Birinji Korinfliler 4:1—21
4 Goý, adamlar bize Mesihiň hyzmatkärleri we Hudaýyň mukaddes syryny+ bilmäge kömek edýän gullukçylar hökmünde garasynlar.
2 Ýöne gullukçylar iş dolandyryjy kimin wepaly bolmaly.
3 Maňa siz höküm çykaryň ýa-da kazylar höküm çykarsyn, hiç hili tapawudy ýok. Aslynda, men özüme-de höküm çykarmaýaryn.
4 Ynsabym ezýet bermese-de, özümi dogruçyl hasaplamaga hakym ýokdur, sebäbi maňa Ýehowa* höküm çykarýar+.
5 Şonuň üçin Halypamyz gelmänkä, hiç kime höküm çykarmaň+. Halypamyz gelip, garaňkylykdaky gizlin zatlary ýagtylyga çykarar we adamlaryň ýüregindäki niýetini mälim eder. Her bir adam eden işine görä Hudaýdan alkyş alar+.
6 Doganlar, men özüm we Apollos+ hakda aýdyp, siziň wajyp zady öwrenmegiňizi isleýärin. Siz: «Ýazylan zatlaryň çäginden çykmaň» diýen tabşyryga gulak assaňyz, tekepbir bolmarsyňyz+ we bir adamy başga birinden ýokary tutmarsyňyz.
7 Seniň başgalardan näme artykmaç ýeriň bar? Saňa ähli zady Hudaý bermedimi näme?+ Eger ähli zady Hudaý beren bolsa, onda näme üçin özüň gazanan ýaly öwünýärsiň?
8 Siz gerk-gäbe doýduňyzmy? Eýýäm baýadyňyzmy? Patyşalar kimin bizsiz höküm sürüp başladyňyzmy?+ Siziň patyşa bolup höküm sürmegiňizi isleýärin, şonda bizem höküm sürüp bileris+.
9 Meniň pikirimçe, Hudaý resullary ölüme höküm edilenler+ kimin iň soňunda sahna çykardy+, sebäbi biz dünýä, perişdelere we adamlara tomaşa bolduk.
10 Biz Mesihe hyzmat edýändigimiz üçin akmak hasaplandyk+, siz bolsa özüňizi akylly saýýarsyňyz. Biz ejiz, siz bolsa güýçli, bizi kemsidýärler, sizi bolsa hormatlaýarlar.
11 Biz şu wagta çenli aç-ýalaňaç+, urlup-ýenjilip+ we öý-öwzarsyz gezip ýörüs.
12 Öz ellerimiz bilen zähmet çekýäris+. Sögýän adamlara mähirli bolýarys+, yzarlanlarynda sabyrly çydaýarys+,
13 töhmet atanlarynda ýumşak jogap berýäris+. Bizi häzire çenli dünýäniň zir-zibili we hapa zatlary hasaplaýarlar.
14 Men bulary sizi utandyrmak üçin ýazmaýaryn, gowy görýän çagalarym ýaly öwüt-nesihat berýärin.
15 Mesihiň şägirtleriniň arasynda müňlerçe terbiýeçiňiz* bolsa-da, ataňyz köp däldir. Men Isa Mesih hakda hoş habary wagyz edendigim üçin ataňyz boldum+.
16 Siz hem menden görelde alyň+.
17 Munuň üçin ýanyňyza Halypamyza wepaly gulluk edýän eziz oglum Timoteosy iberýärin. Ähli ýygnaklarda öwredişim ýaly, ol size Isa Mesihiň gullukçysy hökmünde ulanýan usullarymy ýatladar+.
18 Siziň käbiriňiz: «Ol gelmez» diýip, özüňizi ýokary tutupsyňyz.
19 Ýehowa* islese, tizden ýanyňyza bararyn, özüni ýokary tutýan tekepbirleriň sözlerine däl-de, Hudaýyň güýji bilen edýän işlerine üns bererin.
20 Adamyň Hudaýyň Patyşalygyna tabyn bolýandygyny aýdýan sözlerinden däl-de, Hudaýyň güýji bilen edýän işlerinden bilse bolýar.
21 Siz näme etmegimi isleýärsiňiz? Siziň ýanyňyza taýakly baraýynmy+ ýa-da söýgi we mähir bilen?
