4-нҗи хекая

Олар өйүнден нәме үчин ковулды?

БОЛАН затлара серет. Адам ата билен Хов энәни аҗайып Эрем багындан ковдулар. Себәбини билйәңми?

Себәби олар гаты эрбет иш этдилер. Шол себәпли хем Ехова олара җеза берйәр. Адам ата билен Хов энәниң нәхили эрбет иш эдендигини билйәңми?

Олар Худайың этмели дәл диен задыны этдилер. Худай олара багдакы мивелерден иймәге ругсат берди. Олар диңе бирҗе агаҗың мивесини иймели дәлдилер, себәби ийселер өлердилер. Худай бу мивели агаҗы өзи үчин гойды. Биз кишиң задыны алмалы дәлдигини билйәрис, шейле дәлми? Онда нәме болдука?

Бир гезек Хов эне багда еке галанда, онуң билен йылан гүрлешди. Ойланып гөр! Ол Хов энә шол агаҗың мивесинден иймеги маслахат берди. Йөне Ехова йыланлары яраданда, олар гепләп билмейәрди. Диймек, йылана дерек башга бири гүрлән болмалы. Онда ол кимкә?

Ол Адам ата дәлди. Онда ол Ехованың Ери яратмазындан өң ярадан перишделериниң бири болмалы. Биз олары гөрүп билмейәрис. Бу перишделериң бири җуда улумсы болды. Онуң Худай ялы хөкүмдар боласы гелди. Шонуң үчин адамларың Ехова дәл-де, өзүне гулак асмагыны иследи. Йылана дерек гүрләнем шол перишдеди.

Хов энәни алдамак оңа башартды. Миведен ийсең, Худай ялы боларсың диен сөзлерине Хов эне ынанды. Шонуң үчин Хов эне миведен алып ийди, соңра Адам ата-да ийди. Худая гулак асмандыгы зерарлы, Адам ата билен Хов эне аҗайып өйи болан Җеннетден ковулды.

Йөне бир гүн Худай бүтин ер йүзүни Эрем багы кимин аҗайып баглыга өврер. Бираз соңра сениң хем муңа нәдип гатнашып билҗекдигиң барада билерис. Хәзир болса, гел, Адам ата билен Хов энә нәме боланыны билели.

Барлык 2:16, 17; 3:1—13, 24; Ылхам 12:9.