6-нҗы хекая

Говы огул ве эрбет огул

ИНДИ Кабыл билен Хабыла серет. Оларың икисем улы адам болуп етишдилер. Кабыл экеранчылык билен мешгулланяр. Ол дәне, ир-иймиш хем-де гөк-өнүмлери етишдирйәр.

Хабыл болса, гоюнлара середйәрди. Ол гузулары бакмагы халаярды. Гузулар гоюн болуп етишйәрди. Шейдип, ол басым биргиден сүрә гөзегчилик эдйәр.

Бир гезек Кабыл билен Хабыл Худая совгат гетирди. Кабыл өз етишдирен хасылының мивесини гетирди. Хабыл болса, гоюнларындан иң говусыны гетирди. Хабыл ве онуң гетирен совгады Ехованың гөвнүнден турды. Йөне Худай Кабылы ве онуң совгадыны халамады. Себәбини билйәңми?

Себәби Хабылың совгадының Кабылыңкыдан говы боланы үчин дәл-де, Хабылың акйүрекли адам боланы үчинди. Ол Ехованы ве доганыны сөййәр. Кабыл болса залым адамды, ол инисини говы гөрмейәрди.

Шонуң үчин Худай Кабыла дүзел дийди. Йөне ол гулак асмады. Худайың Хабылы көп сөййәнини гөрүп, Кабылың гахары гелди. Бир гезек Кабыл Хабыла: «Йөр мейдана гидели» дийди. Олар мейданда икичәк галанда, Кабыл Хабылы уруп өлдүрди. Эйсем, Кабылың эден этмиши эрбет дәлми нәме?

Хабыл өлен хем болса, Худайың ядында. Хабыл акгөвүнлиди, Ехова болса шейле адамлары хич хачан унутмаяр. Шонуң үчин аҗайып гүнлериң биринде Ехова Хабылы дирелдер. Онсоң, Хабыл гайдып өлмез. Ол ер йүзүнде эбеди яшап билер. Эйсем, Хабыл ялы адамлар билен таншасың гелмезми?

Йөне Кабыл ялы адамлары Худай халамаяр. Шонуң үчин Худай Кабылы машгаласындан даш дүшүрип, оңа җеза берди. Себәби ол инисини өлдүрди. Кабыл башга ере гөченде, яны билен уяларындан бирини алып гитди. Ол хем онуң аялы болды.

Бирнәче вагтдан оларың чагалары болды. Адам ата билен Хов энәниң бейлеки огуллары-да өйленди, гызлары дурмуша чыкды, оларың хем чагалары болды. Басым ер йүзи адамдан долды. Гел, оларың кәбири билен таншалы.

Барлык 4:2—26; 1 Яхя 3:11, 12; Яхя 11:25.