1, 2. Biz şu makalada näme hakda gürrüň ederis?

ADAMYŇ ömri gysga we «jebir-jepadan doludyr» (Eýp. 14:1). Şol sebäpli käte ruhdan düşenimizde geň galmaýarys. Gadymy döwürde ýaşan hudaýhon adamlar hem göwnüçökgünlige düşüpdirler. Hatda olar durmuşdan doýup, käbiriniň ölesi gelipdir (1 Pat. 19:2—4; Eýp. 3:1—3, 11; 7:15, 16). Emma olar Ýehowa bil bagladylar. Ýehowa hem olara hemişe göwünlik berdi we goldady. Olaryň galdyran göreldesi Mukaddes Kitaba ýazylan. Sebäbi Ýehowa bize-de göwünlik we öwüt-nesihat bermek isleýär (Rim. 15:4).

² Biz şu makalada kynçylyklara döz gelen Ýakubyň ogly Ýusup, dul galan Nagomy we gelni Rut, 73-nji Zebury ýazan lewi hem-de Petrus resul hakda gürrüň ederis. Ýehowa olara nädip kömek etdi? Biz olardan nädip görelde alyp bileris? Şu soraglaryň jogabyny bilsek, onda Ýehowanyň «ýüregi ýaraly adama ýakyndygyna» we göwnüçökgün adamlary halas edýändigine göz ýetireris (Zeb. 34:18).

3, 4. Ýaş wagty Ýusuba nähili adalatsyzlyk edildi?

³ Ýusup 17 ýaşyndaka, Hudaý tarapyn iki düýş görýär. Ol düýşünde atly-abraýly adam bolýar we ähli dogan-garyndaşlary oňa hormat goýýar (1 Mus. 37:5—10). Ol düýşüni agalaryna gürrüň berende, durmuşy düýpgöter özgerýär. Agalary Ýusuby şeýle bir ýigrenýärler welin, ony gul edip satýarlar. Şeýdip, Ýusup ýat ýurda, Müsüre barýar we faraonyň köşk emeldary Potifaryň öýünde hyzmatkär bolýar (1 Mus. 37:21—28). Öň kakasynyň göz guwanjy bolan ýigit  ýalan taňrylara sežde edýän adamyň gapysynda gul bolýar (1 Mus. 39:1).

⁴ Şondan soňra Ýusubyň gözi kynçylykdan açylmaýar. Potifaryň aýaly: «Ýusup meni zorlajak boldy» diýip, oňa töhmet atýar. Gahardan ýaňa gany depesine uran Potifar hiç zadyň anygyna ýetmän, Ýusubyň el-aýagyny demir gandala salyp, zyndana taşlaýar (1 Mus. 39:14—20; Zeb. 105:17, 18). Ýalan töhmet atylyp, garaňky türmede oturan ýigidiň halyny göz öňüne getiriň. Üsti-üstüne-de, bulary eşiden adamlar Ýusubyň Hudaýy Ýehowa dil ýetirmekleri ahmaldy. Elbetde, şeýle zatlar Ýusubyň derdine dert goşandyr!

5. Ýusuba göwnüçökgünlige düşmezlige näme kömek etdi?

⁵ Ýusup gul bolanda-da, türmede oturanda-da, islän zadyny edip ýa-da islän ýerine gidip bilmeýärdi. Ýusuba göwnüçökgünlige düşmezlige näme kömek etdi? Ol başarmajak zadyny däl-de, özüne tabşyrylan işleri etdi. Iň wajyby bolsa, ol Ýehowany Arkadagy hasaplady we ýürekden bil baglady. Ýehowa hem ony hemişe goldady we bereket berdi (1 Mus. 39:21—23).

6. Ýusuba näme göwünlik berdi?

⁶ Belki-de, Ýusuba şol gören iki düýşi güýç-kuwwat berendir. Ol türmede gören düýşlerini ýatlaýar we maşgalasy bilen görüşjekdigine, gowy günleriň boljakdygyna umyt edýär. Onuň umyt-arzuwlary amala aşyp başlaýar. Ýusup 37 ýaşlaryndaka, onuň gören pygamberlik düýşleri ýerine ýetýär (1 Mus. 37:7, 9, 10; 42:6, 9).

7. 1 Petrus 5:10-a görä, bize synaglara döz gelmäge näme kömek edýär?

⁷ Biziň üçin sapak. Ýusup bilen bolan wakadan görnüşi ýaly, biz hem zalym we adalatsyz adamlaryň arasynda ýaşaýarys. Hatda dogan-uýalar hem göwnümize degip, ýüregimize ýara salyp bilerler. Emma  biz Ýehowany Galamyz, Arkadygymyz, Penamyz hasaplasak, göwnüçökgünlige düşmeris we Ýehowa wepaly bolarys (Zeb. 62:6, 7; 1 Petrus 5:10-y okaň). Ýadyňyzda bolsa, Ýusup 17 ýaşlarynda pygamberlik düýşlerini görýär. Ýehowa şu günlerem ýaş oglan-gyzlara hormatly işleri tabşyrýar. Ýusup ýaly ýaş oglan-gyzlar Ýehowa iman edýärler. Olaryň käbirini türmä bassalar-da, Ýehowa wepaly galýarlar (Zeb. 110:3).

8. Nagomy bilen gelni Ruta näme bolýar?

⁸ Ýahuda ýurdunda güýçli açlyk başlanýar, Alymälik bütin maşgalasy bilen Mowap ýurduna göçýär. Soňra Alymälik aradan çykýar we aýaly Nagomy iki ogly bilen ýat ýurtda ýeke galýar. Nagomynyň ogullary Mahlon bilen Kilýon mowaply gyzlara öýlenýär. Gelinleriniň ady Orpa we Rut. On ýyl geçenden soňra Nagomynyň iki ogly-da aradan çykýar, olardan zürýat galmaýar (Rut 1:1—5). Ajy hasratdan ýaňa gözleriniň nury sönen üç aýaly göz öňüne getiriň. Ýaş gelinler Orpa bilen Rut ýene-de maşgala gurup, öýli-işikli bolup bilerdiler. Emma Nagomy garran çagynda gün-güzeranyny nädip görer?! Kimden pena gözlär?! Nagomy göwnüçökgünlige düşüp: «Indi maňa Nagomy diýmäň, Mara diýiň, sebäbi Gudratygüýçli maňa ajy durmuş berdi» diýdi. Ýüregi para-para bolan Nagomy dogduk mekany Beýtullahama gaýdýar, gelni Rut hem gaýynenesi bilen gaýdýar (Rut 1:7, 18—20).

9. Rut 1:16, 17, 22-nji aýatlara görä, Rut gaýynenesiniň aladasyny nädip edýär?

⁹ Nagomy agyr derdine nädip döz geldi? Gelni Rut ony öz ejesi ýaly gowy görýärdi we aladasyny edýärdi (Rut 1:16, 17, 22-nji aýatlary okaň). Rut hem özi üçin, hem gaýynenesi üçin agyr zähmet çekýärdi. Ol mellekde hoşa çöpläp gün-güzeranyny görýärdi. Şeýlelikde, asylly maşgala Rut il-günüň hormatyny gazanýar (Rut 3:11; 4:15).

10. Ýehowa Nagomy bilen Rut ýaly mätäçleriň aladasyny nädip edýärdi?

¹⁰ Ýehowa garyp we gelmişek adamlaryň aladasyny etmek üçin, ysraýyl halkyna kanun berdi. Olar hasyl ýygymynda ekiniň gyrasyny doly ormaly däldiler, ýere gaçan däneleri çöplemeli däldiler (3 Mus. 19:9, 10). Şu kanunyň esasynda Nagomy bilen Rut çörek üçin dilegçilik etmän, zähmet çekip, gün-güzeranyny görüp bilýärdiler.

11, 12. Bowaz Nagomy bilen Ruta nädip ýagşylyk etdi?

¹¹ Rut hoşa çöplemäge baý, atly-abraýly Bowazyň mellegine barýar. Ol Rutuň gaýynenesiniň aladasyny edişini eşidip begenýär we uly hormat goýýar. Soňra Bowaz Nagomy bilen gelnine hak hossar bolýar we Ruta öýlenýär (Rut 4:9—13). Şeýlelikde, Bowaz bilen Rutuň ogly bolýar we oňa Abyt diýip at dakýarlar. Dawut patyşa-da Abytyň agtygydy (Rut 4:17).

¹² Nagomy agtygyny eline alyp, şatlanyp Ýehowa alkyşlar aýdyşyny göz öňüne getiriň! Emma Nagomy bilen Ruta ýene bir şatlykly habar garaşýar. Olar täze dünýäde direlende, Abytdan Hudaýyň wada beren nesliniň, ýagny Isa Mesihiň dünýä inendigini bilerler.

13. Nagomy we Rut bilen bolan wakadan näme öwrenip bilýäris?

¹³ Biziň üçin sapak. Biz hem käte kynçylyklardan we synaglardan ýaňa el-aýagymyz ýüpsüz baglanan ýaly duýmagymyz mümkin. Belki-de, kynçylyklar hiç haçan aýrylmajak ýaly bolup görünýändir.  Şeýle ýagdaýda Ýehowa Atamyza doly bil baglamaly we dogan-uýalardan daşlaşman, jana-jan dost bolmaly. Elbetde, Ýehowa kynçylyklary derrew aýyrmaz. Meselem, ol Nagomynyň ärini we iki ogluny direltmedi, ýöne dul aýaly goldady. Ýehowa bize-de imandaşlarymyz arkaly kynçylyklarymyza döz gelmäge kömek eder (Nak. 17:17).

14. Bir lewi näme üçin göwnüçökgünlige düşýär?

¹⁴ 73-nji Zebury ýazan lewi Hudaýyň öýünde mukaddes gullugy berjaý edýärdi. Emma ol göwnüçökgünlige düşýär. Näme üçin? Ol zalym, tekepbir adamlaryň gün-günden baýap, bolelin hem eşretli durmuşda ýaşaýandygyna gözi gidýär we olara göriplik edip başlaýar (Zeb. 73:2—9, 11—14). Ol göwnüçökgünlige düşüp: «Men biderek ýere päk ýürekli bolupdyryn, elimi arassa saklapdyryn» diýýär. Lewi şu zatlar hakda gaýta-gaýta oýlanyp, tas hormatly borjundan mahrum bolupdy.

15. Zebur 73:16—19, 22—25-nji aýatlara görä, lewi göwnüçökgünligi nädip ýeňdi?

¹⁵ Zebur 73:16—19, 22—25-nji aýatlary okaň. Bir güni lewi Hudaýyň «mukaddes mekanyna» baranda, özi ýaly lewileriň Ýehowa wepaly gulluk edip ýörendigine syn edýär we özüniň düşen ýagdaýy hakda çynlakaý oýlanýar. Şonda ol özüniň akmaklyk edendigine we hakykat ýolundan sowlup, Ýehowadan daşlaşyp başlandygyna düşünýär. Şeýle-de zalym adamlaryň «typançak ýerde» durandygyna we heläk boljakdygyna göz ýetirýär. Ol ähli zada Ýehowanyň garaýşy ýaly garap, ýüregindäki göripligi köki bilen sogurýar. Soňra ol rahatlyk hem şatlyk tapyp, durmuşyndan razy bolup ýaşaýar. Ol: «Ýehowa ýanymda bolsa, başga hiç zat gerek däl» diýýär.

16. Biz lewiden näme öwrenip bilýäris?

¹⁶ Biziň üçin sapak. Baý we lezzetli durmuşda ýaşaýan adamlara gözümiz gitmeli däl. Olaryň bagtly ýaşaýşy wagtlaýyndyr, gelejegi ýokdur (Nes. 8:12, 13). Eger biz hem olaryň ýaşaýşyna höwes  edip başlasak, göwnüçökgünlige düşüp, imanymyz gowşar. Baý adamlaryň ýaşaýşyna göz gyzdyryp başlan bolsak, onda 73-nji Zebury ýazan lewi ýaly aýgytly ädim ätmeli. Ýehowanyň maslahatyna gulak asmaly we onuň islegini berjaý edýänler bilen gatnaşmaly. Eger biz Ýehowany ýürekden söýsek, bagtly bolarys we «hakyky ýaşaýyş» ýolundan sowulmarys (1 Tim. 6:19).

17. Petrus näme sebäpden göwnüçökgünlige düşdi?

¹⁷ Petrus resul garadan gaýtmaz adamdy. Ol gönümeldi we ýüregindäki dilindedi, şol sebäpli käte pikir edýän zadyny oýlanman aýdýardy. Isa hem hemişe Petrusy düzederdi. Şol sebäpli ol aýtmasyz zady aýdandygyna we etmesiz işi edendigine ökünip ýörärdi. Bir gezek Isa resullaryna özüniň gynalyp öldüriljekdigi hakda aýdanda, Petrus oňa: «Halypam... beýle zat bolmasyn» diýip garşy çykdy (Mat. 16:21—23). Bir gezek Isany tussag etmäge gelenlerinde, Petrus oýlanman çalasynlyk bilen baş ruhanynyň hyzmatkäriniň gulagyny kesdi (Ýah. 18:10, 11). Başga bir gezek bolsa, Petrus özüne çendenaşa göwni ýetip, Isa: «Hemmeler senden ýüz öwürse-de, men hiç haçan ýüz öwürmerin!» diýýär (Mat. 26:33). Petrus özüne bil baglap, men-menlik etdi. Emma ol adamlardan gorkup, Halypasyndan üç gezek ýüz öwürdi. Soňra eden işine ökünip, «möňňürip aglady» (Mat. 26:69—75). Ol Isa indi hiç haçan bagyşlamaz öýdüp, göwnüçökgünlige düşdi.

18. Isa Petrusy nädip ruhlandyrdy?

¹⁸ Emma Petrus göwnüçökgünlige düşüp, gol gowşuryp oturmady. Ol beýleki resullar bilen görüşdi we olary ruhlandyrdy (Ýah. 21:1—3; Res. 1:15, 16). Petrusa göwnüçökgünligi ýeňmäge näme kömek  etdi? Ol Isanyň ölmezinden öň aýdan şu sözlerini ýatlady: «Imanyň gowşamaz ýaly, men Alla ýalbaryp kömek soradym. Şonuň üçin dolanyp geleniňde, doganlaryň imanyny berkit». Ýehowa hem Oglunyň ýürekden eden dogasyna jogap berdi. Isa direlenden soň Petrusyň ýanyna bardy we ony ruhlandyrdy (Luka 22:32; 24:33, 34; 1 Kor. 15:5). Isanyň resullarynyň birnäçesi balyk tutmak üçin bütin gije zähmet çekdiler. Emma bir balygam tutup bilmediler, halys ýadapdylar. Şonda Isa resullaryň ýanyna geldi. Ol Petrusyň söýgüsiniň sowamandygyny bilmek üçin: «Sen meni gowy görýärmiň?» diýip sorady. Isa gowy görýän dostuny bagyşlady we köp işleri ynandy (Ýah. 21:15—17).

19. Zebur 103:13, 14-nji aýatlara görä, biz ýalňyşlyklarymyza nähili garamaly?

¹⁹ Biziň üçin sapak. Isa pygamber gökdäki Atasy Ýehowa ýaly rehimdardy, şol sebäpli Petrusy ýürekden bagyşlady. Biz hem ýalňyşlyk goýberenimizde, öz-özümizi ýazgarman, Ýehowanyň bizi bagyşlaýandygyny unutmaly däl. Şeýtan bolsa biziň öz-özümizi günäkärläp, göwnüçökgünlige düşmegimizi isleýär. Geliň, biz hem rehimdar Atamyzyň göreldesine eýerip, özümizi we göwnümize degen adamlary bagyşlamagy öwreneliň (Zebur 103:13, 14-nji aýatlary okaň).

20. Indiki makalada näme hakda gürrüň ederis?

²⁰ Şu makalada Ýusup, Nagomy, Rut, lewi we Petrus resul bilen bolan wakalardan Ýehowanyň «ýüregi ýaraly adamlara ýakyndygyny» bildik (Zeb. 34:18). Elbetde, Ýehowa bizi ähli kynçylyklardan goramaýar, ýöne döz gelmäge güýç-kuwwat berýär we imanymyzy berkidýär (1 Pet. 1:6, 7). Indiki makalada bikämillik ýa-da kynçylyklar sebäpli göwnüçökgünlige düşen hudaýhon adamlary Ýehowanyň nädip goldandygy hakda gürrüň ederis.