Худая дога аркалы якынлаш
17-нҗи бап
Худая дога аркалы якынлаш
Худая нәме үчин дога этмели?
Худай догаларымызы эшидер ялы нәме этмели?
Худай догаларымыза нәдип җогап берйәр?
1, 2. Дога этмек нәме үчин улы хормат ве Мукаддес Язгыларың дога барада өвредйән затларыны нәме үчин билмели?
БИЗИҢ Ер планетамызы әлем-җахан билен деңешдирениңде гаты кичи. «Гөклери ве ери ярадан» Ехова үчин әхли миллетлер бедредәки сув дамҗасы ялыдыр (Зебур 115:15; Ишая 40:15). Муңа гарамаздан, Мукаддес Язгыларда шейле дийилйәр: «Реб өзүни чагырянларың әхлисине, Өзүни чындан [хакыкатда, ТД] чагырянларың әхлисине якындыр. Ол Өзүнден горкянларың ислегини канагатландыряндыр, оларың перятларыны эшидйәр ве олары гутаряр» (Зебур 145:18, 19). Ойланып гөр! Гудраты гүйчли Ярадыҗы оны хакыкатда чагырянлара якын ве олары эшидйәр. Худая догада йүзленмек гөр, нәхили улы хормат!
2 Ехова догамызы эшидер ялы, онуң ислегине гөрә йүзленмели. Мукаддес Язгыларың дога барада нәме өвредйәнини билмән, нәдип дога эдип болар? Бу меселе — ваҗып меселе, чүнки дога аркалы Ехова якынлашярыс.
ЕХОВА НӘМЕ ҮЧИН ДОГА ЭТМЕЛИ?
3. Ехова дога этмегиң эсасы себәплериниң бири нәме?
3 Дога этмегиң эсасы себәби, Ехованың өзи дога этмәге чагыряр. Онуң Сөзүнде шейле дийилйәр: «Хич задың аладасыны этмән, хер затда дилеглериңизи дога ве ялбарма аркалы шүкүр билен Худая билдириң. Хер хили дүшүнҗеден ёкары болан Худайың парахатчылыгы Месих Исада сизиң йүрегиңизи, пикирлериңизи горар» (Филипилилер 4:6, 7). Элбетде, Әлемиң Бейик Хөкүмдарының берен аҗайып совгадындан йүз өвресимиз геленок.
4. Ехова билен достлугың беркәр ялы дога нәдип көмек эдйәр?
4 Ехова дога этмегимизиң ене бир себәби, онуң билен гүррүңдеш болсак достлугымыз беркәр. Хакыкы достлар бири-бирине диңе иши чыканда йүз тутмаяр. Олар биле болмагы говы гөрйәр. Достлар ач-ачан пикир алшанда хем-де дертлешенде оларың гатнашыгы беркейәр. Ехова Худай билен хем шонуң ялы. Шу китапдан Худай, онуң хәсиетлери ве ниети барада Мукаддес Язгыларың нәме өвредйәнини билдиң. Инди сен Худайың шахсыетдигини билйәң. Дога эдип гөкдәки Атамыза ичиңи дөкүп билерсиң. Шейдип, сен Ехова якынлашарсың (Якуп 4:8).
ВАҖЫП ТАЛАПЛАР
5. Ехованың хемме доганы диңлемейәнини ниреден билйәрис?
5 Ехова хемме доганы диңлейәрми? Ишая пыгамбериң дөврүнде питнечи ысрайыллылара онуң айдан сөзлерине үнс бер: «Сиз көп ялбарсаңызам, Мен диңлемейәрин; сизиң элиңиз гандан долы» (Ишая 1:15). Гөршүмиз ялы, кәбир адамларың өзүни алып баршы, дога эденлеринде Ехованың диңлемезлигине меҗбур эдйәр. Эдйән догамыз Худая ярар ялы, эсасы талаплары ерине етирмели.
6. Худай догамызы диңләр ялы, хайсы ваҗып талабы ерине етирмели ве нәдип?
6 Илкинҗи талап — йүрекден иман этмели (Маркус 11:24). Павлус ресул шейле язды: «Иман этмезден Худай тарапындан халанмак мүмкин дәлдир. Худая якынлашан Онуң барлыгына, Өзүни агтарянлары сылаглаҗакдыгына иман этмелидир» (Еврейлер 11:6). Йүрекден иман этмек үчин, Худайың бардыгына ынанмак, догамызы эшидйәндигини хем-де җогап берйәндигини билмек етерлик дәл. Иман иш йүзүнде гөркезилйәр. Хер гүнки эдйән ишлеримиз иман эдйәндигимизи гөркезмели (Якуп 2:26).
7. а) Ехова нәме үчин хормат билен дога этмели? б) Худая нәдип пес гөвүнли ве ак йүрекден дога этмели?
7 Шейле-де Ехова пес гөвүнли ве ак йүрекден дога этмели. Эйсем, биз Худай билен пес гөвүнли гүрлешмели дәлми? Хачан-да адамлар президенте йүз тутанда, онуң ёкары везипесине гарап, сылаг-хормат билен гүрлешйәрлер. Онда биз Ехова Худая нәхили йүзленмели! (Зебур 138:6). Чүнки ол «хер зады башарян Худай» (Барлык 17:1). Биз дога эденимизде, Худайың өңүнде тутян орнумызы билип, пес гөвүнли болмалы. Шейле этсек, догалары ят туман, шол бир сөзлери гайталаман, ак йүрекден дога эдерис (Матта 6:7, 8).
8. Нәдип догаларымыза гөрә херекет этмели?
8 Мундан башга-да Худай бизи диңләр ялы, догаларымыза гөрә херекет этмели. Мунуң үчин гүйҗүмизи гайгырмаҗакдыгымыза Ехова ынаняр. Меселем, биз: «Гүнделик чөрегимизи бизе шу гүн бер» дийип дога этсек, ак йүрекден ве җан эдип ишлемели (Матта 6:11; 2 Селаниклилер 3:10). Эгер тен эҗизликлеримизе гаршы гөрешмек үчин дога этсек, тен хөвеслеринден гача дурмалы (Колоселилер 3:5). Худая догры дога этмегимиз үчин ене нәме билмели?
ДОГА БАРАДА ЕНЕ НӘМЕ БИЛМЕЛИ?
9. Биз киме дога этмели ве ким аркалы?
9 Биз киме дога этмели? Иса шәгиртлерине «гөклердәки Атамыза» дога этмеги өвретди (Матта 6:9). Шонуң үчин биз диңе Ехова Худая дога этмели. Эмма Ехова бизиң ялңыз Оглы Иса Месихиң тутян везипесине дүшүнип, хормат гоймагымызы ислейәр. 5-нҗи бапдан билшимиз ялы, Иса бизи гүнәниң ве өлүмиң гулчулыгындан азат этмек үчин ере гелди (Яхя 3:16; Римлилер 5:12). Ол Баш руханы ве Казы белленди (Яхя 5:22; Еврейлер 6:20). Ине, нәме үчин Мукаддес Язгылар Иса Месих аркалы дога этмеги өвредйәр. Иса: «Мен ёл хакыкат ве яшайышдырын; Менсиз хич ким Ата барып билмез» дийди (Яхя 14:6). Догаларымыз эшидилер ялы, диңе Ехова дога этмели ве Иса Месих аркалы йүзленмели.
10. Дога эденимизде нәме үчин белли бир ягдайда я-да белли бир ерде дурмак хөкман дәл?
10 Дога эденимизде белли бир ягдайда я-да белли бир ерде дурмак хөкманмы? Ёк. Ехова муны талап этмейәр. Мукаддес Язгыларда отуран ериңде, дик дуруп, башыңы эгип я-да дыза чөкүп дога этсе боляндыгы айдыляр (1 Тарыхлар 17:16; Нехемя 8:6; Маркус 11:25; Ресулларың ишлери 9:40). Иң эсасы зат адамлара гөрүнҗек болуп белли бир ерде дәл-де, йүрекден дога этмели. Биз ниреде болсак-да, нәме этсек-де хатда ховп абанса-да ичимизден дога эдип билйәрис. Дога эденимизде адамлар гөрмесе-де, Ехова эшидйәр (Нехемя 2:1—6).
11. Нәме барада дога этмели?
11 Нәме барада дога этмели? Мукаддес Язгыларда «Онуң [Ехованың] ислегине гөрә бир зат дилесек, Ол дилегимизи эшидер» дийилйәр (1 Яхя 5:14). Диймек, Худайың ислегине лайык гелйән зат барада дога этмели. Бизи биынҗалык эдйән затлар барадакы догамыз, онуң ислегине лайык гелйәрмикә? Элбетде, Ехова дога этмек, якын достуң билен гүрлешен ялыдыр. Дога эденимизде «йүрегимизи Оңа дөкүп» билерис (Зебур 62:8). Догры херекет эдер ялы, Худайдан мукаддес рух дилемели (Лука 11:13). Шейле-де меселәни пайхаслы чөзер ялы Еховадан гөркезме, кынчылыгы еңер ялы голдав дилемели (Якуп 1:5). Эгер гүнә этсек, Иса Месихиң төлеги эсасында гүнәлеримизиң өтүлмеги барада дога этмели (Эфеслилер 1:3, 7, 8). Йөне диңе өзүмизи биынҗалык эдйән зат барада дога этмән, якынларымыз ве имандашларымыз барада-да дога этмели (Ресулларың ишлери 12:6; Колоселилер 4:12).
12. Илки билен, биз нәме барада дога этмели?
12 Илки билен, Ехова Худая дегишли затлар барада дога этмели. Худая йүрекден өвги айтмага ве онуң ягшылыклары үчин миннетдарлык билдирмәге себәп көп (1 Тарыхлар 29:10—13). Иса Матта 6:9—13-нҗи аятлардакы нусгалык догасында, Худайың адының мукаддес болмагы, Худайың Патышалыгының гелмеги ве ислегиниң гөкде болшы ялы, ерде-де амала ашмагы барада дилег этмеги өвретди. Диңе шу ваҗып дилеглерден соң, өзүмизе герек затлары дилемелидигини айтды. Биз нусгалык дога гөрә дога этсек, диңе өз аладамызы этмейәндигимизи гөркезерис.
13. Худая яраян доганың довамлылыгы барада Мукаддес Язгылар нәме диййәр?
13 Эдйән догамызың довамлылыгы нәхили болмалы? Мукаддес Язгыларда екеликде я-да көпчүлик болуп эдилйән доганың довамлылыгы барада айдылмаяр. Мысал үчин, догалар нахар иймезден өң гысга, йүрегимизи дөкенимизде болса узын болуп билер (1 Патышалар 1:12, 15). Эмма Иса гөз үчин узын-узын дога эдйән, өз-өзүнден гөвни хош адамлары язгарды (Лука 20:46, 47). Шейле догалары Ехова халамаяр. Оңа йүрекден эдилен дога яраяр. Гөршүмиз ялы, Худая яраян догаларың довамлылыгы бизиң зерурлыкларымыза ве ягдайымыза баглы.
14. «Дынгысыз» дога этмек нәме ве ол нәдип теселли берйәр?
14 Нәче гезек дога этмели? Мукаддес Язгыларда «хемише» ве «дынгысыз» дога эдиң дийилйәр (Лука 18:1; Римлилер 12:12; 1 Селаниклилер 5:17). Бу узынлы гүн дога этмеги аңлатмаяр. Мукаддес Язгылар Ехованың эдйән ягшылыгы үчин миннетдарлык билдирип, ондан гөркезме билен голдав диләп, өвран-өвран дога этмәге хөвеслендирйәр. Ехованың нәче гезек ве нәче вагт дога этмегимизи чәклендирмейәндиги теселли берйәр. Дога этмегиң гадырыны билсек, гөкдәки Атамыз билен гүрлешмәге хемише вагт тапарыс.
15. Еке өзүң дога эдениңден соң я-да көпчүликлейин эдилен догадан соң нәме үчин «омын» диймели?
15 Нәме үчин догадан соң «омын» диймели? «Омын» диен сөз «догры» я-да «гой, шейле болсун» диймеги аңладяр. Гадымы дөвүрдәки Худайың гуллукчылары догаларының ахырында «омын» диййәрдилер (1 Тарыхлар 16:36; Зебур 41:13). Еке өзүң дога эдениңден соң «омын» дийсең, айдан сөзлериңи йүрекден айдандыгыңы гөркезйәң. Көпчүликлейин эдилен догадан соң дашымыздан я-да ичимизден «омын» дийсек, айдылан сөзлер билен ылалашяндыгымызы гөркезйәрис (1 Коринтослылар 14:16).
ХУДАЙ ДОГАЛАРЫМЫЗА НӘДИП ҖОГАП БЕРЙӘР?
16. Дога эденимизде нәмә ынанмалы?
16 Ехова догаларымыза җогап берйәрмикә? Элбетде! Биз «догалары эшидйән» Ехованың миллионларча адамларың йүрекден эдйән догасына җогап берйәндигине долы ынанып билерис (Зебур 65:2). Ол догалара дүрли ёл билен җогап берйәр.
17. Ехова догаларымыза нәме үчин перишделер ве ердәки гуллукчылары аркалы җогап берйәр дийсе болар?
17 Ехова догалара перишделер ве ердәки гуллукчылары аркалы җогап берйәр (Еврейлер 1:13, 14). Адамлар Мукаддес Язгылара дүшүнмек үчин Худайдан көмек соранда, көпленч Ехованың гуллукчыларына душ гелйәрдилер. Шейле вакалар Патышалык барадакы вагыз ишине перишделериң гатнашяндыгыны гөркезйәр (Ылхам 14:6). Ехова бизиң догамыза имандашларымызың көмеги аркалы хем җогап берйәр (Сүлейманың тымсаллары 12:25; Якуп 2:16).
18. Ехова догаларымыза мукаддес рух хем-де Сөзи аркалы нәдип җогап берйәр?
18 Мундан башга-да, Ехова Худай догаларымыза мукаддес рух хем-де Сөзи аркалы җогап берйәр. Ол, сынагларда берк дурар ялы көмек соранымызда, мукаддес рух аркалы герекли гөркезме ве гүйч берйәр (2 Коринтослылар 4:7). Көпленч догаларымыза Худайың Сөзүнден җогап тапып билерис. Ондакы принциплер пайхаслы нетиҗә гелмәге көмек эдйәр. Герекли аятлары Мукаддес Язгылардан шахсы окув геченимизде ве месихчилериң эдебиятындан тапарыс. Шейле-де Худайың Сөзүнден герекли маслахатлары месихчилериң йыгнагында хем-де йыгнагың аладасыны эдйән яшулулардан эшидип билерис (Галатялылар 6:1).
19. Догаларымыз җогапсыз галян ялы гөрүнсе, нәмәни унутмалы дәл?
19 Эгер догаларымыз җогапсыз галян ялы гөрүнсе, Ехованың җогап берип билмейәндигини аңлатмаяр. Ехова догаларымыза өз ислегине гөрә ве өз вагтында җогап берйәндигини унутмалы дәл. Ол бизе нәме герекдигини ве нәдип көмек этмелидигини говы билйәр. Көпленч ол бизе дилемәге, агтармага ве какмага мүмкинчилик берйәр (Лука 11:5—10). Шейле этсек, йүрекден иман эдйәндигимизи ве дилейән задымызың ваҗыпдыгыны гөркезерис. Кәте Ехова догамыза бизиң ислейшимиз ялы җогап бермейәр. Меселем, биз сынага дүшсек, Ехова кынчылыкдан дындырман, дөз гелер ялы гүйч бермеги мүмкин (Филипилилер 4:13).
20. Нәме үчин дога этмегиң гадырыны билмели?
20 Әлем-җаханың Ярадыҗысы хакыкатда чагырянларың әхлисине якындыгына биз нәхили шат! (Зебур 145:18, ТД). Гелиң, дога этмегиң хемише гадырыны билелиң. Шейле этсек, догалары эшидйән Ехова өңкүнденем хас якынлашарыс.
МУКАДДЕС ЯЗГЫЛАР НӘМЕ ӨВРЕДЙӘР?
▪ Ехова якынлашмак үчин оңа дога этмели (Якуп 4:8).
▪ Худай догаларымызы эшидер ялы, иман этмели, пес гөвүнли болуп, ак йүрекден дога этмели (Маркус 11:24).
▪ Диңе Ехова дога этмели ве онуң Оглы аркалы йүзленмели (Матта 6:9; Яхя 14:6).
▪ Ехова догаларымызы эшидйәр ве перишделер, ердәки гуллукчылары, мукаддес рух хем-де Сөзи аркалы җогап берйәр (Зебур 65:2).
[Макаланың сораглары]
[165 Сахыпадакы сурат]
«Гөклери ве ери ярадан» Ехова бизиң догаларымызы эшитмәге тайын
[171 Сахыпадакы сурат
Сен ниреде болсаң-да, Худай догаларыңы эшидер
[172, 173-нҗи сахыпадакы суратлар]
Ехова догаларымыза имандашларымызың көмеги аркалы җогап берйәр
