67-нҗи хекая

Ехошафат Ехова бил баглаяр

БУ АДАМЛАРЫҢ кимдигини ве оларың хәзир нәме эдйәнини билйәңми? Олар сөвеше баряр. Өңде барян адамлар болса айдым айдяр. «Онда нәме үчин оларың не гылыҗы, не-де найзасы бар?» дийип, сорамагың мүмкин. Гел, мунуң себәбини билели.

Ехошафат ики тайпалы Ысрайыл патышалыгында хөкүм сүрйәр. Ол он тайпалы демиргазык патышалыгың патышасы Ахабың ве онуң аялы Изебелиң дөврүнде яшаяр. Эмма Ехошафат какасы Аса ялы говы патыша. Шонуң үчин ики тайпалы гүнорта патышалыгың халкы көп йыллап багтлы яшаяр.

Йөне халкы ховсала дүшүрен бир вака боляр. Ехошафата: «Саңа гаршы Моаб, Аммон юрдундан ве Сеир дагындан улы гошун сөвеше гелйәр» дийип хабар берйәрлер. Ысрайыллыларың көпүси Еховадан көмек дилемәге Иерусалиме гелйәр. Оларың хеммеси ыбадатхана тарап уграяр. Ол ерде Ехошафат: «Худайымыз Ехова, биз нәме этмелидигини билемизок. Бу улы гошуның өңүнде биз эҗиз. Биз сенден көмеге гарашярыс» дийип дога эдйәр.

Ехова оларың догасыны эшидип, бир гуллукчысы аркалы: «Бу сизиң сөвешиңиз дәл-де, Худайың сөвеши. Сиз сөвешмерсиңиз. Сиз диңе Ехованың халас эдишине середип дурарсыңыз» диййәр.

Эртеси гүн Ехошафат халка йүзленип: «Ехова бил баглаң!» диййәр. Соңра ол гошуның өңүнден айдымчылары йөредйәр. Олар хем Ехова өвгүли айдымлар айдярлар. Сөвеш мейданына якынлашанда, нәме боланыны билйәңми? Ехова душманлары бири-бирине гаршы урушдыряр. Ысрайыллылар сөвеш мейданына геленде, душманларының барысы өлүп ятыр!

Ехова бил баглап, Ехошафат пайхаслы херекет этди герек? Бизем Худая бил багласак, пайхаслы боларыс.

3 Патышалар 22:41—53; 2 Тарыхлар 20:1—30.