65-нҗи хекая

Патышалык икә бөлүнйәр

БУ АДАМ донуны нәме үчин бөлек-бөлек эдйәнини билйәңми? Муны оңа Ехова буюрды. Ол Худайың пыгамбери Ахия. Киме пыгамбер дийилйәнини билйәңми? Болҗак затлары өңүнден Худай тарапын айдян адама пыгамбер дийилйәр.

Ахия билен гүрлешйән адамың ады Еробоам. Сүлейман оны кәбир гурлушык ишлеринде гөзегчи белләпди. Ахия ёлда Еробоама душуп, дүшнүксиз херекет эдйәр. Эгнинден тәзе доны чыкарып, оны он ики бөлеге бөлйәр. Соңра ол Еробоама: «Өзүңе он бөлеги ал» диййәр. Ахияның Еробоама он бөлеги нәме үчин беренини билйәңми?

Ахия Еробоама Ехованың Сүлейманың элинден патышалыгы алҗакдыгыны дүшүндирйәр. Ехова он тайпаны Еробоама бермекчиди. Диймек, Сүлейманың оглы Рехобоам диңе ики тайпа хөкүмдарлык эдер.

Сүлейман муны эшиденде гаты гахарланып, Еробоамы өлдүрҗек боляр. Йөне Еробоам Мүсүре гачяр. Бирнәче вагтдан Сүлейман арадан чыкяр. Ол кырк йыл патышалык эдипди. Онуң ерине оглы Рехобоам патыша боляр. Сүлейманың өленини эшидип, Еробоам Ысрайыла гайдып гелйәр.

Рехобоам эрбет патышады. Рехобоам халкы, атасы Сүлеймандан-да бетер хорлаярды. Еробоам халкың яшулулары билен Рехобоам патышаның янына гелип, халкың аладасыны этмеги хайыш эдйәр. Йөне Рехобоам олары диңлемейәр. Ол халкы өңкүден-де бетер эзйәр. Шонуң үчин халк Еробоамы он тайпа патыша сайлаяр. Галан Бенямин ве Яхуда тайпасы болса Рехобоам патышаның элинде галяр.

Еробоам халкың Иерусалиме гидип, сежде этмегини ислемейәр. Шонуң үчин ол ики саны алтын гөле ясап, халка шоңа сежде этмеги буюряр. Шейдип юрт залымлыкдан ве зорлукдан доляр.

Ики тайпалы патышалыкда хем бетбагтлык кән боляр. Рехобоам патыша болуп, такмынан бәш йыл геченде, Мүсүриң патышасы Иерусалиме чозяр. Ол Ехованың ыбадатханасындан энчеме гымматбаха затлары әкидйәр. Шонуң үчин ыбадатхана гурлан вагтындакысы ялы бошап галяр.

3 Патышалар 11:26—43; 12:1—33; 14:21—31.