7-нҗи хекая

Батыр адам

ЕР ЙҮЗҮНДЕ адамлар көпелип, оларың көпүси Кабыл ялы эрбет иш эдйәрдилер. Эмма бир адам олардан тапавутланярды. Онуң ады Ханох. Ханох өрән батыр адамды. Төверекдәки адамлар гаты эрбет иш этселерем, Ханох Худая гуллук эдйәрди.

Оларың нәме үчин эрбет иш эдйәндиклерини билйәңми? Ядыңда болса, Адам ата билен Хов энә Худайың иймели дәл диен мивесинден иймеги ким маслахат берипди? Догры, эрбет перишде. Мукаддес Язгыларда оңа Шейтан дийилйәр. Шейтан хемме адамларың эрбет болмагыны ислейәр.

Бир гезек Ехова Худай адамлара хабар айтмага Ханохы ёллаяр. Адамларың болса, диңләслери гелмеди. Ол хабар шундан ыбаратды: «Худай әхли эрбет адамлары ёк этмек үчин бир гүн белледи». Адамлар бу хабары эшидип, гаты гахарланан болсалар герек. Белки-де, олар Ханохы өлдүрҗегем боландыр. Шонуң үчин Худайың ниети барада адамлара айдар ялы, Ханоха батырлык герекди.

Худай шол эрбет адамларың арасында Ханохың узак яшамагына ёл бермеди. Ол бары-ёгы 365 йыл яшады. Биз нәме үчин «бары-ёгы 365 йыл» диййәрис? Себәби шол дөвүрде адамлар хас сагдындылар. Хәзиркиден узак яшаярдылар. Гөз өңүне гетир, Ханохың оглы Метушелах 969 йыл яшады!

Ханох өленден соң, адамлар хас-да эрбетлешдилер. Төврат: «Оларың хемише эрбет затлар хакда пикир эдендигини» ве «ер йүзүнде эрбетлигиң көпдүгини» айдяр.

Шол дөвүрде ер йүзүнде эрбетлик көп болярды. Себәбини билйәңми? Шейтан адамлара эрбетлиги этдирмегиң тәзе усулыны тапды. Бу барада индики бапдан билерис.

Барлык 5:21—24, 27; 6:5; Еврейлер 11:5; Яхуда 14, 15.