19-нҗы бап

Худайың сөйгүсинде гал

Худайы сөймек нәме?

Худайың сөйгүсинде галмак үчин нәме этмели?

Ехованың сөйгүсинде галянлара нәхили сылаг гарашяр?

1, 2. Шу гүнлер ниреден пена тапып болар?

АЙДАЛЫ, сен булутлы гүн ёла дүшдүң. Хова гаралып, йылдырым чакяр ве гөк гүррүлдейәр-де, чабга ягып башлаяр. Сен деррев ягышдан гизленмәге ер гөзлейәң. Голайда пена тапып, шол ере ылгаяң. Ол ер гуры ве йылы. Шейле ховпсуз ер тапмак нәхили говы!

² Бизем шу гүнлер ынҗалыксыз дөвүрде яшаярыс. Дүнйә гитдигиче эрбетлешйәр. Эмма эрбетликден гораҗак пена бар. Ол нәхили пена? Мукаддес Язгылар шейле диййәр: «Ол мениң пенам ве галамдыр; мениң Худайымдыр; мен Оңа бил багларын» (Зебур 91:2).

3. Ехова бизе пена болар ялы нәме этмели?

³ Ойланып гөр! Ярадыҗы ве әлем-җаханың Хөкүмдары Ехова бизе пена боляр. Ол бизи горап билйәр, чүнки онуң гүйҗүне тай гелҗек ве оңа гаршы чыкып билҗек гүйч ёк. Хатда бетбагтчылыга учранымызда-да, онуң етирен әхли  зыяныны Ехова ёк эдип билер. Йөне ол бизе пена болар ялы нәме этмели? Мунуң үчин биз оңа бил багламалы. Шейле-де Худайың Сөзи бизе: «Өзүңизи Худайың сөйгүсинде саклаң» диййәр (Яхуда 21). Хава, биз гөкдәки Атамыз билен достлугымызы беркидип, Худайың сөйгүсинде галмалы. Шонда ол бизе хакыкы пена болар. Йөне Худай билен достлугымызы нәдип беркидип болар?

ХУДАЙЫҢ СӨЙГҮСИНЕ МИННЕТДАР БОЛ

4, 5. Ехова бизи сөйүп нәмелер этди?

⁴ Худайың сөйгүсинде галмак үчин, Ехованың бизи сөйүп нәме эдендигини билмели. Шу китапдан өвренен Мукаддес Язгыларың таглыматлары барада ойлан. Ярадыҗымыз Ехова бизе аҗайып өйи, ягны Ери совгат берди. Ол ер йүзүнде бол иймит, сув, тебигы байлыклары, тәсин хайванлары ве гөзел тебигаты яратды. Худай Мукаддес Язгылар аркалы адыны хем-де тәсин хәсиетлерини танатды. Инҗилде Худайың сөйгүли Оглы Иса Месихи ер йүзүне иберендиги айдыляр. Ол бизиң үчин эҗир чекип өлди (Яхя 3:16). Бу совгат бизе нәме берйәр? Бу совгат багтлы яшайша умыт берйәр.

⁵ Аҗайып гелеҗеге умыдымызың болмагының ене бир себәби, Ехова Месихи Патышалыгыны, ягны гөкдәки хөкүметини беркарар этди. Тизден ол әхли хорлугың соңуна чыкып, ер йүзүни Җеннете өврер. Гөрсене, биз парахат ве багтлы дурмушда эбеди яшап билерис! (Зебур 37:29). Ехова дурмушымызы хәзирден говуландырмак үчин гөркезме берйәр. Шейле-де дога аркалы йүрегимизи дөкмәге мүмкинчилик берди. Булар Ехованың хемме адамлара ве хер биримизе гөркезйән сөйгүсиниң кәбир мысаллары.

6. Сен Ехованың сөйгүсине нәдип җогап берйәң?

⁶ Инди болса, Ехованың сөйгүсине нәдип җогап  бермели диен ваҗып сорага середелиң. Көп адамлар: «Ехованы сөймели» диерлер. Сенем шейле пикирдеми? Иса: «Худайың Ребби бүтин йүрегиң, бүтин җаның, бүтин дүшүнҗәң билен сөй» дийди (Матта 22:37). Ол бу табшырыгы иң эсасы табшырык хасаплады. Эмма: «Ехованы бүтин йүрегим, бүтин җаным ве бүтин дүшүнҗәм билен сөййән» диймек етерликми?

7. Нәме үчин Худайы сөййән диймек етерлик дәл? Дүшүндир.

⁷ Мукаддес Язгылардан гөрнүши ялы, Худайы сөййән диймек етерлик дәл. Худайы сөймек ваҗып болса-да, бу Ехова болан сөйгиниң диңе башлангыҗыдыр. Меселем, алма дәнеси миве гетирйән улы агач болуп етишйәр. Эгер-де алма иесиң гелсе, диңе дәнеси билен канагатланармың? Ёк. Шонуң ялы-да Худайы сөймек, онуң билен достлугың диңе илкинҗи әдими. Мукаддес Язгылар: «Худайың сөйгүси Онуң буйрукларыны берҗай этмекдир, Онуң буйруклары болса агыр дәлдир» диййәр (1 Яхя 5:3). Худая болан хакыкы сөйгиниң мивеси болмалы. Сөйгини иш йүзүнде гөркезмели (Матта 7:16—20).

8, 9. Худая болан сөйгиңи ве миннетдарлыгыңы нәдип гөркезип болар?

⁸ Худайы сөйсек, онуң табшырыкларыны ве принциплерини дурмушда уланарыс. Муны этмек кын дәл. Себәби Ехованың кануны агыр дәл, олар бизе пейда гетирйәр ве багтлы эдйәр (Ишая 48:17, 18). Худайың өвүт-несихатыны кабул этсек, онуң бизе берен затларына миннетдардыгымызы гөркезйәрис. Гынансак-да, Худая миннетдарлык билдирйән адам аз. Биз Исаның дөврүндәки гадыр билмез адамлара меңзәсимиз геленок.  Хачан-да Иса он саны хейвере кеселли адамы сагалданда, миннетдарлык билдирмек үчин диңе бири ызына доланды (Лука 17:12—17). Элбетде, бизиң гадыр билмез докуз адама дәл-де, миннетдарлык билдирен адама меңзәсимиз гелйәр.

⁹ Нәхили табшырыклары ерине етирмели? Шу китапдан биз оларың көпүсини биленем болсак, гел, ене-де гайталалы. Худайың табшырыкларыны ерине етирсек, онуң сөйгүсинде галарыс.

ЕХОВА ЯКЫНЛАШ

10. Ехованы танар ялы, билим алып дурмак нәме үчин ваҗып? Дүшүндир.

¹⁰ Ехова якынлашмак үчин, ол барада билим алмагыңы довам этмели. Сен гиҗе совукда одуң башында йылынып отуран болсаң, онуң өчмегине ёл берермидиң? Элбетде, бермездиң. Гайтам, йылынар ялы, оны өчүрмеҗек болуп одун ташлап дурардың. Ёгса, совукдан яңа хеләк болмагың мүмкин. Одуның  оды өчүрмейши ялы, «Худайы танамак» үчинем билим алып дурсак, Ехова сөйгимиз артар (Сүлейманың тымсаллары 2:1—5).

11. Исаның сөзлери онуң шәгиртлерине нәхили тәсир этди?

¹¹ Иса шәгиртлериниң Ехова ве онуң Сөзүне болан сөйгүсини сакламагыны хем-де онуң артмагыны ислейәрди. Иса өзүнде ерине етен кәбир пыгамберликлери, диреленден соң ики шәгирдине дүшүндирди. Бу олара нәхили тәсир этдикә? Шәгиртлер шейле дийди: «Ёлда бизиң билен геплешип гелйәркә, бизе Язгылары дүшүндирйәркә, ичимизде йүрегимиз янмаярмыды?» (Лука 24:32).

12, 13. а) Көп адам Худая ве онуң Сөзүне нәхили гараяр? б) Ехова болан сөйгиң совамаз ялы нәме этмели?

¹² Сен Мукаддес Язгыларың нәме өвредйәнини билениңде, Худая болан шатлыкдан хем сөйгүден яңа йүрегиң җошмадымы? Элбетде, җошандыр. Көп адам өзүни шейле дуйяр. Инди Худая болан сөйгиңи саклап, оны өсдүрмели. Биз бу дүнйәниң гөрелдесине эересимиз геленок. Иса «көплериң сөйгүси совар» дийип айдыпды (Матта 24:12). Ехова ве Мукаддес Язгылара болан сөйгиң совамаз ялы нәме этмели?

¹³ Ехова ве Иса Месих барада билим алмагыңы довам эт (Яхя 17:3). Худайың Сөзүнден өвренйән затларың үстүнде ойлан. Мукаддес Язгылары оканыңда, өзүңе шу сораглары берип билерсиң: Худай барада нәме билдим? Бу аятлар Худайы бүтин йүрегим, бүтин җаным, бүтин дүшүнҗәм билен сөймәге нәдип көмек эдйәр? (Зебур 119:15). Шейле ойлансаң, Ехова болан сөйгиң совамаз.

14. Ехованың сөйгүсинде галмага дога нәдип көмек эдйәр?

¹⁴ Ехова болан сөйгиң совамаз ялы, дынгысыз дога-да этмели (1 Селаниклилер 5:17). 17-нҗи бапдан дога этмеклигиң Худайың совгадыдыгыны билдик.  Адамлар ач-ачан гүрлешип бири-бирине якынлашяр. Шонуң ялы-да хемише Ехова дога этсек, онуң билен достлугымыз беркәр. Йөне дога эденимизде бирмеңзеш, манысыз ве йүрекден чыкмаян шол бир сөзлери ятдан гайталап дурмалы дәл. Дога этмек чаганың атасы билен гүррүңдешлигини яда салмалы. Элбетде, Худая хормат билен ве ак йүрекден йүзленмели (Зебур 62:8). Гөршүмиз ялы, Мукаддес Язгылары өзбашдак өвренмек ве йүрекден дога этмек, Худая гуллук этмегиң бир гөрнүши. Буларың хеммеси Худайың сөйгүсинде галмага көмек эдйәр.

ХУДАЯ ШАТЛЫК БИЛЕН ГУЛЛУК ЭТ

15, 16. Нәме үчин вагыз этмеклиги генҗи-хазына билен деңесе болар?

¹⁵ Мукаддес Язгылары өзбашдак өвренмек ве дога этмек, Ехова Худая гуллук этмегиң бир гөрнүши. Ол Худай билен гатнашыгымыза тәсир эдйәр. Гел, инди адамлара дини дүшүнҗәмиз барада гүррүң берип, вагыз эдишимизе середели. Сен Мукаддес Язгылардакы хакыкаты адамлара гүррүң берйәңми? Гүррүң берйән болсаң, онда бу-да Ехова гуллук этмәге оңат мүмкинчилик (Лука 1:75). Ехова барада билйән затларымызы адамлара гүррүң берсек, Худайың Патышалыгы барадакы хош хабары вагыз этмели диен табшырыгы ерине етирйәрис (Матта 24:14; 28:19, 20).

¹⁶ Павлус ресул вагыз этмеклиге ёкары баха берип, оңа генҗи-хазына дийди (2 Коринтослылар 4:7). Адамлара Ехова ве онуң ниетлери барада гүррүң бермекден говы зат ёк. Себәби, шейдип, иң говы Хоҗайына гуллук эдерсиң ве көп берекет аларсың. Биз вагыз эдип, акйүрекли адамлара гөкдәки Атамыза якынлашмага ве эбеди яшайша говушмага көмек эдйәрис. Шейле көп шатлык гетирйән башга иш бармы? Ехова ве онуң  Сөзи барада гүррүң берсең, иманың беркәр ве Худая болан сөйгиң артар. Сениң эдйән ишлериңи Ехова гыммат сайяр (Еврейлер 6:10). Худайың сөйгүсинде галмак үчин вагыз этмели (1 Коринтослылар 15:58).

17. Вагыз этмек нәме үчин гайрагоюлмасыз иш?

 ¹⁷ Патышалык барада вагыз этмек — гайрагоюлмасыз иш. Мукаддес Язгылар: «Худайың сөзүни гайрагоюлмасыз вагыз эт» диййәр (2 Тимотеос 4:2, ТД). Бу иш нәме үчин ваҗып? Худайың Сөзи шейле җогап берйәр: «Ехованың бейик гүни якындыр, якындыр ве чалт етип гелйәр» (Зефаня 1:14, ТД). Хава, Ехованың бу залым дүнйәни ёк этҗек вагты чалт етип гелйәр. Муны адамлара дуйдурмак герек. Олар хәзирден Ехованы Бейик Хөкүмдар хөкмүнде кабул этмели. Залым дүнйәниң соңы «гиҗикмез» (Хабаккук 2:3, ТД).

18. Нәме үчин Ехованың адыны месихчилер билен билеликде шөхратландырмалы?

¹⁸ Ехова бизиң месихчилер билен билеликде адыны шөхратландырмагымызы ислейәр. Инҗилде шейле дийилйәр: «Бирек-биреги сөйги, оңат ишлер үчин гайрата галдырҗак болалың. Кәбирлериниң эндик эдиши ялы, йыгнанышмагы гойман, гайтам ол гүнүң голайлаянлыгыны нәче гөрсеңиз, шонча-да бири-биримизи рухландыралың» (Еврейлер 10:24, 25). Месихчилериң йыгнагында Худайымызы шөхратландырмага ве оңа гуллук этмәге говы мүмкинчилик бар. Шейле-де йыгнакда биз имандашларымызы рухландырып ве голдап билйәрис.

19. Йыгнакда доганлык сөйгини нәдип беркидип болар?

¹⁹ Ехованың бейлеки гуллукчылары билен гатнашык сакласак, йыгнакдакы доганлык сөйгини ве агзыбирлиги беркидйәрис. Ехованың бизиң говы хәсиетлеримизи гөрши ялы, биз-де имандашларымызың говы хәсиетлерине үнс бермели. Хич кимден кәмиллиге гарашма. Месихчилериң рухы тайдан дең өсмейәндигини ве хеммәмизиң ялңышяндыгымызы унутма (Колоселилер 3:13). Ехованы бүтин йүреги билен сөййән доганлар билен достлашсаң, рухы тайдан  өсмәге көмек эдер. Хава, месихчи доган-уяларымыз билен агзыбир болсак хем-де Ехова билеликде гуллук этсек, Худайың сөйгүсинде галарыс. Ехованың сөйгүсинде галян вепалы гуллукчылара нәхили сылаг гарашяр?

«ХАКЫКЫ ЯШАЙША» ГОВУШМАГА ҖАН ЭТ

20, 21. «Хакыкы яшайыш» нәме ве нәме үчин оңа аҗайып гелеҗек дийсе болар?

²⁰ Ехова вепалы гуллукчыларына яшайыш сылагыны берер. Йөне нәхили яшайыш? Эйсем, шу гүнлер биз яшамаярысмы? Көп адамлар үчин бу сорагың җогабы айдың, чүнки биз дем алярыс, ичйәрис ве иййәрис. Элбетде, биз яшаярыс. Дурмушымызың иң багтлы пурсатларында: «Хакыкы яшайыш дийип шуңа айтсаң!» диййәрис. Эмма Мукаддес Язгыларың айтмагына гөрә, шу гүнлер адамлар хакыкы дурмушда яшамаяр.

²¹ Мукаддес Язгылар бизи «хакыкы яшайша эе болмага» чагыряр (1 Тимотеос 6:19). Диймек, биз «хакыкы яшайша» диңе гелеҗекде говшарыс. Биз кәмиллиге етип, Худайың башдакы ислейши ялы яшарыс. Җеннетде биз сагдын, парахат ве багтлы яшанымызда хакыкы, ягны эбеди яшайша говшарыс (1 Тимотеос 6:12). Бизе гөр, нәхили аҗайып гелеҗек гарашяр!

22. «Хакыкы яшайша эе болар» ялы, сен нәме этмели?

²² «Хакыкы яшайша эе болар» ялы нәме этмели? Павлус бу сөзлери айтмазындан өң, месихчилере «ягшылык этмеги, ягшы ишлере бай болмагы» үндеди (1 Тимотеос 6:18). Диймек, Мукаддес Язгылардан алан билимимизи дурмушда уланмалы. Йөне Павлусың сөзлери, ягшы ишлер билен «хакыкы яшайшы» газанып билҗекдигимизи аңладярмы? Ёк, чүнки оңа диңе Худайың «мерхемети» аркалы етип билерис (Римлилер 5:15). Муңа гарамаздан, Ехова вепалы  гуллукчыларыны хөвес билен сылаглар. Ол сениң «хакыкы яшайша» говушмагыңы ислейәр. Худайың сөйгүсинде галян адамларың әхлиси Җеннетде эбеди яшар.

23. Нәме үчин Худайың сөйгүсинде галмалы?

²³ Хер биримиз шейле сорагың үстүнде ойланмалы: Худая ярамлы яшаярынмы ве Мукаддес Язгыларың өвредиши ялы гуллук эдйәринми? Эгер шу сорага хер гүн «хава» дийип җогап берсек, онда биз догры ёлдан барярыс ве элбетде, Ехова бизиң пенамыз болар. Ол вепалы гуллукчыларыны бу ынҗалыксыз дөвүрде, ягны залым дүнйәниң ахырында горар. Ехова етип гелйән тәзе дүнйә говушмага көмек эдер. Тәзе дүнйәде багтлы яшамак гөр, нәхили аҗайып! Шонда вагтында догры ёл сайландыгымыза нәхили бегенерис! Эгер сен хәзирден догры ёлы сайлап, Худайың сөйгүсинде галсаң, «хакыкы яшайша» говшарсың ве Ехова Худайың башдакы ислейши ялы эбеди яшарсың!

МУКАДДЕС ЯЗГЫЛАР НӘМЕ ӨВРЕДЙӘР?

▪ Худайы хакыкатдан сөйсек, онуң табшырыкларыны ве принциплерини дурмушда уланмалы (1 Яхя 5:3).

▪ Худайың сөйгүсинде галмак үчин, Мукаддес Язгылары өвренмели, Ехова йүрекден дога этмели, хош хабары вагыз этмели ве месихчилериң йыгнагына гатнашмалы (Матта 24:14; 28:19, 20; Яхя 17:3; 1 Селаниклилер 5:17; Еврейлер 10:24, 25).

▪ Худайың сөйгүсинде галянлар «хакыкы яшайша» говшар (1 Тимотеос 6:12, 19; Яхуда 21).

[Макаланың сораглары]

[184 Сахыпадакы сурат]

Бу ынҗалыксыз дөвүрде Ехова саңа пена болармы?

[187 Сахыпадакы сурат]

Худая болан сөйги ода меңзейәр. Ол сөнмез ялы одун ташлап дурмалы

[190 Сахыпадакы сурат]

Ехова сениң «хакыкы яшайша» говушмагыңы ислейәр. Сен шейле дурмушда яшамага җан эдйәңми?