Худайы шөхратландырян Реббиң Агшам нахары

МЕСИХЧИЛЕРЕ Иса Месихиң өлен гүнүни ятламак табшырылды. Бу ятлама гүне «Реббиң нахары» хем дийилйәр (1 Коринтослылар 11:20). Бу байрамчылыгың нәхили әхмиети барка? Оны хачан ве нәдип беллемели?

Иса Месих бу байрамчылыгы б. э. 33-нҗи йылында еврейлериң Пасха байрамыны беллейән гүни гиризди. Пасха байрамыны еврейлериң нисан айының 14-ине йылда бир гезек беллейәрдилер. Онуң хайсы гүне дүшҗегини билмек үчин, гиҗе-гүндизиң язда деңлешйән вагтына гарашярдылар. Язда гиҗе-гүндизиң деңлешйән гүнүне голай тәзе доган айдан, нисан айы башланярды. Пасха байрамыны нисан айының 14-ине, гүн яшандан соң беллейәрдилер.

Иса пыгамбер шәгиртлери билен Пасха байрамыны белләп, Иуда Искариоты иберенден соң, Реббиң Агшам нахарыны гиризди. Ол еврейлериң Пасха байрамына дерек боланы үчин, оны йылда бир гезек беллемели.

Маттаның хош хабарында шейле дийилйәр: «Иса чөрек алып, шүкүр этди-де, оны  дөвүп шәгиртлере берди, дийди: «Алың, ийиң, бу Мениң беденимдир». Онсоң кәсәни алды, шүкүр эденинден соң, олара берип дийди: «Шундан хеммәңиз ичиң, чүнки бу Мениң ганым, гүнәлериң багышланмагы үчин көп адамларың хатырасына дөкүлен тәзе әхтиң ганыдыр» (Матта 26:26—28).

Кәбир адамлар Иса чөреги бедене, шерабы болса гана өврендир өйдйәр. Эмма Иса чөреги ресулларына беренде, онуң бедени ериндеди. Исаның ресуллары, догруданам, онуң беденини ийип, ганыны ичдилермикә? Ёк. Бу адамхорлук ве Худайың канунына гаршы боларды (Барлык 9:3, 4; Левилилер 17:10). Лука 22:20-де Иса шейле дийди: «Бу кәсе Мениң сизиң үчин дөкүлен ганым билен беркидилен тәзе әхтдир». Кәсе «тәзе әхт» болдумыка? Ёк, себәби әхт баглашмак мадды зат дәл-де, дүшүнҗе.

Диймек, чөрек билен шерап бир задың нышаны болмалы. Чөрек Исаның кәмил беденини аңладяр. Шол агшам Иса шәгиртлерине Пасха нахарындан галан чөреги берди. Бу чөреги хамырмаясыз биширйәрдилер (Чыкыш 12:8). Мукаддес Язгыларда хамырмая гүнәни ве заялыгы аңладяр. Петир чөрек Исаның гурбан эден кәмил беденини аңладяр. Онуң бедени гүнәсизди (Матта 16:11, 12; 1 Коринтослылар 5:6, 7; 1 Петрус 2:22; 1 Яхя 2:1, 2).

Гырмызы шерап Исаның ганыны аңладяр. Исаның дөкен ганы аркалы тәзе әхт башлаяр. Иса «гүнәлериң багышланмагы үчин» ганының дөкүлҗегини айтды. Бу болса адамлара Ехованың өңүнде арасса болмага ве онуң билен тәзе әхт баглашмага мүмкинчилик берйәр (Еврейлер 9:14; 10:16, 17). Бу әхт багланышыгы 144 000 вепалы месихчилере гөкде яшамага ёл ачяр. Олар патыша ве руханы болуп, адамзада пейда гетирер (Барлык 22:18; Еремия 31:31—33; 1 Петрус 2:9; Ылхам 5:9, 10; 14:1—3).

Реббиң Агшам нахарында чөрекден ве шерапдан ким датмалы? Әхт баглашанлар ве гөкде яшаҗаклар чөрекден хем-де шерапдан дадып билйәр. Бу адамлар гөкде патыша болмак үчин сайланандыгына, мукаддес рух  гүвә гечйәр (Римлилер 8:16). Шейле-де Иса Месих олар билен Патышалык барада әхт баглашды (Лука 22:29).

Онда ер йүзүндәки Җеннетде эбеди яшамага умыт эдйән адамлар барада нәме дийсе болар? Иса Месихиң табшырыгыны ерине етирип, оларам ятлама агшамына гелйәр. Олар ятлама агшамына сарпа гойяр, эмма чөрекден ве шерапдан датмаяр. Ехованың Гүвәчилери Реббиң Агшам нахарыны нисан айының 14-ине, гүн яшандан соң, йылда бир гезек беллейәр. Гөкде яшаҗаклардан хәзир ер йүзүнде бирнәче мүңи галса-да, месихчилериң хеммеси бу ятлама агшамының гадырыны билйәр. Бизиң хер биримиз Реббиң Агшам нахарында Ехова Худай билен Иса Месихиң чәксиз сөйгүси барада ойланып билерис (Яхя 3:16).