9-нҗы хекая

Нух гәми гуряр

НУХУҢ аялы ве үч оглы барды. Онуң огулларының атлары Сам, Хам ве Яфет. Оларың аяллары хем барды. Шейлеликде, Нухуң машгаласы секиз адамдан ыбарат.

Худай Нуха бир үйтгешик юмшы, ягны улы гәми гурмагы табшырды. Нухуң гәмисиниң улулыгы деңиз гәмиси ялыды. Йөне ол дашындан әгирт улы хем узын гапырҗага меңзешди. Худай гәмини үч гатлы ве бирнәче отаглы эдип ясамагы табшырды. Ол ерде Нухуң машгаласы, хайванлар ве иймит үчин отаглар барды.

Шейле-де Худай Нуха, гәмә сув гирмез ялы этмеги табшырды. Худай: «Мен улы сувлар тупаныны гетирйәрин ве бүтин адамзады ёк эдерин. Гәминиң дашында галан әхли зат хеләк болар» дийди.

Нух ве онуң огуллары Ехова гулак асып, гәми гуруп башладылар. Бейлеки адамлар болса, оларың үстүнден гүлйәрди. Олар шол эрбетлигине-де галдылар. Нух Худайың этҗек иши барада гүррүң беренде болса, хич ким ынанмады.

Гәми улы боланы үчин, оны гурмага көп вагт герек болды. Көп йылдан соң, ахыры гәми тайяр болды. Инди Худай Нуха хайванлары гәмә салмагы табшырды. Кәбир хайванлары ики-икиден, ягны эркек ве уркачы эдип салмалыды. Башгалары болса, еди-едиден салмалыды. Шейле-де Худай Нуха дүрли гушларданам гәмә салмагы табшырды. Нух айдылышы ялы хем этди.

Нух машгаласы билен гәмә иң соңундан гирди. Худай хем гапысыны япды. Нух машгаласы билен гәминиң ичинде гарашярды. Айдалы, оларың арасында сенем бар. Худайың айдышы ялы тупан турармыка?

Барлык 6:9—22; 7:1—9.