66-нҗы хекая

Изебел — залым аял патыша

ЕРОБОАМ патыша өленден соң, он тайпалы Ысрайыл патышалыгыны диңе залым патышалар доландыряр. Оларың иң залымы Ахап патышады. Себәбини билйәңми? Биринҗиден, ол Изебел диен залым аяла өйленипди.

Изебел Ысрайыл халкындан дәлди. Онуң какасы Сайданың патышасыды. Изебел Баал атлы ялан таңра сежде эдйәрди. Йөне ол Ахабы ве ысрайыллылары-да Баала сежде этдирйәрди. Изебел Ехованы йигренйәрди, шонуң үчинем онуң көп пыгамберлерини өлдүрди. Галан пыгамберлер болса, говакларда гизленмели болды. Изебел максадына етмек үчин, адам өлдүрмекден хем гайтмаярды.

Бир гезек Ахабың кейпи ёкды. Изебел ондан: «Сен нәме үчин бу гүн гамгын гөрүнйәң?» дийип сорады.

Ахап:

— Наботың айдан сөзи үчин, мен онуң үзүмлигини сатын алҗакдым. Эмма ол этмеди — дийип нәгилелик билдирди.

Изебел:

— Гайгы этме. Сен оны аларсың — дийип көшешдирйәр.

Изебел Наботың яшаян шәхериниң кәбир яшулуларына хат иберйәр. Ол: «Гой, бирнәче ярамаз адам: «Набот Худая гаргады» дийип, төхмет атсын. Соңра оны шәхерден чыкарып, дашлап өлдүриң» дийип буюряр.

Изебел Наботың өленини эшиден бадына, Ахаба: «Тизрәк гит-де, үзүмлиги ал» дийип, хабар берйәр. Изебел эден җенаяты үчин җезаландырылмалы дәлми нәме?

Ынха, бирнәче вагт геченсоң, Ехова Ехув атлы адамы иберйәр. Ехувың гелйәнини эшидип, Изебел гөзүне сүрме чалып безенйәр. Йөне Ехув оны әпишгеде гөренде: «Оны ашак зыңың!» дийип, көшкдәки адамлара гыгыряр. Суратда гөршүң ялы, олар буйругы ерине етирйәрлер. Олар Изебели ашак зыңяр. Ол өлйәр. Ине, залым аял патыша Изебелиң өлүми шейле болды.

3 Патышалар 16:29—33; 18:1—4; 21:1—16; 4 Патышалар 9:30—37.