Luka 12:1—59
-
Fariseýleriň hamyrmaýasy (1—3)
-
Adamdan däl, Hudaýdan gorkmaly (4—7)
-
Mesihiň şägirdidigiňi aýtmaly (8—12)
-
Akylsyz baý hakdaky mysal (13—21)
-
Alada etmäň (22—34)
-
Kiçi süri (32)
-
-
Oýa boluň (35—40)
-
Wepaly we biwepa hyzmatkär (41—48)
-
Parahatlyk däl-de, agzalalyk (49—53)
-
Bolýan zatlara düşünmek (54—56)
-
Dawaňy çözmek (57—59)
12 Şol wagt müňlerçe adam ýygnandy. Olar biri-birini gysyp barýardy. Şonda Isa şägirtlerine ýüzlenip şeýle diýdi: «Fariseýleriň hamyrmaýasyndan ägä boluň, sebäbi olar ikiýüzlüdir+.
2 Näçe gizlin saklansa-da, açylmajak we gizlin galjak zat ýokdur+.
3 Garaňkylykda aýdan zadyňyz ýagtylykda eşidiler, otagyňyzda pyşyrdap aýdanyňyz jaýyň üçeginden jar ediler.
4 Dostlarym+, size diýýärin, bedeni öldürip, başga hiç zat edip bilmeýän adamdan gorkmaň+.
5 Emma adamy öldürip, Jähenneme*+ taşlap bilýän Hudaýdan gorkuň. Size diýýärin, Hudaýdan gorkuň!+
6 Bäş serçäni iki teňňä* satýarlar, şeýle dälmi? Emma Hudaý olaryň hiç birini unutmaýar+.
7 Siziň bolsa saçyňyz hem sanalgy+. Gorkmaň, siz serçelerden has gymmatly+.
8 Size diýýärin, eger biri adamlaryň öňünde meniň şägirdimdigini aýtmaga çekinmese+, Ynsan ogly-da ony Hudaýyň perişdeleriniň öňünde şägirdi hasaplamaga çekinmez+.
9 Emma kim adamlaryň öňünde menden ýüz öwürse, men hem Hudaýyň perişdeleriniň öňünde ondan ýüz öwrerin+.
10 Ynsan ogluna dil ýetiren adam bagyşlanar, emma mukaddes ruha dil ýetiren adam bagyşlanmaz+.
11 Adamlar sizi jemagatyň*, hökümdarlaryň we ygtyýarly adamlaryň öňüne eltenlerinde, özüňizi goramak üçin näme diýerin ýa-da nädip aýdaryn diýip alada etmäň+.
12 Sebäbi näme diýmelidigini mukaddes ruh şol wagt öwreder»+.
13 Märekäniň içinden biri: «Mugallym, agama aýt, mirasyny meniň bilen paýlaşsyn» diýdi.
14 Isa: «Kim meni kazy ýa-da araçy edip belledi?» diýdi.
15 Soňra Isa märekä: «Hüşgär boluň, açgözlügiň her hili görnüşinden seresap boluň+. Adamyň baýlygy ömrüni uzaltmaýar»+ diýdi.
16 Isa olara şeýle mysal gürrüň berdi: «Bir baý adamyň mellegi bol hasyl berýär.
17 Ol içinden: „Men näme etsemkäm, gallamy goýara ýerim ýok?“ diýip pikir edýär.
18 Ol: „Gowusy, men şeýle edeýin+: ammarlarymy ýykyp, has ulularyny guraýyn we bar gallamy, bar zadymy şol ýerde saklaýyn.
19 Soňra özüme şeýle diýerin: Hezil edip iýip içeýin, sebäbi ýygnan zadym bütin ömrüme ýeter“ diýýär.
20 Emma Hudaý: „Eý akylsyz, şu gije janyň alnar. Şonda ýygnan zatlaryň kime galar?“+ diýdi.
21 Hudaýyň öňünde baý bolman, özüne baýlyk ýygnaýan adamyň ýagdaýy şeýle bolýandyr»+.
22 Isa şägirtlerine şeýle diýdi: «Size diýýärin, mundan beýläk näme iýeris diýip janyňyzy alada etmäň, näme geýeris diýip bedeniňizi gaýgy etmäň+.
23 Adamyň jany* iýmitden, bedeni egin-eşikden has gymmatlydyr.
24 Gargalara serediň: olar ne ekýärler, ne-de ammara iýmit ýygnaýarlar. Emma şonda-da Hudaý olary iýmitlendirýär+. Siz guşlardan has gymmatly dälmi?+
25 Siziň haýsyňyz alada edip, ömrüňizi biraz* uzaldyp bilýäňiz?
26 Eger siz ýönekeýje zady başarmaýan bolsaňyz, onda başga zatlaryň aladasyny etmegiň näme peýdasy bar?+
27 Çigildemleriň ösüşine syn ediň: olar ne zähmet çekýärler, ne-de eşik tikýärler. Emma men size diýýärin, şan-şöhratly Süleýman patyşa-da şeýle owadan geýnen däldir+.
28 Eý imany azlar, eger şu gün ösüp, ertir ojaga atylýan gülleri we otlary Hudaý şeýle geýindirýän bolsa, onda sizi has-da gowy geýindirmezmi?
29 Şonuň üçin näme iýerin, näme içerin diýip alada etmäň+.
30 Şeýle zatlaryň aladasyny başga halklar edýär, ýöne Ataňyz size nämäniň gerekdigini bilýär+.
31 Hudaýyň Patyşalygyny hemişe birinji orunda goýuň, şonda gerekli zatlar üstüne goşulyp berler+.
32 Gorkma, kiçi süri!+ Ataňyz size Patyşalygy bermek isleýär+.
33 Emlägiňizi satyň-da, garyplara paýlaň*+. Könelmejek pul torbasyny alyp, gökde hiç haçan egsilmejek baýlyk toplaň+. Göge ne ogrular girýär, ne-de baýlygyňyzy güýe iýýär.
34 Baýlygyňyz nirede bolsa, ýüregiňiz hem şol ýerde bolar.
35 Egin-eşigiňizi geýip, biliňizi guşaň+, çyraňyz ýanyp dursun+.
36 Toýdan+ gelýän hojaýynyny garşylaýan hyzmatkärler ýaly boluň+. Sebäbi hojaýyn gapyny kakanda, hyzmatkärler dessine gapyny açyp biler.
37 Hojaýyny gelende, oýa bolan hyzmatkärler nähili bagtly! Size hakykaty aýdýaryn, ol hyzmatkärlerini saçak başynda oturdar-da, bilini guşap, hyzmat eder.
38 Eger ol gijäniň ikinji nobatynda* ýa-da üçünji nobatynda* gelip, olaryň oýadygyny görse, şol hyzmatkärler nähili bagtly!
39 Bilip goýuň: öý eýesi ogrynyň haçan geljekdigini bilse, öýüni talatmaz+.
40 Siz hem taýyn boluň, sebäbi Ynsan ogly garaşmaýan wagtyňyz geler»+.
41 Petrus: «Halypam, sen mysaly diňe bize gürrüň berýäňmi ýa-da hemmelere?» diýip sorady.
42 Halypamyz şeýle diýdi: «Hojaýynyň hyzmatkärlere wagtly-wagtynda nahar paýlaryny bermek üçin bellejek wepaly hem paýhasly iş dolandyryjysy kim?+
43 Hojaýyn gelip, hyzmatkäriň işläp ýörenini görse, hyzmatkäriniň begenjiniň çägi bolmaz.
44 Size hakykaty aýdýaryn, hojaýyn oňa ähli emlägini ynanar.
45 Emma gul içinden: „Hojaýynym gijä galýar“ diýip, beýleki gullary we gyrnaklary urup, özi bolsa iýip-içip, serhoş bolsa+,
46 hojaýyn onuň garaşmaýan güni we pikir etmeýän wagty geler. Şonda ol guluna agyr jeza berip, biwepalyk edenleriň arasyna taşlar.
47 Hojaýynyň islegini bilip-de, taýyn bolmadyk ýa-da buýrugyny ýerine ýetirmedik gul ençeme gezek urlar+.
48 Emma hojaýynyň islegine düşünmedik, ýöne urulmaga mynasyp işleri eden guly az urarlar. Dogrudan-da, kime köp zat berlen bolsa, ondan köp zat talap ediler, kime köp zat ynanylan bolsa, ondan has köp zat talap ediler+.
49 Men ýer ýüzüne ot ýakmaga geldim. Eger ot eýýäm ýanan bolsa, onda maňa mundan artyk zat gerek däl.
50 Men başgaça suwa çümdürilmäge garaşýaryn, şoňa çenli ýüregim dertli bolar+.
51 Men ýer ýüzüne parahatlyk getirmäge gelendirin öýdýäňizmi? Ýok, men parahatlyk däl, agzalalyk döretmäge geldim+.
52 Mundan beýläk öýde agzalalyk bolar: bäş adamyň üçüsi ikisine garşy, ikisi-de üçüsine garşy çykar.
53 Kakasy ogluna, ogly hem kakasyna garşy çykar, ejesi gyzyna, gyzy hem ejesine garşy çykar, gaýynenesi gelnine, gelni hem gaýynenesine garşy çykar»+.
54 Isa märekä: «Günbatarda bulut göreniňizde: „Harasat turar“ diýýärsiňiz, şeýle hem bolýar.
55 Günortadan ýel öwsüp başlanda: „Howa yssy bolar“ diýýärsiňiz, şeýle hem bolýar.
56 Eý ikiýüzlüler, siz ýerdäki we asmandaky hadysalary bilýärsiňiz, ýöne näme üçin häzirki bolýan zatlaryň manysyna düşünmeýärsiňiz?+
57 Siz näme üçin dogry netijä gelip bilmeýärsiňiz?
58 Aýdaly, sen dawagäriň bilen häkimiň ýanyna barýarsyň. Heniz ýolda barýarkaň, dawagäriň bilen meseläňi çöz, ýogsam seni kazyýetde günäkärläýmesin. Şonda kazy seni garawula tabşyrar, ol hem türmä basar+.
59 Saňa diýýärin, soňkuja teňňäňi* berýänçäň, türmeden çykmarsyň» diýdi.
Çykgytlar
^ Sözme-söz: assariýa. Goşmaça maglumata serediň: B14.
^ Ýa-da: sinagogalara.
^ Sözme-söz: bir tirsek. Goşmaça maglumata serediň: B14.
^ Ýa-da: sadaka beriň.
^ Takmynan agşam sagat 9:00-dan ýarygijä çenli aralyk.
^ Takmynan ýarygijeden 3:00-a çenli aralyk.
^ Sözme-söz: leptaňy. Goşmaça maglumata serediň: B14.
