Ýehowanyň Şaýatlary Isa pygamberiň we onuň resullarynyň göreldesine eýermäge jan edýärler. Şu makalada ynanýan zatlarymyz barada gysgaça gürrüň berilýär.

1.   Hudaý. Biz ähli zada güýji ýetýän we ýeke-täk Ýaradyjymyz Ýehowa Hudaýa sežde edýäris (Zebur 83:18; Ylham 4:11). Ol Ybraýym, Musa we Isa pygamberiň gulluk eden Hudaýy (2 Musa 3:6; 32:11; Ýahýa 20:17).

2.   Mukaddes Kitap. Biz Mukaddes Kitabyň Hudaý tarapyndan adamlara iberilen kitapdygyna ynanýarys (Ýahýa 17:17; 2 Timoteos 3:16). Biziň öwrenýän zatlarymyz Mukaddes Kitabyň 66 kitabyna, ýagny «Köne we Täze ähte» esaslanýar. Jeýson Deýwid Bedun atly alym Ýehowanyň Şaýatlarynyň «ynanýan zatlarynyň we edýän işleriniň asyl nusgadaky Mukaddes Kitabyň taglymatlaryna esaslanýandygyny we ol ýerde nämäniň tapylmalydygyny anyklamazdan öň» aýdýar a

    Biz Mukaddes Kitaby tutuşlygyna kabul edýäris, ýöne biz fundamentalist däl. Biz kitabyň käbir bölekleriniň göçme manyda ýazylandygyna düşünýäris (Ylham 1:1).

3.   Isa pygamber. Biz Isa Mesihiň öwreden zatlaryna gulak asyp, göreldesine eýerýäris we ony Halasgärimiz, Hudaýyň ogly hökmünde kabul edýäris (Matta 20:28; Resullar 5:31). Şonuň üçinem bizi Isanyň yzyna eýerýän mesihçiler hökmünde tanaýarlar (Resullar 11:26). Şeýle-de biz Isanyň Hudaý däldigine, Üç ýüzli taňry (Troisa) baradaky taglymatyň bolsa Mukaddes Kitaba esaslanmaýandygyna ynanýarys (Ýahýa 14:28).

4.   Hudaýyň Patyşalygy. Bu adamlaryň ýüregindäki zat däl-de, hakyky hökümet. Ol ynsan hökümetleriniň ählisini ýok edip, Hudaýyň ýer babatdaky niýetini amala aşyrar (Danyýar 2:44; Matta 6:9, 10). Tizden bu zatlar Hudaýyň Patyşalygy arkaly amala aşar. Sebäbi Mukaddes Kitapda biziň «soňky günlerde» ýaşaýandygymyz barada aýdylýar (2 Timoteos 3:1—5; Matta 24:3—14).

    Isa pygamber gökdäki Patyşalygyň Patyşasy. Ol 1914-nji ýylda höküm sürüp başlady (Ylham 11:15).

5.   Gutulyş. Bizi günäden we ölümden diňe Isa pygamberiň töleg gurbany azat edip biler (Matta 20:28; Resullar 4:12). Biz diňe bir Isa pygambere iman etmän, eýsem durmuşymyzy üýtgetsek we suwa çümdürilsek, töleg gurbany köp peýda getirer (Matta 28:19, 20; Ýahýa 3:16; Resullar 3:19, 20). Biz edýän işlerimiz bilen imanymyzyň berkdigini görkezýäris (Ýakup 2:24, 26). Emma gutulyşy diňe «Hudaýyň merhemeti» arkaly gazanyp bolýar (Galatýalylar 2:16, 21).

6.   Gök. Ýehowa Hudaý, Isa Mesih we ençeme wepaly perişdeler gökde ýaşaýarlar b (Zebur 103:19—21; Resullar 7:55). Ýer ýüzündäki sanlyja 144 müň adam bolsa, Isa pygamber bilen gökdäki Patyşalykda höküm sürmek üçin direler (Danyýar 7:27; 2 Timoteos 2:12; Ylham 5:9, 10; 14:1, 3).

7.   Ýer. Hudaý ýeri adamlaryň ebedi ýaşamagy üçin ýaratdy (Zebur 104:5; 115:16; Nesihat 1:4). Ol özüne gulak asýan adamlara ýer ýüzündäki jennetde kämil saglyk we ebedi ýaşaýyş sowgat berer (Zebur 37:11, 34).

8.   Erbetlik we horluk. Perişdeleriň biri Hudaýa garşy çykanda, erbetlikler we horluklar başlandy (Ýahýa 8:44). «Şeýtan» we «Iblis» diýip atlandyrylan bu perişde, özüniň turuzan pitnesine ilkinji ynsan maşgalasyny goşup, onuň nesline betbagtçylyk getirdi (1 Musa 3:1—6; Rimliler 5:12). Şeýtanyň orta atan jedelli meselesini çözmek üçin, Hudaý erbetliklere we horluklara ýol berse-de, bu hemişelik dowam etmez.

9.   Ölüm. Adam ölensoň ýaşamagyny bes edýär (Zebur 146:4; Nesihat 9:5, 10). Hudaý olary dowzah odunda ýakyp, ejir çekdirmeýär.

    Hudaý milliardlarça ölen adamlary direlder (Resullar 24:15). Direlen adamlar Hudaý barada bilim almakdan boýun gaçyrsalar, ebedi ýaşaýşa bolan umydyny hemişelik ýitirerler (Ylham 20:5).

10.   Maşgala. Biz maşgala gatnaşyklary babatda Hudaýyň başdaky beren kada-kanunlaryna eýerip ýaşaýarys. Är-aýal diňe zyna edilen ýagdaýynda nikany bozup bilýär (Matta 19:4—9). Biz Mukaddes Kitapdaky peýdaly maslahatlaryň maşgalany bagtly etmäge kömek edýändigine ynanýarys (Efesliler 5:22—6:1).

11.   Hudaýa edýän seždämiz. Ýehowanyň Şaýatlary haça ýa-da başga şekillere sežde etmeýärler (5 Musa 4:15—19; 1 Ýahýa 5:21). Hudaýa sežde edýän adamlar şu zatlary edýärler:

    •   Hudaýa doga etmek (Filipililer 4:6).

    •   Mukaddes Kitaby okamak we öwrenmek (Zebur 1:1—3).

    •   Mukaddes Kitapdan okan zatlaryň barada oýlanmak (Zebur 77:12).

    •   Bilelikde doga etmek, Mukaddes Kitaby öwrenmek, aýdym aýtmak, imanymyz hakda gürrüň bermek, imandaşlarymyzy we başgalary ruhlandyrmak üçin duşuşyklara barmak (Koloslylar 3:16; Ýewreýler 10:23—25).

    •   «Patyşalyk baradaky hoş habary» wagyz etmek (Matta 24:14).

    •   Mätäçlere kömek etmek (Ýakup 2:14—17).

    •   Patyşalyk zallarynyň we beýleki ýerleriň gurluşyk hem-de bejeriş işlerine gatnaşmak (Zebur 127:1).

    •   Tebigy betbagtçylykda ejir çekenlere kömek etmek (Resullar 11:27—30).

12.   Guramamyz. Her bir ýygnaga ýaşulular maslahaty ýolbaşçylyk edýär. Emma olar özlerini ýokary tutmaýarlar we edýän işleri üçin pul almaýarlar (Matta 10:8; 23:8). Biz zekat bermegi talap etmeýäris ýa-da duşuşyklarda pul ýygnamaýarys (2 Korinfliler 9:7). Biziň edýän işlerimiziň ählisi meýletin berilýän pul sadakalarynyň hasabyna ödelýär.

     Ruhy taýdan ýetişen mesihçilerden ybarat bolan kiçijik topar, ýagny Ýolbaşçylyk maslahaty baş edaramyzda gulluk edip, bütin dünýädäki Ýehowanyň Şaýatlaryna görkezme berýär (Matta 24:45).

13.   Agzybirligimiz. Bütin dünýädäki Ýehowanyň Şaýatlarynyň ählisiniň ynanýan zatlary birmeňzeş (1 Korinfliler 1:10). Biz adamyň abraýy, milleti we jynsy sebäpli aramyzda bölünişigiň bolmagyna ýol bermeýäris (Resullar 10:34, 35; Ýakup 2:4). Emma agzybirlik bize saýlamaga mümkinçilik berýär. Ýehowanyň Şaýatlarynyň her biri Mukaddes Kitap esasynda terbiýelenen ynsabyna görä karara gelýär (Rimliler 14:1—4; Ýewreýler 5:14).

14.   Özümizi alyp barşymyz. Biz edýän işlerimizde doganlyk söýgini görkezmäge jan edýäris (Ýahýa 13:34, 35). Şeýle-de biz Hudaýa ýaramaýan işleri etmekden, gany nädogry ulanmakdan gaça durýarys. Sebäbi bu Mukaddes Kitapdaky prinsiplerine garşy gelýär (Resullar 15:28, 29; Galatýalylar 5:19—21). Biz uruşlara gatnaşmaýarys we parahatlygy saklaýarys (Matta 5:9; Işaýa 2:4). Eger Hudaýyň kanunyna garşy gelmese, ýaşaýan ýerimiziň kanunyny berjaý edip, hökümetlere tabyn bolýarys (Matta 22:21; Resullar 5:29).

15.   Adamlar bilen gatnaşygymyz. Isa pygamber: «Ýakynyňy özüňi söýşüň ýaly söý» diýdi. Şeýle-de ol öz yzyna eýerýänleriň «dünýäden däldigini» aýtdy (Matta 22:39; Ýahýa 17:16). Biz «hemme adamlara... ýagşylyk etmäge» çalyşýarys, ýöne syýasy dawalarda bitaraplygy saklap, beýleki dinler bilen aragatnaşyk saklamakdan gaça durýarys (Galatýalylar 6:10; 2 Korinfliler 6:14). Ýöne biz bu meselede beýleki adamlaryňam gelen kararyna hormat goýýarys (Rimliler 14:12).

 Eger sizde Ýehowanyň Şaýatlarynyň ynanýan zatlary barada ýene-de sorag bar bolsa, onda siz web-saýtymyzdan, filiallarymyzyň birinden, ýaşaýan ýeriňiziň golaýyndaky Ýygnak jaýyndan köpräk maglumat tapyp bilersiňiz ýa-da ýaşaýan ýeriňizdäki Ýehowanyň Şaýatlary bilen gürrüňdeş bolup bilersiňiz.