70-нҗи хекая

Юнус хем-де улы балык

СУВУҢ ичиндәки адама серет. Оңа нәхили ховп абаняныны гөрйәңми? Оны балык ювутҗак боляр! Ол адамың кимдигини билйәңми? Ол Юнус. Ол нәдип бейле ягдая дүшдүкә? Гел, билели.

Юнус Ехованың пыгамбери. Элиша пыгамбер өленден бәри, кән вагт гечмәнди. Ехова Юнуса: «Бейик Ниневе шәхерине бар. Шәхериң яшайҗыларының эдйән иши гаты эрбет ве сениң бу барада олара айтмагыңы ислейәрин» диййәр.

Эмма Юнусың гидеси гелмейәр. Ол Ниневеден башга тарапа гидйән гәмә мүнйәр. Ехова ондан нәразы. Шонуң үчин Ехова гүйчли шемал турузяр. Шемал шейле бир гүйчли велин, гәми сува чүмүп башлаяр. Деңизчилер горкудан яңа, таңрыларындан көмек дилейәр.

Шонда Юнус олара: «Мен гөги ве ери ярадан Ехова Худая сежде эдйәрин. Хәзир болса, Ехованың айданыны этмеҗек болуп, гачып барярын» дийди. Деңизчилер хайран галып: «Шемал ятар ялы, биз нәме этмели?» диййәрлер.

Юнус: «Мени деңзе ташлаң, шонда деңиз ювашар» диййәр. Деңизчилер оны ташласлары гелмеди. Эмма шемал барха гүйчленйәр. Олар ахыры Юнусы деңзе ташлаярлар. Шобада шемал ятып, деңиз ене-де ювашаяр.

Сувуң ичинде Юнусы улы балык ювудяр. Эмма Юнус өлмейәр. Үч гиҗе-гүндиз ол балыгың гарнында боляр. Ол Ехова гулак асманына ве Ниневе шәхерине гитмәнине гынаняр. Ол нәме эдеркә?

Юнус Еховадан көмек сорап дога эдйәр. Шонда Ехова балыга Юнусы кенара чыкардяр. Шондан соң, Юнус Ниневе шәхерине гидйәр. Бу вака Ехованың айданыны этмегиң ваҗыпдыгыны өвредйәр герек?

Мукаддес Язгыларың Юнус китабы.