Шамувел кичилигинден чадырда, ягны адамларың Ехова барада өвренмәге барян еринде яшап, гуллук эдйәрди. Сен Шамувелиң чадыра нәдип гелендигини билйәрмиң? Гел, илки билен Шамувелиң эҗеси Ханна барада билели.

Ханнаның көп вагтлап чагасы болмандыр, йөне ол чагасының болмагыны өрән исләпдир. Шол себәпли ол Ехова көмек эдер ялы дога аркалы ялбаряр. Эгер ол оглы болса, чадырда яшамага ве ишлемәге берҗекдигини Худая сөз берйәр. Ехова онуң догасыны эшидйәр ве бир огул берйәр. Ханна онуң адына Шамувел дакяр. Ханна Ехова сөз берендиги үчин оглы үч-дөрт яшындака, оны Худая гуллук эдер ялы чадыра әкидйәр.

Эли чадырда баш руханы болуп гуллук эдйәрди, ягны ол адамлара Ехова барада билмәге көмек эдйәрди. Онуң ики оглы хем шол ерде ишлейәрди. Ядыңда болса, адамлар чадырда Худай барада өвренйәрдилер ве говы затлар барада ойланярдылар. Эмма Элиниң огуллары эрбет ишлери эдйәрди. Шамувел оларың эдйән ишлерини гөрйәрди. Сениң пикириңче, Шамувел хем Элиниң огуллары ялы эрбет ишлери этдими? ~ Ёк, ол эне-атасының өвредиши ялы хемише Худая яраян ишлери эдйәрди.

Сениң пикириңче, Эли огулларына нәме этмелиди? ~ Эли олара темми бермелиди. Ол огулларына Худайың өйүнде ишлемәге ругсат бермели дәлди. Эмма Эли бейле этмеди, шол себәпли Ехованың оңа ве огулларына гахары гелди. Ехова олара җеза берди.

Бир гүн агшам Шамувел ятырка, кимдир бириниң: «Шамувел!» диенини эшидйәр. Ол Элиниң янына ылгап баранда, ол: «Мен сени чагырмадым» диййәр. Бу ягдай ики гезек гайталанды. Үчүнҗи гезекден соң, Эли Шамувеле: «Эгер сен ене-де сес эшитсең, шейле дий: „Ехова, айдыбер, мен сени диңлейәрин“». Шамувел онуң айдышы ялы этди. Соңра Ехова Шамувеле шейле дийди: «Элиниң огулларының эрбет ишлери эдендиклери үчин олара җеза берҗекдигими оңа айт». Сениң пикириңче,  Шамувеле бу хабары Элә айтмак аңсат болдумыка? ~ Ёк, аңсат болмады. Эмма Шамувел горкса-да, Ехованың айдышы ялы этди. Ехова айдышы ялы Элиниң огулларыны өлдүрди, соңра Эли хем өлди.

Шамувел бизе говы гөрелде галдырды. Ол хатда башга адамларың эрбет ишлери эдйәндигини гөрсе-де, Худая яраян ишлери этди. Сен шейле ягдайда нәме эдердиң? Сен хем Шамувел ялы Худая яраян ишлери эдердиңми? Эгер сен шейтсең, Ехованы ве эне-атаңы бегендирерсиң.