1-нҗи хекая

Худай ярадып башлаяр

БИЗДӘКИ говы затларың барысы Худайдан. Ол бизиң үчин гүндизине ягты болсун дийип Гүни, гиҗесине гараңкы болмаз ялы, йылдызлары ве Айы яратды. Шейле-де Худай бизиң үчин Ери яратды.

Эмма Гүн, Ай, йылдызлар хем-де Ер биринҗи ярадылманды. Худайың илки билен кимлери яраданыны билйәңми? Худай илки билен перишделери яратды. Биз Худайы гөрүп билмейшимиз ялы, перишделери хем гөрүп билмейәрис. Перишделер Худай билен гөкде яшамалыдылар.

Худайың илкинҗи ярадан перишдеси үйтгешикди. Бу перишде Худайың илкинҗи Оглуды. Ол Атасы билен зәхмет чекипди. Бу перишде галан әхли затлары, ягны Гүни, Айы, йылдызлары хем-де Ери яратмага Худая көмек этди.

Шол дөвүрде Ер нәхилиди? Илкибашда онда хич ким яшанокды. Бүтин ер йүзүнде сувдан башга хич зат ёкды. Эмма Худай ер йүзүнде адамларың яшамагыны исләп, Ери бизиң үчин тайярламага башлады. Ол нәмелер этдикә?

Илки билен, Ере ягтылык герекди. Шонуң үчин Худай гүнүң шөхлелерини Ере гөнүкдирди. Ол гиҗе билен гүндиз чалшар ялы этди. Соңра Худай сувуң ашагындакы ери ёкарысына чыкарды.

Илкибашда ер йүзүнде хич зат ёкды. Ол эдил шу суратдакы ялыды. Онда не гүллер, не баглар, не-де хайванлар барды. Сувда екеҗе балыгам ёкды. Адамларың хем хайванларың ер йүзүнде яшамагы үчин Худай ене-де көп ишлери этмелиди.

Еремия 10:12; Колоселилер 1:15—17; Барлык 1:1—10.