Ýermeýa 31:1—40
31 Ýehowa şeýle diýýär: «Şol döwürde men ysraýyl taýpalarynyň Hudaýy bolaryn, olar-da meniň halkym bolar+.
2 Ýehowa şeýle diýýär:
„Ysraýyl çölüň içi bilen janyna rahatlyk tapmaga barýardy,Sebäbi Alla olara rehim edip, gylyçdan halas etdi“».
3 Ýehowa uzakdan gelip, şeýle diýdi:
«Men seni ebedilik söýdüm.
Wepaly söýgim* bilen çoýup, seni kabul etdim*+.
4 Men seni dikelderin, sen hökman aýaga galarsyň+.
Ysraýyl gyzy, deprek kakarsyň,Şatlanyp tans edersiň*+.
5 Samariýanyň daglarynda ýene üzüm nahallaryny ekersiň+,Üzümçiler üzüm ekip, miwesinden hezil edip iýerler+.
6 Şeýle bir günler geler, garawullar Efraýym daglarynda:
„Turuň, Siona, Ýehowa Hudaýymyzyň huzuryna gideliň!“ diýip, jar çekerler»+.
7 Ýehowa şeýle diýýär:
«Ýakup üçin begenip aýdym aýdyň.
Şatlykdan ýaňa gygyryň, sebäbi siz beýik millet+.
Muny jar ediň. Hudaýy şöhratlandyryp şeýle diýiň:„Ýehowa, halkyňy, Ysraýylyň aman galanlaryny halas et“+.
8 Men olary demirgazyk ýurdundan yzyna getirerin+.
Ýeriň dürli künjeginden ýygnaryn+.
Olaryň arasynda kör we agsak adamlar+,Göwreli we burgusy tutýan aýallar bolar.
Olar ulus-il bolup, ýurduna dolanarlar+.
9 Olar aglaý-aglaý gelerler+,
Rehim etmegimi sorarlar, men hem olara ýol görkezerin.
Olar büdremez ýaly, tekiz ýol bilenAkar suwlaryň ýakasyna getirerin+.
Sebäbi men Ysraýylyň Atasy, Efraýym nowbahar oglum»+.
10 Eý halklar, Ýehowanyň sözüni diňläň!Onuň sözüni uzak adalara jar ediň+:
«Ysraýyly dargadan Hudaý ony jemlär.
Sürüsini goraýan çopan kimin gorar+.
11 Ýehowa Ýakup üçin töleg tölär+,Güýçli duşmandan halas eder+.
12 Olar Siona gelip, joşup aýdym aýdarlar+.Ýehowanyň eden ýagşylygyny,Beren bugdaýyny, täze şerabyny+, ýagyny,Owlak-guzularyny we gölelerini+ görüp begenerler.
Olar suwarylan bag ýaly bolarlar+,Hiç haçan saralyp solmazlar+.
13 Şol döwür gyzlar, ýigitler we garrylar,Bilelikde şatlanyp, tans ederler+.
Olaryň ýasy toýa öwrüler+,
Gaýgysy şatlyga öwrüler, göwünlik bererin+.
14 Ruhanylaryny näz-nygmatdan doýraryn,Halkyma bereket bererin»+. Muny Ýehowa aýdýar.
15 Ýehowa şeýle diýýär:
«Rama+ şäherinde agy sesi, dady-perýat eşidilýär.
Rahel ogullary üçin aglaýar+,
Teselli sözlerini diňlemeýär,Indi onuň ogullary ýok»+.
16 Ýehowa şeýle diýýär:
«Zar-zar aglama, gözýaş dökme,Çeken zähmetiň üçin sylaglaryn.
Ogullaryň duşman ýurdundan gaýdyp gelerler»+.Muny Ýehowa aýdýar.
17 «Saňa ýagty gelejek garaşýar+,
Ogullaryň dogduk mekanyna dolanar»+.Muny Ýehowa aýdýar.
18 «Men Efraýymyň agysyny eşitdim:„Sen maňa käýediň, menem düzeldim,Men nogta salynmadyk göle ýalydym.
Meni yzyma gaýtar, men şol bada dolanaryn.Sebäbi meniň Hudaýym sensiň Ýehowa.
19 Men toba edip, yzyma dolandym+.Ýalňyşyma düşünip, dyzyma urdum.
Ýaşlygymda eden günälerime utandym,Utançdan ýaňa ýüzümi ýerden galdyryp bilmedim“+.
20 Efraýym meniň söwer oglum, eziz balam dälmi?+
Näçe käýesem-de, barybir balamy unutmaryn.
Oglum üçin ýüregim gan aglaýar+,
Oňa rehim ederin — muny Ýehowa aýdýar+.
21 Özüň üçin ýol belgilerini,Ýol görkezýän daşlary dik+.
Şaýola, ýörejek ýoluňa ünsli bol+.
Gaýt yzyňa, eý Ysraýyl gyzy, şäherleriňe dolan!
22 Eý biwepa gyz, haçana çenli ikirjiňlenip ýörjek?
Ýehowa ýer ýüzünde täze bir zat etdi:
Aýal erkegiň daşynda perwaz urar».
23 Ysraýyl Hudaýy, Serkerdebaşy Ýehowa şeýle diýýär: «Men olaryň ýesir düşenlerini yzyna getirenimde, Ýahudada we galalarynda ýene-de: „Eý dogrulyk mekany+, eý mukaddes dag+, goý, seni Ýehowa ýalkasyn!“ diýerler.
24 Ýahudanyň galalarynda daýhanlar we çopanlar ýaşarlar+.
25 Men ýadaw adamyň göwnüni götererin, ysgyndan gaçanyň güýjüne güýç goşaryn»+.
26 Şonda men süýji ukudan oýanyp, gözlerimi açdym.
27 Ýehowa diýýär: «Şeýle günler geler, ysraýyl bilen ýahuda halkyny köpelderin, mallarynyň sanyny artdyraryn+.
28 Men olary sogrup taşlamaga, ýykmaga, weýran etmäge, ýer bilen ýegsan etmäge we urmaga taýýar duran bolsam+, olary dikmäge, ekmäge hem taýýar duraryn+ — muny Ýehowa aýdýar.
29 — Şol günler olar: „Atalary turşy üzüm iýdiler, ogullarynyň dişi gamaşdy*“ diýmezler+.
30 Emma her kim öz günäsi üçin öler. Turşy üzüm iýeniň öz dişi gamaşar.
31 Ysraýyl we Ýahuda öýi bilen täze äht baglaşjak günlerim geler+ — muny Ýehowa aýdýar.
32 — Şu äht olaryň ata-babalary bilen baglaşan ähtim ýaly bolmaz. Men ata-babalarynyň elinden tutup, Müsürden çykaran günüm äht baglaşypdym+. Men olaryň hojaýyny* bolsam-da, meniň ähtimi bozdular+ — muny Ýehowa aýdýar.
33 Şol günlerden soň men ysraýyl halky bilen äht baglaşaryn — muny Ýehowa aýdýar. — Kanunlarymy olaryň aňyna guýup+, ýüreklerine ýazaryn+. Men olaryň Hudaýy, olar hem meniň halkym bolar+.
34 Olaryň hiç biri doganyna we goňşusyna: „Ýehowany tanaň!“+ diýip öwretmezler. Sebäbi olaryň ählisi, uludan-kiçisine çenli meni tanarlar+. Men halkymyň etmişlerini bagyşlaryn, günälerini ýatlamaryn»+. Muny Ýehowa aýdýar.
35 Ýehowa gündizine yşyk bolar ýaly, Güni ýaratdy,Gijesine ýagtylyk bolar ýaly,Aýa we ýyldyzlara kanun goýdy.Hudaýyň emri bilen deňiz möwç urýar, tolkun atýar.Ady Serkerdebaşy Ýehowa+ şeýle diýýär:
36 «Tebigatyň kanunlarynyň ebedilik bolşy ýaly,Ysraýyl nesilleri-de huzurymda ebedi durar+ — muny Ýehowa aýdýar.
37 Ýehowa şeýle diýýär: „Ynsan asmany ölçäp bilmez, ýeriň düýbüni barlap bilmez, men-de Ysraýyl nesillerini eden ähli işleri üçin terk edip bilmerin“. Muny Ýehowa aýdýar+.
38 Ýehowa diýýär: „Şeýle günler geler, Ýehowa üçin şäher gurlar+. Şäher Hananel diňinden+ Burç derwezesine+ çenli uzalyp gider.
39 Ölçeg ýüpi+ Garep depesine çenli, ol ýerden hem Gowa tarap uzalyp gider.
40 Jeset taşlanýan we kül* atylýan jülgeden başlap tä Kidron deresine+ we gündogardaky Bedew derwezesine+ çenli ähli ýerler Ýehowa üçin mukaddes bolar+. Şäher hiç haçan ýykylmaz, weýran edilmez“».
Çykgytlar
^ Sözme-söz: özüme çekdim.
^ Ýa-da: Gülýänler bilen tans edersiň.
^ Sözme-söz: küteldi.
^ Başga manysy: äri.
^ Ýa-da: ýagly kül. Gurbanlygyň ýagy daman kül göz öňünde tutulýar.