Худайың ислеги шумыды?

ИСЛЕНДИК газети окасаң, телевизора серетсең я-да радио диңлесең җенаятчылык, уруш ве террорчылык барада көп айдыляр. Өз кынчылыкларың барада хем ойланып гөр. Мүмкин, сен кеселден я-да доган-гарындашларың өлүминден яңа гайгы-хасрат чекйәнсиң. Сенем Эйюп пыгамбер ялы: «Мен... гайгыдан дойдум» диййәнсиң (Эйюп 10:15).

Ойланып гөр:

▪ Бизиң шейле яшамагымызы Худай иследимикә?

▪ Кынчылыкларымызы чөзер ялы, көмеги ниреден гөзлемели?

▪ Хачанам болса ер йүзүнде парахатлык болармыка?

Бу сораглара Мукаддес Язгылар җогап берйәр.

 МУКАДДЕС ЯЗГЫЛАР ХУДАЙЫҢ ЕР ЙҮЗҮНДЕ ШУ ӨЗГЕРИШЛЕРИ ЭТҖЕКДИГИНИ АЙДЯР:

«Ол оларың гөзлеринден әхли яшларыны сүпүрер. Инди не өлүм, не яс, не агы, не-де агыры болар» (Ылхам 21:4)

«Агсак адам кейик кимин бөкер» (Ишая 35:6)

«Көрлериң гөзи... ачылар» (Ишая 35:5)

 «Габырдакыларың хеммеси... дирелер» (Яхя 5:28, 29)

«Яшайҗыларың хич бири: «Мен ярамок» диймез» (Ишая 33:24)

«Галла... юртда бол болар» (Зебур 72:16)

 МУКАДДЕС ЯЗГЫЛАРЫ ӨВРЕНМЕГИҢ ПЕЙДАСЫ

Ёкардакы айдыланлара йөне бир арзувдыр өйтмәге ховлукма. Чүнки олар Худайың вадасы, Мукаддес Язгылар онуң нәдип ерине етирҗекдигини дүшүндирйәр.

Галыберсе-де, Мукаддес Язгылар хәзирден дурмушыңы манылы эдйәр. Өз кынчылыкларың ве аладаларың барада ойлан. Пул етмезчилиги, кеселчилик, машгала агзалалыгы ве доган-гарындашларың өлүми ялы аладалар дурмушымызы гайгыландыряр. Мукаддес Язгылар оларың хөтдесинден гелмәге көмек эдип, теселли берйәр хем-де шу ваҗып сораглара җогап берйәр:

▪ Биз нәме үчин хорлук чекйәрис?

▪ Дурмушың кынчылыгыны нәдип еңмели?

▪ Машгаланы нәдип багтлы этмели?

▪ Адам өленде, оңа нәме боляр?

▪ Хачанам болса өлен доган-гарындашларымыз билен душушарысмы?

▪ Худайың гелеҗекде әхли вадаларыны ерине етирҗекдигине нәме үчин ынанса болар?

 Сен, шу китабы окасаң, Мукаддес Язгылардакы хакыкаты билесиң гелйәндигини гөркезерсиң. Бу китап Мукаддес Язгыларың нәме өвредйәнини билмәге көмек эдер. Үнс берен болсаң, хер абзаца дегишли сораглар бар. Миллионларча адамлар Ехованың Гүвәчилери билен Мукаддес Язгылары сораг-җогап аркалы өвренйәр. Бу усул саңа-да ярар дийип умыт эдйәрис. Окувың үстүнликли гечмегини арзув эдйәрис! Мукаддес Язгыларың нәме өвредйәндигини билмек үчин эдйән ыхласыңа, гой, Худай ак пата берсин!

[7 Сахыпадакы сурат]

МУКАДДЕС ЯЗГЫЛАРЫ ГОВЫ ӨВРЕН

Мукаддес Язгыларда 66 китап я-да хат бар. Оны өвренмек аңсат болар ялы, баплара ве аятлара бөлүнди. Бизиң шу эдебиятымызда аят гетириленде, биринҗи сан Мукаддес Язгылардакы китабың я-да хатың бабыны, ики нокатдан соңкы сан болса аядыны аңладяр. Меселем, «2 Тимотеос 3:16» дийлип гөркезилсе, Тимотеоса язылан икинҗи хатың 3-нҗи бабының 16-нҗы аядыны аңладяр.

Эгер-де гетирилйән аятлары ачып окасаң, онда Мукаддес Язгылары уланмагы тиз өвренерсиң. Оны хер гүн окамага җан эт. Гүнде үч-бәш бап окасаң, Мукаддес Язгылары бир йылда окап билерсиң.