тарапындакы адамлар еңйәрлер. Шейдип Давут 30 яшында патыша боляр. Ол Хебронда еди ярым йыл патышалык эдйәр. Бу ерде онуң Амнон, Абшалом ве Адония атлы огуллары догуляр.

Арадан вагт геченсоң, Давут эсгерлери билен Иерусалим диен овадан шәхери басып алмага гидйәр. Бу сөвеше Давудың аял доганы Зеруяның оглы Ёаб баштутанлык эдйәр. Шонуң үчин Давут Ёабы гошунбашы эдип беллейәр. Шол вагтдан башлап Давут Иерусалимде патышалык эдйәр.

1 Патышалар 26:1—25; 27:1—7; 31:1—6; 2 Патышалар 1:26; 3:1—21; 5:1—10; 1 Тарыхлар 11:1—9.