Şeýtan we onuň arwah-jynlary hemişe zalym hem howpludy. Gadym wagtlarda Şeýtan Hudaýa wepaly Eýýubyň malyny we hyzmatkärlerini ýok etdi. Soňra ol Eýýubyň on çagasynyň ýygnanan öýüne «gara ýel» iberip, olaryň hemmesini öldürdi. Şondan soň, Şeýtan Eýýuby «dabanyndan depesine çenli örän agyryly heýwere bilen keselletdi» (Eýýup 1:7-19; 2:7).

Isanyň günlerinde arwah-jynlar adamlary kör we lal edýärdiler (Matta 9:32, 33; 12:22) Olar bir adama daşlar bilen öz-özüni ýaralatdyryp, ony gaty gynadylar (Marka 5:5). Bir çagany bolsa gygyrdyp, ýere urdular we «köp silterlediler» (Luka 9:42).

Şu günler Şeýtan we arwah-jynlar has-da zalym. Gökden zyňlandan bäri, olaryň zalym  işleri köpeldi. Dünýä habarlary olaryň örän rehimsizdigini görkezýär. Käbir adamlary kesel edýärler. Beýleki adamlary gorkunç düýşler bilen gynap, ukusyz goýýarlar. Başgalara bolsa jynsy taýdan azar berýärler. Şeýle-de, adamlaryň akylyny azaşdyrýarlar, adam öldürdýärler ýa-da janyna kast etdirýärler.

Surinamda ýaşaýan Lintina atly aýal bir jynyň, ýagny ýaman ruhuň onuň maşgalasyndan 16 adamy öldürendigini, özüni bolsa 18 ýyllap beden we ruhy taýdan gynandygyny gürrüň berýär. Jynlaryň «alaçsyz adamlary öler ýaly gynap, keýp alýandygyna» ol göz ýetirdi.

Ýöne Ýehowa gullukçylaryny Şeýtanyň hüjümlerinden gorap bilýär (Süleýmanyň tymsallary 18:10).