•  «Dogan dogana galadyr, gadyryny bilmeseň beladyr»

•  Oňşukly ýaşamagyň iki sebäbi

•  Deň-duşlaryň näme diýýär?

 Il arasynda jigi-doganlar barada şeýle nakyl bar: «Dogan dogana galadyr, gadyryny bilmeseň beladyr». Dogrudan-da, sen-ä olary gowy görýäň, olar hem seni. Ýöne käte olar bilen oňuşmak kyn bolýar. 18 ýaşly Helena şeýle diýýär: «Jigim meniň haçan we nädip gaharymy getirmelidigini gaty gowy bilýär».

 Käbir jigi-doganlaryň arasyndaky düşünişmezligi çözmek üçin käte ýönekeýje gürrüňdeşlik hem ýeterlik bolýar. Meselem:

•   Iki bolup bir otagda ýaşaýan doganlar ýer üçin dawalaşýar. Şeýle ýagdaýda näme etse bolar? Olar bir-biri bilen oňşup, geçirimli bolmagy öwrenmeli. Bu babatda Luka 6:31-nji aýatdaky prinsip kömek eder.

•   Iki gyz dogan bir-biriniň eşiklerini soraşman geýýär. Şeýle ýagdaýda näme etse bolar? Olar bir-birine halaýan we halamaýan zatlaryny aýdyp, açyk gürleşmeli. Bu babatda 2 Timoteos 2:24-nji aýatdaky prinsip kömek eder.

 Käte jigi-doganlaryň arasynda has uly dawa bolmagy mümkin we bu köp kynçylyklara eltip biler. Geliň, Mukaddes Ýazgylardan iki mysala seredeliň:

•   Merýem bilen Harun dogany Musa göriplik edendigi üçin köp kynçylyklara uçradylar. Bu waka barada Sanlar 12:1—15-nji aýatlardan okap gör. Soňra özüňe şeýle sorag ber: «Jigi-doganlaryma göriplik etmez ýaly näme edip bilerin?»

•   Kabyl dogany Habyla gaty gaharlanyp, soňam ony öldürýär. Bu waka barada Gelip çykyş 4:1—12-nji aýatlardan okap gör. Soňra özüňe şeýle sorag ber: «Doganym ýa-da uýam bilen düşünişmezlik dörände nädip gaharymy saklap bilerin?»

 Jigi-doganlaryň bilen ýaşamak näçe kyn bolsa-da, olar bilen oňşukly ýaşamagyň azyndan iki sebäbi bar:

1.   Ulalandygyňy görkezýär. Aleks atly bir ýaş oglan şeýle diýýär: «Öň iki gyz jigim sebäpli derrew gaharym gelýärdi. Häzir bolsa men özüme erk edip, sabyrly bolmagy öwrendim. Sebäbi men indi çaga däl».

    Mukaddes Ýazgylarda näme diýilýär? «Gahary giç gelýän adamyň düşünjesi köpdür; dargursak bolsa akmaklygy beýgeldýändir» (Süleýmanyň tymsallary 14:29).

2.   Gelejekde-de peýda berer. Eger sen häzir jigi-doganlaryň bilen oňşup bilmeýän bolsaň, onda ýanýoldaşyň, işdeşiň, başlygyň ýa-da iş salyşýan başga bir adam bilen nädip oňuşjak?

    Hakykat: Eger sen häzirden maşgala agzalaryň bilen gowy gatnaşykda bolup, gürrüňdeş bolmagy öwrenseň, gelejekde başgalar bilen hem gowy gatnaşykda bolarsyň.

    Mukaddes Ýazgylarda näme diýilýär? «Mümkin boldugyndan, ähli adamlar bilen parahat ýaşamak üçin eliňizde baryny ediň» (Rimliler 12:18).

 Sen jigi-doganlaryň bilen oňşup ýaşamagy öwrenesiň gelýärmi? Onda «Deň-duşlaryň näme diýýär?» atly çarçuwany oka we «Jigi-doganlaryň bilen nädip oňuşmaly?» diýen gönükmäni ýerine ýetir.