HÄZIR 35 ýaşlaryndaky är-aýal Çuň Kýun bilen Juli bäş ýyl mundan ozal Awstraliýanyň Sidneý şäherinde umumy pioner bolup gulluk edýärdiler. Çuň Kýun şeýle gürrüň berýär: «Biz ýarym gün işläp, amatly şertlerde ýaşaýardyk. Biziň ýaşaýan ýerimiziň howasy-da, şertleri-de diýseň gowudy. Biz dogan-garyndaşlarymyzyň we dost-ýarlarymyzyň ýanynda ýaşaýandygymyza begenýärdik». Muňa garamazdan, Çuň Kýun bilen Juli biynjalyk bolýardy. Näme üçin? Olaryň Ýehowa köpräk gulluk etmäge mümkinçilikleri bolsa-da, durmuşyny üýtgetmäge ýaýdanýardylar.

2009-njy ýylda bolan kongresdäki bir nutuk olara güýçli täsir etdi. Nutuk bilen çykyş eden dogan köpräk gulluk etmek isleýänlere ýüzlenip, şeýle diýdi: «Sürüji maşynyny diňe sürüp barýarka, ony çepe ýa saga öwrüp bilýär. Şonuň ýaly-da, Isa bizi ugrukdyrar ýaly, biz hem bir ýerde durman, ruhy maksadymyza ýetmek üçin tagalla etmeli» *. Nutukçynyň bu sözleri Kýun bilen Julä aýdylan ýaly boldy. Şol kongresde Taýwanda gulluk edýän missioner är-aýal hem interwýu berdi. Olar gullugyndan şatlyk tapýandygyny gürrüň berip, şol ýerde henizem kömegiň gerekdigini belläp geçdiler. Bu sözler hem Çuň Kýun bilen Juliniň hut özlerine aýdylan ýaly boldy.

Juli şeýle gürrüň berýär: «Biz şol kongresden soň, Taýwana göçmek barada Ýehowa doga edip, batyrgaýlyk diledik. Ýöne biz şonda-da gorkýardyk. Biz özümizi birinji gezek çuň basseýne bökýän ýaly duýýardyk». Olara Wagyz kitaby 11:4-däki şu sözler gowy kömek etdi: «Ýele seredýän ekin ekmez; bulutlara bakýan orak ormaz». Çuň Kýun: «Biz ýöne bir „seredip, bakyp“ durman, „ekmeli we ormaly“ diýen netijä geldik» diýýär. Olar dyngysyz doga edip, missionerleriň terjimehallaryny okadylar  we Taýwanda gulluk edýän dogan-uýalar bilen hat alyşdylar. Netijede, olar maşynlaryny we öý goşlaryny satyp, üç aýdan Taýwana göçdüler.

Şu günler daşary ýurtly dogan-uýalaryň 100-den gowragy Taýwanda wagyzçylaryň ýetmeýän ýerinde gulluk edýärler. Bu ýerde Awstraliýadan, Britaniýadan, Kanadadan, Fransiýadan, Ýaponiýadan, Koreýadan, Ispaniýadan we ABŞ-dan gelen 21—73 ýaş aralygyndaky dogan-uýalar gulluk edýärler. Olaryň arasynda 50-den gowrak durmuşa çykmadyk uýalar bar. Bu yhlasly dogan-uýalara daşary ýurtda gulluk etmäge näme kömek edýär? Geliň, muny bileliň.

Kanadaly Lora atly durmuşa çykmadyk uýa Taýwanyň günbatarynda pioner bolup gulluk edýär. Ol 10 ýyl mundan ozal wagyz etmegi asla halamaýardy. Lora: «Men gulluga kän çykmaýandygym üçin, ökde wagyz edip bilmeýärdim. Şol sebäpli-de, wagyz etmegi halamaýardym» diýýär. Soňra Loranyň Kanadadaky dostlary bile Meksika gidip, şol ýerde bir aý wagyz etmegi teklip edýärler. Lora uýa şeýle diýýär: «Şonda men ilkinji gezek köp wagyz etdim. Wagyz gaty gyzykly boldy!»

Şondan soň Lora Kanadada başga dilde geçirilýän ýygnaga geçmek isleýär. Ol hytaý dilini öwrenmek üçin kursa ýazylýar we hytaý toparyndaky dogan-uýalar bilen wagyz edýär. Şeýle-de Lora Taýwana göçmegi maksat edinýär. Ol 2008-nji ýylyň sentýabr aýynda maksadyna ýetdi. Lora şeýle gürrüň berýär: «Täze ýere öwrenişýänçäm, maňa takmynan bir ýyl gerek boldy. Emma men häzir Kanada dolanmagy göz öňüne-de getirip bilmeýärin». Lora wagyz etmeklige nähili garaýar? Ol şeýle diýýär: «Men indi wagyz etmegi örän gowy görýärin. Mukaddes Ýazgylar okuwyny geçýän adamlaryň Ýehowa barada bilim alyp, durmuşyny özgerdýändigini görüp diýseň begenýärin. Taýwanda gulluk edip, men hakyky şatlygyň nämedigini bildim».

35 ýaşlaryndaky är-aýal Braýan bilen Mişel takmynan sekiz ýyl mundan öň ABŞ-dan Taýwana göçýärler. Ilkibada, olar wagza köp goşant goşup bilmeýäris diýip pikir edýärdiler. Emma tejribeli bir missioner dogan olara şeýle diýýär: «Siz birine kitapça hödür etseňiz-de, belki, ol Ýehowa barada ilkinji gezek biler. Şeýdip, siz eýýäm wagyz işine wajyp goşant goşýarsyňyz!» Şol ruhlandyryjy sözler Braýan bilen Mişele gaýratyny gowşatman wagyz etmäge kömek etdi. Başga bir dogan olara şeýle diýdi: «Göwnüçökgünlige düşmez ýaly, hytaý dilini öwrenmekde gazanýan üstünligiňizi her gün däl-de, bir etrap kongresinden beýleki kongrese çenli barlap görüň». Şeýlelikde, bu är-aýal ösüş edip, häzir ökde pioner bolup gulluk edýärler.

Başga dili öwrenmäge sizi näme höweslendirip biler? Haýsy ýurtda gulluk etmek isleýän bolsaňyz, şol ýurda gidip görüň. Ol ýerdäki ýygnaklara gatnaşyp, dogan-uýalar bilen gürrüňdeş boluň we wagza çykyp görüň. Braýan şeýle diýýär: «Hudaýyň Patyşalygy baradaky habary köp adamlaryň kabul edişini we dogan-uýalaryň söýgüsini göreniňde, daşary ýurda göçüp, gulluk edesiň gelýär».

Taýwanda wagyzçylaryň ýetmeýän ýerinde pioner bolup gulluk edýän dogan-uýalaryň käbiri özlerini eklemek üçin iňlis dilini öwredýärler. Kristin bilen Mişel balyk satýarlar. Kristin: «Men öň hiç haçan balyk satmandym, emma bu maňa Taýwanda ýaşamaga kömek edýär» diýýär. Wagtyň geçmegi bilen, Kristiniň käbir alyjylary balygy yzygider satyn alyp başladylar. Kristin ýarym gün işläp, özüni we aýalyny ekleýär hem-de pioner bolup gulluk edip bilýär.

ABŞ-ly är-aýal Wilýam bilen Jennifer takmynan ýedi ýyl mundan ozal Taýwana göçdüler. Wilýam şeýle diýýär: «Dil öwrenmek, pioner bolup gulluk etmek, ýygnagyň aladasyny etmek we gazanç etmek käte biraz ýadadýar». Olara üstünlik gazanmaga we şatlygyny ýitirmezlige näme kömek etdi? Olar öňünde ýetip boljak maksatlary goýdular. Mysal üçin, olar hytaý dilini öwrenenlerinde, özlerinden has köp zada garaşmadylar we biraz haýalrak ösüş etseler-de, ruhdan düşmediler.

Wilýam bir etrap gözegçisiniň: «Maksadyňa ýetýänçäň, her bir üstünligiňe şatlan» diýen sözlerini ýatlaýar. Başgaça aýtsak, maksat goýanyňdan soň, oňa ýetmek üçin ädýän her bir ädimiňe şatlanmaly. Wilýam bu maslahata eýermegiň oňa we aýalyna eglişikli bolmaga, jogapkär doganlaryň maslahatyna gulak asmaga hem-de täze ýerde ökde wagyz edip biler ýaly gerekli özgerişikleri etmäge kömek edendigini aýdýar. Ol: «Biz wagyz edýän ýerimiziň gözel tebigatyny synlamaga-da wagt tapýardyk» diýýär.

ABŞ-ly durmuşa çykmadyk Megan atly pioner uýa hem Wilýam bilen Jennifer ýaly, maksadyna ýetmek üçin edýän «her bir üstünligine şatlanýar». Ol hytaý dilinde gowy gürlemek üçin jan edýär. Megan uýa her hepde wagyzçylar bilen birlikde Taýwanyň uly gämi duralgasy Gasýunda wagyz edýär. Ol ýeriň örän owadan tebigaty bar. Megan Bangladeşden, Hindistandan, Indoneziýadan, Filippinden, Tailanddan we Wanuatudan gelen balykçylaryň gämilerine aýlanyp wagyz edýär. Ol şeýle diýýär: «Balykçylar gämi duralgasynda az wagt bolýarlar. Şol sebäpli biz olar bilen derrew Mukaddes Ýazgylar okuwyna başlaýarys. Men olaryň hemmesine ýetişmek üçin, köplenç dört ýa-da bäş adam  bilen bilelikde okuw geçýärin». Megan hytaý dilini nädip öwrenýär? Ol: «Meniň hytaý dilini çaltrak öwrenesim gelýärdi. Emma men bir doganyň: „Sen eliňde baryny etseň, Ýehowa saňa gulluk etmäge kömek eder“ diýen sözlerini unutmaýaryn» diýýär.

Britaniýaly Keti daşary ýurda göçmänkä, durmuşa çykmadyk uýalar üçin haýsy ýurtda howpsuz gulluk edip boljakdygyny bilesi gelýär. Ol Ýehowa doga edip, biynjalyklanýan zatlary barada aýdýar we birnäçe filiala hat ýazyp, durmuşa çykmadyk uýalara nähili howplaryň bolup biljekdigi barada soraýar. Soňra ol gelen hatlary okap, Taýwanda gulluk etmegiň gowy boljakdygyna göz ýetirýär.

2004-nji ýylda 31 ýaşly Keti Taýwana göçýär. Ol Taýwanda başardygyndan sada ýaşamaga çalyşýar. Ol: «Men dogan-uýalardan ir-iýmişleriň we gök-önümleriň nirede arzan satylýandygyny soraýardym. Olaryň beren gowy maslahaty pulumy tygşytly sowmaga kömek edýärdi» diýip gürrüň berýär. Keti uýa sada ýaşamaga näme kömek edýär? Ol şeýle diýýär: «Men iýýän ýönekeý iýmitime, geýýän sada egin-eşigime kaýyl bolmaga kömek etmegi üçin köplenç Ýehowa doga edýärin. Ýehowa dogalaryma jogap berip, maňa nämäniň gerekdigine düşünmäge we isleýän zatlarymyň hemmesi bolmasa-da, kaýyl bolmaga kömek edýär. Men sada ýaşaýandygyma begenýärin, sebäbi bu maňa bar ünsümi ruhy işlere bermäge kömek edýär».

Ketiniň durmuşy diňe bir sada däl-de, eýsem, örän gyzykly. Ol: «Men köp adamlaryň hoş habara seslenýän ýerinde wagyz edýärin. Bu meniň üçin uly bagt!» diýýär. Keti Taýwana gelip, pioner gullugyna başlanda, şäherde iki sany hytaý ýygnagy bardy. Şu günler bolsa, ol ýerde ýedi ýygnak bar. Keti: «Şeýle uly ösüşi öz gözüň bilen görüp, hasyl ýygymyna gatnaşmak bilen, meniň her günüm gyzykly geçýär!» diýýär.

Ýokarda agzalan Çuň Kýun bilen Juli häzir nähili gulluk edýär? Ilkibada, Çuň Kýun hytaý dilini gowy bilmeýändigi üçin, ýygnaga kän bir haýry degmeýändir öýdýärdi. Emma ýygnakdaky dogan-uýalar beýle pikirde däldi. Çuň Kýun: «Biziň ýygnagymyzy bölüp, meni gulluk hyzmatçysy edip bellänlerinde, men, dogrudanam, kömek gerek ýerde gulluk edýändigime düşündim» diýýär. Ol ýylgyryp: «Bu ýerde hatda meniňem kömegim degjek eken!» diýýär. Şu günler Çuň Kýun ýaşuly bolup gulluk edýär. Juli bolsa şeýle diýýär: «Biz indi şatlanyp, kanagat tapýarys. Biz bu ýere kömek etmäge gelsek-de, özümiz hem köp zatlary öwrendik. Ýehowanyň bize bu ýerde gulluk etmäge mümkinçilik berendigine örän minnetdar!»

Köp ýerlerde henizem wagyzçylar ýetmeýär. Sen tizden mekdebi tamamlap, durmuşyňy nämä bagş etjekdigiň barada oýlanýarmyň? Sen durmuş gurmadyk bolsaň, Ýehowanyň guramasynda köpräk hyzmat edesiň gelýärmi? Maşgalaňyz bilen Ýehowa gulluk edip, sizde gowy ýatlamalaryň galmagyny isleýärmisiňiz? Siz pensiýa çykan bolsaňyz, başgalar bilen tejribäňizi paýlaşmak isleýärmisiňiz? Onda sizem wagyzçylaryň ýetmeýän ýerinde gulluk etseňiz, bol bereketleri aljakdygyňyza ynanyp bilersiňiz.