Hyzkyl 5:1—17
5 Ynsan ogly, ýiti hanjary al-da, dellekçiniň päkisi edip ulan. Saçyňy we sakgalyňy syr. Soňra olary terezide ölçäp, üç bölege böl.
2 Gabaw günleri tamamlananda, onuň bir bölegini şäheriň içinde ýakarsyň+. Soňra beýleki bölegini şäheriň daş-töwereginde pyçak bilen bölek-bölek edersiň+. Üçünji bölegini bolsa ýele sowrarsyň. Men bolsa gylyjymy gynyndan çykaryp, olaryň yzlaryndan kowaryn+.
3 Üçünji bölekden biraz saç alyp, köýnegiň etegine salyp goý.
4 Ondan ýene birazajygyny al-da, otda ýakyp kül et. Ot bütin Ysraýyl öýüni ýakyp ýandyrar+.
5 Älemiň Hökümdary Ýehowa şeýle diýýär: „Bu Iýerusalimi aňladýandyr. Ony halklaryň arasynda, ýurtlaryň ortasynda goýdum.
6 Emma ol hökümlerime we kada-kanunlaryma garşy çykdy. Goňşy halklardan bäşbeter boldy+. Ol hökümlerimi berjaý etmedi we kada-kanunlarym boýunça ýaşamady“.
7 Şonuň üçin Älemiň Hökümdary Ýehowa şeýle diýýär: „Sen goňşy halklardan hem bäşbeter bolduň. Kada-kanunlarym boýunça ýaşaman, hökümlerimi berjaý etmän, goňşy halklaryň hökümlerini berjaý edeniň üçin+,
8 Älemiň Hökümdary Ýehowa şeýle diýýär: „Eý şäher, men seniň duşmanyň+. Halklaryň öňünde jeza bererin+.
9 Ýigrenji däp-dessurlaryň* üçin seni şeýle bir hala salaryn, beýle zady öň eden däldirin, gelejekde-de etmerin+.
10 Atalar ogullarynyň+, ogullar hem atalarynyň etini iýer. Size jeza bererin, diri galanlaryňyzy dumly-duşa* dargadaryn“+.
11 Älemiň Hökümdary Ýehowa şeýle diýýär: „Men diri şaýatdyryn! Nejis butlaryňyz we ýigrenji däp-dessurlaryňyz* bilen mukaddes mekanymy haram edendigiňiz üçin+, sizden ýüz öwrerin. Size nebsim agyrmaz, rehimim inmez+.
12 Bir bölegiňiz mergiden we açlykdan öler. Beýleki bölegiňiz şäheriň daş-töwereginde gylyçdan geçiriler+. Üçünji bölegiňiz dumly-duşa* dargadylar. Sizi kowmak üçin gylyjymy gynyndan çykararyn+.
13 Şonda men köşeşerin, gaharym ýatyşar, kalbym aram tapar+. Olara gaharymy pürkenimden soň, meniň Ýehowadygymy, ýürekden wepaly bolmagy talap edýändigimi*+ bilerler.
14 Seni harabaçylyga öwrerin. Goňşy halklaryň, ötegçileriň öňünde masgara ederin+.
15 Men gahar-gazaba münerin, saňa agyr jeza bererin, çykaran hökümimi berjaý ederin. Şonda goňşy halklar seni ýigrener we kemsider+. Olar bolan ýagdaýdan sapak edinerler, örän gorkarlar. Muny men, Ýehowa aýdýaryn.
16 Men sizi ýok etmek üçin açlyk oklaryny ýagdyraryn. Atan oklarym sizi gyryp taşlar+. Men sizi çörekden kesip*, açlygy has-da güýçlendirerin+.
17 Üstüňize açlygy we ýyrtyjy haýwanlary ibererin+, olar sizi çagalaryňyzdan mahrum eder. Halk mergiden gyrlar, gan sil deý akar. Başyňyzdan gylyç indererin+. Muny men, Ýehowa aýdýaryn“».
Çykgytlar
^ Ýa-da: işleriň.
^ Sözme-söz: her bir ýele.
^ Ýa-da: işleriňiz.
^ Sözme-söz: her bir ýele.
^ Ýa-da: gabanjaňdygymy; diňe özüme wepaly bolmagy talap edýändigimi.
^ Sözme-söz: siziň çörek taýaklaryňyzy döwüp. Çörek asylyp goýulýan taýaklar göz öňünde tutulýan bolmaly.