Mariupol şäherinde bomba ýarylanda, iki sany uýamyzyň aradan çykandygy hakda gynançly habar geldi. Urşuň gazaply dowam edýändigi üçin 2 000-den gowrak dogan-uýa şäherden çykyp bilenok. Ýöne ýaňy-ýakynda 150-den gowrak Ýehowanyň Şaýady şäherden çykdy. Ýolda atyşyk bolandygy sebäpli Betbagtçylykda kömek edýän komitet (BKEK) bilen işleşýän doganlar Mariupol şäherindäki dogan-uýalara derman, iýmit, suw we başga-da gerek-ýarak zatlary ýetirip bilmedi. Ýygnak jaýynyň we Kongresler köşgüniň golaýyna bomba düşdi. Şol wagt Ýygnak jaýynyň ýerzemininde 200-e golaý dogan-uýa bardy. Hudaýa şükür, olaryň hijisine zyýan ýetmedi. Ýöne ulaglaryndan nam-nyşan galmady. Şonuň üçin olara şäherden çykmak hasam kyn boldy.

Mariupol şäherinden maşgalasy bilen gaçan ýaşuly dogan (aşakdaky suratda) şeýle gürrüň berýär: «Biz jaýsyz, işsiz galdyk, dostlarymyz bilen habarlaşyp bilmedik. Bir günde baryp bolýan ýere alty günde bardyk. Şäherden çykyp barýarkak, ýolboýy ýarylmadyk bombalaryň tüsseläp durandygyny gördük. Barmaly ýerimize barýançak, dogan-uýalar iýer-içer ýaly zat we gijesine ýatar ýaly ýer tapyp berdiler. Biz gökdäki Atamyz Ýehowanyň aladamyzy edýändigini gözümiz bilen gördük. Indi biz Ýehowa has köp bil baglaýarys».

Ukrainadaky dogan-uýalar Ýewropanyň dürli ýurtlaryna gaçdylar. Meselem, ýygnak hyzmatçysy bolup gulluk edýän dogan aýaly we 7, 11, 16 ýaşlaryndaky çagalary bilen Portugaliýa gaçdy. Şol ýerde onuň dogan-garyndaşlary bardy, olar Ýehowanyň Şaýadydy. Dogan maşgalasy bilen serhetde 11 sagat durdy, soňam 4 gün ýol (4 000 km) söküp, dogan-garyndaşlarynyňka bardy. Olar ýygnak duşuşygynyň öň ýany bardylar, portugal dilini bilmeseler-de, ýadaw bolsalar-da ýygnaga gatnaşdylar. Ýygnakdakylar olaryň şol ýagdaýda-da şatlygyny ýitirmeýändigini görüp ruhlandylar.

Bir uýamyz bolsa maşgalasy bilen Germaniýa gaçyp gitdi. Ol şeýle gürrüň berýär: «Mukaddes Kitaby okamak, gowy zatlar hakda oýlanmak, täze dünýäni göz öňüne getirmek güýç berdi, imanymyzy berkitdi... Ýehowanyň bizi eliniň aýasynda göterýändigini, doganlar arkaly kömek edýändigini gördük. Ukrainada-da, Wengriýada-da we Germaniýada-da dogan-uýalar bizi güler ýüz bilen garşy alyp, kömegini gaýgyrmadylar».

Dogrudanam, Ýehowa Ukrainadaky dogan-uýalaryň aladasyny edýär (Zebur 145:14).

Ukrainanyň käbir welaýatyndaky, şäherlerindäki dogan-uýalar bilen habarlaşyp bolanok. Ýöne ýerli doganlar 2022-nji ýylyň 16-njy martyna çenli şu maglumatlary ýetirdiler:

• 4 wagyzçy aradan çykdy

• 19 wagyzça şikes ýetdi

• 29 789 sany imandaşymyz başga şähere gaçmaly boldy

• 45 sany dogan-uýanyň öýi tutuşlygyna ýumruldy

• 84 imandaşymyzyň öýüne uly zyýan ýetdi

• 366 imandaşymyzyň öýüne sähel zyýan ýetdi

• 16 sany Ýygnak jaýyna zyýan ýetdi

• Ukrainada 27 sany Betbagtçylykda kömek edýän komitet döredildi

• BKEK 20 981 wagyzçyny howpsuz ýere göçürdi

• 11 973 sany imandaşymyz başga ýurda gaçdy, baran ýerindäki dogan-uýalar olara gerek zadyny ýetirdi