72-нҗи хекая

Худай Хизкия патыша көмек эдйәр

БУ АДАМЫҢ Ехова нәме үчин дога эдйәнини билйәңми? Ол Ехова гурбан эдилйән ерде хатлары нәме үчин гойдука? Ол ики тайпалы гүнорта Ысрайыл патышалыгының патышасы Хизкия. Хизкия кын ягдайда. Нәме үчин?

Себәби Ашур гошуны он тайпалы демиргазык патышалыгы басып алды. Ехова муңа ёл берди, себәби юрдуң адамлары җуда эрбетди. Инди болса Ашур гошуны ики тайпалы патышалыга гаршы сөвеше чыкяр.

Эдил шол вагт Ашурың патышасындан Хизкия патыша хат аляр. Бу хатлары Хизкия Худайың өңүнде гойяр. Хатларда Ехованың үстүнден гүлнүп, Хизкияның болса боюн болмагы барада язылгыды. Хизкия шонуң үчин: «Эй Ехова, бизи Ашур патышасындан халас эт. Шонда әхли халк сениң еке-тәк Худайдыгыңы билер» дийип дога эдйәр. Ехова Хизкияның догасыны эшидермикә?

Хизкия говы патышады. Ол атасы Ахаза хем-де он тайпалы патышалыгың эрбет патышаларына меңзәнокды. Хизкия Ехованың канунларының хеммесини ерине етирмәге чалышярды. Ол дога эдип гутаран бадына, Ишая пыгамбер Ехованың сөзлерини айдяр: «Ашурың патышасы Иерусалиме гирмез. Онуң эсгерлериниң бириси хем шәхере голайлашмаз. Иерусалиме гаршы еке ок хем атылмаз».

Ашакдакы сурата серет. Өлүп ятан эсгерлериң кимдигини билйәңми? Олар ашурлы эсгерлер. Ехова перишдесини иберйәр. Ол бир гиҗеде 185 мүң ашурлы эсгери өлдүрйәр. Шонда Ашур патышасы еңлип, ызына гайдяр.

Ики тайпалы патышалык халас болуп, халк бирнәче вагтлап асуда яшаяр. Хизкия патыша арадан чыканда, ерине оглы Манассе гечйәр. Манассе ве ондан соң патышалык эден оглы Амон эрбет патышадылар. Шонуң үчин юрт ене-де зорлукдан ве залымлыкдан доляр. Амон патышаны өз хызматкәрлери өлдүрйәр, ики тайпалы патышалыга болса онуң оглы Ёшия патыша боляр.

4 Патышалар 18:1—36; 19:1—37; 21:1—25.