Байрамчылыклары беллемелими?

ШУ ГҮНКИ дини ве дүнъеви байрамчылыклар Мукаддес Язгылара эсасланмаяр. Онда нәме үчин олары беллейәрлер? Мүмкин, сен бу байрамчылыклар барада энциклопедиядан я-да хабар берйән неширден билесиң гелер. Кәбир мысаллара середели.

Пасха. «Британ энциклопедиясында» шейле дийилйәр: «Иса Месихиң диреленини беллемек барада Инҗилде асла айдылмаяр». Пасха байрамчылыгы Исаның дирелишине багышланан дийселер-де, онуң дәп-дессурлары бутпаразлыкдан гелип чыкды. Меселем, «Католик энциклопедиясы»  пасха товшанына «бутпаразларың хасылының нышаны» диййәр. «Улы совет энциклопедиясында» болса, шейле дийилйәр: «Бутпаразларың бахар байрамындакы (куличи мукаддеслемек, пасха пейнирини тайярламак, юмуртгалары реңклемек ялы) дәп-дессурлар, христианларың Пасха байрамына гечди» (2-нҗи нешир, 32-нҗи том, 1955-нҗи йыл).

Тәзе йыл. Йылың башы хер халкда дүрли вагтда башлаяр ве Тәзе йылы хер юрт өзүче беллейәр. Бу байрамчылыгың гелип чыкышы барада «Уорлд бук» энциклопедиясында шейле дийилйәр: «Б. э. өң 46-нҗы йылда Рим хөкүмдары Юлий Цезарь январь (Түркменбашы) айының 1-ини йылың башы дийип ыглан этди. Римлилер бу гүни хемме задың башыны ве ахырыны, гириши хем чыкышы аңладян Янус диен таңра багш этдилер. Январь айы Янус таңрысының адындан гелип чыкды. Онуң бири-бирине гаршы тарапа середип дуран ики йүзи барды». Гөршүмиз ялы, тәзе йыл байрамлары бутпаразлыкдан гелип чыкды.

Хеллоуин байрамы (Кераматлылар гүни). «Американ энциклопедиясы» шейле диййәр: «Хеллоуин дәп-дессурлары месихчилер дөврүнден өң дөрәп, друидлериң [гадымы кельт руханыларының] дәп-дессурларындан гелип чыкды. Кельтлер ики эсасы таңра — гүн таңрысына хем өлүлер таңрысына багышлап байрамчылык беллейәрдилер. Санҗар (ноябрь) айының 1-инде белленилйән бу байрамчылык, кельтлериң Тәзе йыл байрамыды. Кем-кемден бу байрамчылык христиан байрамына өврүлди».

Бейлеки байрамчылыклар. Байрамчылыкларың хеммесини ара алып маслахатлашып болмаяр. Эмма адамлары я-да гурамалары шөхратландырян байрамчылыклар Ехова ярамаяр (Еремия 17:5—7; Ресулларың ишлери 10:25, 26). Дини байрамчылыкларың Худая яраяныны билмек үчин, оларың гелип чыкышыны билмели (Ишая 52:11; Ылхам 18:4). Шу китабың 16-нҗы бабында гетирилен Мукаддес Язгыларың принциплери, Худайың байрамчылыклара гарайшыны билмәге көмек эдйәр.