Mesihçiler Musa pygamberiň kanuny boýunça ýaşamaýarlar. Ýöne Ýehowa Kanundaky şu iň wajyp iki tabşyrygy berjaý etmegimizi talap edýär: Hudaýy we ýakynyňy söýmeli (Mt 22:37—39). Şeýle söýgi öz-özünden döremeýär. Onda ony nädip ösdürmeli? Munuň üçin her gün Mukaddes Ýazgylary okap, Ýehowanyň häsiýetleri barada oýlanmaly. Şonda Onuň «gözelligine» syn edip bileris (Zb 27:4). Netijede, Ýehowa bolan söýgimiz artar we Hudaýyňky ýaly garaýyşda bolmagy öwreneris. Bu bolsa bizi Hudaýyň tabşyryklaryny berjaý etmäge we janaýamaz söýgini artdyrmaga höweslendirer (Ýah 13:34, 35; 1Ýah 5:3). Aşakda Mukaddes Ýazgylary höwes bilen okamaga kömek edýän üç maslahat berilýär:

• Göz öňüne getirmek we duýmak ukybyňyzy ulanyň. Okaýan zadyňyzy göz öňüne getiriň. Näme görýärsiňiz, eşidýärsiňiz we nähili ys alýarsyňyz? Ondaky gahrymanlar özlerini nähili duýýarlar?

• Başga usuly ulanyň. Käbir maslahatlar: Sesli okaň ýa-da audioýazgylary diňläniňizde, Ýazgylardan yzarlaň. Baplary yzly-yzyna däl-de, onuň bir parçasyny ýa-da wakany okap bilersiňiz. Meselem, «Mukaddes Ýazgylaryň Täze Dünýä terjimesindäki» goşmaça maglumatda (A7 ýa-da B12) Isa barada gürrüň berilýär. Her günki okalýan aýady tutuş baby bilen we Mukaddes Ýazgylaryň kitaplaryny tertibi boýunça okaň.

• Düşünip okaň. Birnäçe baby okamagyň deregine, günde bir baby düşünip okamak we okan zatlaryň barada oýlanmak has peýdalydyr. Muny nädip etmeli? Jikme-jikliklere üns beriň, kartalary ulanyň we goşmaça aýatlary okaň. Azyndan düşünmeýän bir pikiriňiz barada gözleg geçiriň. Mümkin bolsa, okamaga näçe wagt sarp etseňiz, oýlanmaga-da şonça wagt sarp ediň.