Әр-аял дурмуш гуранда, тәзе машгала дөрейәр. Сиз эне-атаңызы хемише сөйүп, олара хормат гойсаңыз-да, инди сизиң үчин иң якын адам янёлдашыңыз боляр. Кәбир гарындашларыңыза мунуң билен разылашмак кын болуп билер. Эмма Мукаддес Язгыларың принциплери сизе пайхаслы болуп, тәзе машгалаңызы беркитмек үчин тагалла этмәге ве доган-гарындашларыңыз билен агзыбир болмага көмек эдер.

МУКАДДЕС ЯЗГЫЛАРДА НӘМЕ ДИЙИЛЙӘР: «Атаңы, энеңи сыла» (Эфеслилер 6:2). Сиз нәче яшыңызда болсаңызда, эне-атаңызы хемише сыламалы ве хормат гоймалы. Сиз янёлдашыңызың бириниң гызы я-да оглудыгына дүшүнмели ве онуң хем эне-атасына хормат гоймалы. Худайың Сөзүнде: «Сөйги гөрипчилик эдйән дәлдир» дийилйәр, шол себәпли сиз янёлдашыңызың эне-атасы билен гатнашыгы машгалаңыза зыян етирер өйтмәң (1 Коринтослылар 13:4; Галатялылар 5:26).

МАСЛАХАТ

• «Сениң машгалаң мени сыланок» я-да «Сениң эҗеңе яранып билмән гечдим!» диен ялы сөзлери айдып, янёлдашыңызың гөвнүне дегмәң

• Әхли затда янёлдашыңызың гарайшыны гөз өңүнде тутуң

МУКАДДЕС ЯЗГЫЛАРДА НӘМЕ ДИЙИЛЙӘР: «Ынсан энесини ве атасыны ташлап, аялына япышар ве бир беден боларлар» (Гелип чыкыш 2:24). Сиз дурмуш гурсаңыз-да, эне-атаңыз сизиң аладаңызы этмәге өзлерини борчлы хасаплап, машгалаңыза өңкүденем көп гошулмак ислемеклери мүмкин.

Элбетде, олар билен нәдип гатнашмалыдыгыны өзүңиз чөзйәрсиңиз. Сиз олара бу барада гөдеклик билен дәл-де, сөйги ве юмшаклык билен ачык айтмалы (Сүлейманың тымсаллары 15:1). Песгөвүнлилик, юмшаклык, сабыр ялы хәсиетлер доган-гарындашларыңыз билен якын гатнашыкда болмага ве «бир-бириңизи сөймәге» көмек эдер (Эфеслилер 4:2).

МАСЛАХАТ

• Эгер сиз доган-гарындашларыңызың машгалаңыза гошуляндыгына биынҗалык болян болсаңыз, янёлдашыңыз билен аркайынлыкда шол барада геплешиң

• Кәбир ягдайларда нәме этҗекдигиңизи ве өзүңизи нәхили алып барҗакдыгыңызы өңүнден чөзүң