8-нҗи хекая

Ер йүзүндәки пилмахмытлар

ЭГЕР бойы потолога етип дуран адам сениң яныңа гелсе, нәме пикир эдердиң? Ол хакыкы пилмахмыт! Бир вагтлар ер йүзүнде әпет адамлар догрудан хем яшапдыр. Мукаддес Язгыларың гөркезиши ялы, оларың аталары гөкдәки перишделерди. Йөне бу нәхили бейле болуп билйәр?

Ядыңда болса, Шейтан атлы эрбет перишде элмыдама эрбетлик эдйәрди. Ол бейлеки перишделере-де эрбетлик этдирҗек болярды. Вагтың гечмеги билен, кәбир перишделер Шейтаның диенини эдип башладылар. Олар Худайың гөкдәки табшыран ишини ташладылар. Олар ынсан беденине гирип, ере дүшдүлер. Нәме үчин ере дүшенлерини билйәрмиң?

Мукаддес Язгылар оларың ерде овадан гызлары гөрүп, олар билен яшамак исләндиклерини айдяр. Шонда олар ере дүшүп, шол гызлара өйлендилер. Мукаддес Язгылар мунуң эрбетдигини айдяр, себәби Худай перишделери гөкде яшамак үчин яратды.

Олардан доглан чагалар бейлеки чагалардан тапавутланярды. Белки, бу башда билинен хем дәлдир. Йөне олар барха бой алып, барха гүйчленип, ахыры әпет адам болуп етишдилер.

Пилмахмытлар җуда залымды. Олар шейле узын ве гүйчлүди велин, адамлара хемише зыян етирйәрдилер. Олар хер бир адамы өзлери ялы эрбет этмәге чалышярдылар.

Оларың гүнлерине ченли Ханох эййәм өлүпди, йөне ер йүзүнде бир говы адам яшаярды. Оңа Нух диййәрдилер. Ол хемише Худайың табшырыкларыны берҗай эдйәрди.

Бир гезек Худай Нуха әхли эрбет адамлары ёк этмегиң вагты гелендигини айтды. Йөне Нухы, онуң машгаласыны ве көп хайванлары халас этмекчиди. Гел, Худайың муны нәдип эдендигини билели.

Барлык 6:1—8; Яхуда 6.