12-нҗи бап

Худайы бегендирип яша

Сен нәдип Худайың досты болуп билерсиң?

Шейтаның орта атан җеделли меселеси саңа нәхили тәсир эдйәр?

Ехова нәхили гылык-хәсиетлер ярамаяр?

Худая ярамлы яшамак үчин нәме этмели?

1, 2. Ехова кимлере достум дийди?

СЕНИҢ нәхили адам билен достлашасың гелйәр? Мегерем, сениң билен пикирдеш, саңа дүшүнйән адам билен достлашардың. Саңа говы хәсиетли, догручыл ве мәхирли адам яраяндыр.

² Тарыхда Худайың досты болан адамлар болупды. Меселем, Ехова Ыбрайыма «достум» дийди (Ишая 41:8; Якуп 2:23). Худай Давут барада «йүрегиме лайык бир адам» дийди, себәби ол Ехованың сөййән адамларынданды (Ресулларың ишлери 13:22). Даниел пыгамбере болса, Ехованың перишдеси: «Худай сени җуда говы гөрйәр» дийди (Даниел 9:23).

3. Ехова нәхили адамлар билен достлашяр?

³ Ехова Ыбрайымы, Давуды хем-де Даниели нәме үчин досты хасаплады? Худай Ыбрайыма: «Сен мениң сөзүме гулак асдың» дийди (Барлык 22:18). Гөршүмиз ялы, Ехова гулак асян песгөвүнли адамлар билен достлашяр. Худай ысрайыллылара: «Мениң сөзүме гулак ассаңыз, Мен сизиң Худайыңыз боларын, сизем Мениң халкым боларсыңыз» дийди (Еремия 7:23). Эгер Ехова гулак ассаң, сенем онуң досты болуп билерсиң.

 ЕХОВА ДОСТЛАРЫНЫ ГОЛДАЯР

4, 5. Ехова гуллукчыларыны нәдип голдаяр?

⁴ Худай билен достлашмагың нәхили говудыгыны билйәңми? Мукаддес Язгылар Ехова «өзүне вепалы адамлары голдаяр» диййәр (2 Тарыхлар 16:9). Ехова сени нәдип голдап билер? Зебур 32:8-де: «Саңа гөркезме берерин, йөреҗек ёлуңы өвредерин; гөзүм сенде болар» дийилйәр.

⁵ Ехова гөр, нәхили мәхирли хем аладачыл! Ол сени догры ёла гөнүкдирер ве ондан йөремәге-де көмек эдер. Худай кын гүнлериңде ве сынагларыңда саңа голдав бермек ислейәр (Зебур 55:22). Шонуң үчин Ехова вепалы гуллук этсең, сенде-де: «Мен Ребби мыдама гөзүмиң алнында гөрйәрин; Онуң сагымдалыгы үчин гымылдамарын» диен, мезмурчыныңкы ялы берк ынам болар (Зебур 16:8; 63:8). Ехова саңа өз ислегине лайык яшамага көмек эдер. Эмма Худайың душманы догры яшамагыңы ислемейәр.

ШЕЙТАН ТӨХМЕТ АТЯР

6. Шейтан адамлары нәмеде гүнәкәрледи?

⁶ 11-нҗи бапдан билшимиз ялы, Шейтан Иблис Ехованың хөкүмдарлык этмәге хаклыдыгыны шүбхә гойды. Шейтан Худая төхмет атып, ягшыны ве яманы Адам ата билен Хов энәниң өзлерине чөздүрмән, Ехова адалатсызлык эдйәр диймекчи болды. Адам ата билен Хов эне гүнә эдип, ер йүзүнде оларың несли яшап башланда, Шейтан хемме адамларың вепалылыгыны шүбхә гойды. Шейтан: «Адамлар Худайы сөййәндиги үчин гуллук этмейәр. Мениң ыгтыярымда болса, ислендик адамы Худайдан дашлашдырардым» дийди. Шейтаның шейле пикир эдйәндигини Эйюбың дурмушы гөркезйәр. Эйюп ким? Ол җеделли меселә нәдип дүшди?

7, 8. а) Эйюп өз дөврүндәки адамлардан нәмеде тапавутланярды? б) Шейтан Эйюбың вепалылыгыны нәдип шүбхә гойды?

 ⁷ Эйюп пыгамбер 3 600 йыл мундан өң яшапды. Ол догры адамды. Ехова ол барада: «Ер йүзүнде Эйюп ялы вепалы, адалатлы, худайхон ве эрбетликден гача дурян адам ёкдур» дийди (Эйюп 1:8). Эйюп Худайы бегендирип яшаярды.

⁸ Шейтан Эйюбың вепалылыгыны шүбхә гойды. Иблис Ехова: «Эйюбы, онуң өйүни ве әхли задыны гораян Сен дәлми? Онуң эллериниң ишини Сен берекетледиң, онуң маллары-да көпелйәр; эмма элиңи узат-да, онуң әхли задына дегип гөр, Саңа гаргамазмы?» дийди (Эйюп 1:10, 11).

9. Ехова Шейтаның төхметине нәдип җогап берди ве нәме үчин?

⁹ Шейтан Эйюбың бир зат тамакин болуп Худая гуллук эдйәндигини айтды. Үстесине-де, Иблис Эйюбы сынага салсаң, Худайдан йүз өврер дийди. Ехова Шейтаның төхметине нәдип җогап берди? Бу меселе Эйюбың вепалылыгына дегишлиди, шонуң үчин Худай гуллукчысыны сынамага Шейтана ёл берди. Шейлеликде, Эйюбың, хакыкатдан-да, Худайы сөййәндиги аян болмалыды.

ЭЙЮП СЫНАЛЯР

10. Эйюбың башына нәхили сынаглар дүшди ве ол нәме этди?

¹⁰ Шейтан Эйюбы агыр сынага салды. Онуң мал-мүлкүниң көпүси огурланды, галаны болса ёк эдилди. Хызматкәрлериниң хем көпүси өлди. Шейдип, Эйюп бар задындан махрум болды. Соңра ене-де бир элхенч вака болды, ягны гүйчли ел туранда, онуң он чагасы хеләк болды. Бу бетбагтчылыклара гарамаздан, «Эйюп гүнә этмеди ве Худая гаршы бир сөзем айтмады» (Эйюп 1:22).

11. а) Шейтан Эйюбы ене нәмеде айыплады ве Ехова муңа нәхили җогап берди? б) Эйюп кеселе нәдип дөз гелди?

¹¹ Йөне Шейтан шонда-да эл чекмеди. Ол: «Эйюп әхли  йитгисине кайыл болса-да, хызматкәрлериниң ве чагаларының өлүмине дөз гелсе-де, кеселе сезевар этсек, Худайдан йүз өврер» дийип, пикир эден болмалы. Ехова Эйюбы агыр кеселе дучар этмәге Шейтана ёл берди. Хатда шейле кеселем Эйюбың иманыны говшатмады. Гайтам, ол: «Өлйәнчем вепалы галарын» дийди (Эйюп 27:5).

12. Эйюп Шейтаның яланчыдыгыны нәдип субут этди?

¹² Эйюп бу бетбагтчылыкларың Шейтандандыгыны биленокды. Онуң җеделли меселеден хабары ёкды ве бетбагтчылыклары Худайдан гөрйәрди (Эйюп 6:4; 16:11—14). Шонда-да ол Худая вепалы галып, Шейтаның яланчыдыгыны субут этди. Эйюбың Худая йүрекден гуллук эдйәни айдың болды.

13. Эйюп вепалы галып нәме этди?

¹³ Эйюп вепалы галып, Шейтаның атан төхметине берк җогап берди. Эйюп Ехованың хакыкы достуды, Худай хем оны вепалылыгы үчин сылаглады (Эйюп 42:12—17).

ҖЕДЕЛЛИ МЕСЕЛЕ САҢА НӘХИЛИ ТӘСИР ЭДЙӘР?

14, 15. Шейтаның төхмети нәме үчин диңе бир Эйюба дәл-де, хемме адамлара дегишли?

¹⁴ Шейтаның вепалылык барадакы меселеси диңе Эйюба дегишли дәлди. Ол саңа-да дегишли. Бу Сүлейманың тымсаллары 27:11-дәки сөзлерден гөрүнйәр. Ол ерде шейле дийилйәр: «Оглум, мен өзүме гыҗалат берйәне бир сөз гайтарар ялы, акылдар бол-да, йүрегими шатландыр». Бу сөзлер Эйюп өленсоң йүзлерче йыл геченде язылды. Диймек, Шейтан Худая гыҗалат бермегини, онуң гуллукчыларына болса төхмет атмагыны довам эдйәр. Бизем Худая ярамлы яшасак, Шейтаның төхметине җогап берип, Ехованың йүрегини шатландырарыс. Бу сенде нәхили дуйгы дөредйәр? Иблисиң  төхметине җогап бермек үчин дурмушыңы үйтгетмели болса-да, мунуң улы хорматдыгыны бил!

¹⁵ Шейтан: «Адам өз җаны үчин хемме затдан гечер» дийди (Эйюп 2:4). Шейтан «адам» дийип, диңе Эйюбы дәл-де, эйсем хемме адамлары гөз өңүне тутды. Муны ятда сакламалы, себәби Шейтан сениңем вепалылыгыңы шүбхә гойды. Иблис сениң кынчылыкдан яңа, Худая гулак асман догры ёлы ташламагыңы ислейәр. Шейтан максадына етмек үчин нәмелер эдйәр?

16. а) Шейтан адамлары Худайдан нәдип дашлашдыряр? б) Иблис саңа нәдип пәсгел берер?

¹⁶ 10-нҗы бапдан билшимиз ялы, Шейтан адамлары дүрли ёллар билен Худайдан дашлашдыряр. Онуң «арлайҗы арслан кимин ювутҗагыны агтарып» топулмагы мүмкин (1 Петрус 5:8). Бу, эсасанам, достларың, доган-гарындашларың я-да башга адамлар Мукаддес Язгылары өвренмәге ве онуң принциплерини дурмушда уланмага саңа пәсгел беренде гөрүнйәр * (Яхя 15:19, 20). Мундан башга-да, Шейтан «нур перишдесиниң кешбине гирйәр» (2 Коринтослылар 11:14). Шейле ягдайда ол мекирлик билен сени алдап, догры ёлы ташлатҗак боляр. Онсоңам, тапдан дүшеңде Худая гуллук этмәге мынасып дәлдирин диен пикир дөредйәр (Сүлейманың тымсаллары 24:10). Шейтан «арлайҗы арслан кимин» херекет этсе-де, «нур перишдеси» ялы херекет этсе-де, максады бир. Сен сынага дүшеңде Худая гуллук этмеҗекдигиңи Шейтан субут этҗек боляр. Эйюпдан гөрелде алып, Шейтаның төхметине нәдип җогап берерсиң хем-де Ехова вепалыдыгыңы нәдип субут эдерсиң?

 ЕХОВАНЫҢ ТАБШЫРЫКЛАРЫНЫ БЕРҖАЙ ЭТ

17. Ехованың табшырыкларыны берҗай этмәге, эсасан, нәме хөвеслендирмели?

¹⁷ Сен Худайың ислейши ялы яшасаң, Шейтаның төхметине җогап берип билерсиң. Онуң үчин нәме этмели? Мукаддес Язгылар: «Худайың Ребби бүтин йүрегиң, бүтин җаның, бүтин гүйҗүң билен сөй» диййәр (Кануның гайталанышы 6:5). Худая болан сөйгиң артдыгыча, оңа гуллук этмек ислегиңем артар. Яхя ресул: «Чүнки Худайың сөйгүси Онуң буйрукларыны берҗай этмекдир, Онуң буйруклары болса агыр дәлдир» дийип язды (1 Яхя 5:3).

18, 19. а) Ехованың кәбир табшырыклары хайсылар? (122-нҗи сахыпадакы чарчува серет). б) Гүйҗүмизден артык зады Худайың талап этмеҗегини ниреден билйәрис?

¹⁸ Ехованың табшырыкларына нәмелер дегишли? Табшырыкларың кәбири бизиң этмели дәл затларымызы гөркезйәр.  122-нҗи сахыпадакы «Ехованың йигренйән ишлеринден гача дур» диен чарчува үнс берсең, Мукаддес Язгыларда нәхили ишлериң язгарыляндыгыны гөрерсиң. Оларың кәбири эрбет дәл ялы болуп хем гөрнер. Эмма Мукаддес Язгылардакы аятларың үстүнде ойлансаң, Ехованың канунында акылдарлык бардыгыны гөрерсиң. Дурмушыңы үйтгетмек еңил дүшмез, гайтам, сениң үчин агыр сынаг болмагы хем мүмкин. Эмма Худайың ислейши ялы догры яшасаң, багтлы болҗакдыгыңы унутма (Ишая 48:17, 18). Худайың ислегини ерине етирип боляр. Муны ниреден билйәрис?

¹⁹ Ехова гүйҗүмизден артык зады талап этмейәр (Кануның гайталанышы 30:11—14). Ол мүмкинчилигимизиң чәклидигини өзүмизденем говы билйәр (Зебур 103:14). Мундан башга-да талапларыны ерине етирмәге Ехова бизе гүйч берер. Павлус ресул шейле язды: «Худай догручылдыр, Ол сизе гүйҗүнден өте сыналмагыңыза ёл бермән, дөз гелип билмегиңиз үчин,  сынаг билен билеликде чыкалга-да ачар» (1 Коринтослылар 10:13). Хемме зада дөз гелип билер ялы, Ехова саңа «иң үстүн гудрат» берер (2 Коринтослылар 4:7). Көп сынаглары башдан гечирен Павлус ынам билен: «Өзүми гүйчлендирйән Месих аркалы хер зады этмеги башарярын» дийди (Филипилилер 4:13).

ХУДАЯ ЯРАЯН ХӘСИЕТЛЕРИ ӨСДҮР

20. Худая яраян нәхили хәсиетлери өсдүрмели ве нәме үчин?

²⁰ Йөне Ехованың йигренйән затларындан гача дурмак  етерлик дәл. Худайы бегендирмек үчин, онуң сөййән затларыны сөймели (Римлилер 12:9). Сениң билен пикирдеш, саңа дүшүнйән адам билен достлашасың гелмезми? Ехова-да шонуң ялы. Шонуң үчин онуң говы гөрйән затларыны сөйҗек бол. Онуң говы гөрйән затлары Зебур 15:1—5-нҗи аятларда айдыляр. Шол аятлар Худай билен нәдип достлашып боляндыгыны гөркезйәр. Ехованың достлары Мукаддес Язгыларда агзалян «рухуң мивесини» өсдүрйәр. Рухуң мивеси шулардан ыбарат: «Сөйги, шатлык,  парахатлык, сабыр, мәхрибанлык, ягшылык, садыклык, юмшаклык ве небсиңе буюрмаклыкдыр» (Галатялылар 5:22, 23).

21. Худая яраян хәсиетлери өсдүрмәге нәме көмек эдер?

²¹ Мукаддес Язгылары хер гүн окасаң хем-де өвренсең Худая яраян хәсиетлери өсдүрип билерсиң. Худайың талапларыны билсең, онуң гарайшы ялы гарамагы өвренерсиң (Ишая 30:20, 21). Ехова болан сөйгиң артдыгыча, догры яшап оны бегендирерсиң.

22. Худая ярамлы яшайыш саңа нәме гетирер?

²² Ехова ярамлы яшамак үчин тагалла этмели. Мукаддес Язгыларда дурмушыңы өзгертмек, көне ярадылышы эгниңден чыкарып, тәзе ярадылышы геймек билен деңешдирилйәр (Колоселилер 3:9, 10). Ехованың табшырыгы барада мезмурчы шейле язды: «Олары сакламакда улы сылаг бардыр» (Зебур 19:11). Худая ярамлы яшасаң, бол берекет гетирйәндигине сенем гөз етирип билерсиң. Шейдип, сен Шейтаның төхметине җогап берерсиң ве Ехованың йүрегини бегендирерсиң!

[Чыкгыт]

МУКАДДЕС ЯЗГЫЛАР НӘМЕ ӨВРЕДЙӘР?

▪ Сен Худая гулак ассаң, онуң досты болуп билерсиң (Якуп 2:23).

▪ Шейтан хемме адамларың вепалылыгыны шүбхә гойды (Эйюп 1:8, 10, 11; 2:4; Сүлейманың тымсаллары 27:11).

▪ Худайың язгарян затларындан гача дурмалы (1 Коринтослылар 6:9, 10).

▪ Ехованы бегендирмек үчин онуң йигренйән задыны йигренип, сөййән задыны сөймели (Римлилер 12:9).

[Макаланың сораглары]

 [118 Сахыпадакы сурат]

 Эйюп вепалылыгы үчин сылагланды

[122 Сахыпадакы сурат]

ЕХОВАНЫҢ ЙИГРЕНЙӘН ИШЛЕРИНДЕН ГАЧА ДУР

Адам өлдүрмек (Чыкыш 20:13; 21:22, 23).

Җынс ахлаксызлыгы (Левилилер 20:10, 13, 15, 16; Римлилер 1:24, 26, 27, 32; 1 Коринтослылар 6:9, 10).

Спиритизм (Кануның гайталанышы 18:9—13; 1 Коринтослылар 10:21, 22; Галатялылар 5:20).

Бутпаразлык (1 Коринтослылар 10:14).

Араккешлик (1 Коринтослылар 5:11).

Огрулык (Левилилер 6:2, 4; Эфеслилер 4:28).

Ялан сөзлемек (Сүлейманың тымсаллары 6:16, 19; Колоселилер 3:10; Ылхам 22:15).

Ачгөзлүк (1 Коринтослылар 5:11).

Зорлук (Зебур 11:5; Сүлейманың тымсаллары 22:24, 25; Галатялылар 5:20).

Хапа сөзлер (Левилилер 19:16; Эфеслилер 5:4; Колоселилер 3:8).

Ганы нәдогры уланмак (Барлык 9:4; Ресулларың ишлери 15:20, 28, 29).

Машгаланың аладасыны этмекден боюн гачырмак (1 Тимотеос 5:8).

Дүнйәдәки урушлара ве сыясы давалара гатнашмак (Ишая 2:4; Яхя 6:15; 17:16).

Кейп чекмек үчин неше маддаларыны уланмак хем-де чилим чекмек (Маркус 15:23; 2 Коринтослылар 7:1).