Mukaddes Kitapda reinkarnasiýa taglymaty barmy?
Mukaddes Kitabyň jogaby
Ýok. Mukaddes Kitapda «reinkarnasiýa» (ölümden soň ruhuň haýwana ýa-da adama geçmegi) sözi we taglymaty duş gelmeýär. Reinkarnasiýa taglymaty ölmeýän jan ýa-da baky ruh hakdaky düşünjä esaslanýar a. Emma Mukaddes Kitapda «jan» sözi adamyň ýaşaýşyny aňladýar we ol ölýär (1 Musa 2:7; Hyzkyl 18:4). Adam ölenden soň, ol ýaşamagyny bes edýär (1 Musa 3:19; Nesihat 9:5, 6).
Reinkarnasiýa we direliş baradaky taglymatlaryň nähili tapawudy bar?
Mukaddes Kitabyň direliş baradaky taglymaty baky ruh diýen düşünjä esaslanmaýar. Direliş ölen adamlaryň Hudaýyň güýji arkaly direljekdigine umyt berýär (Matta 22:23, 29; Resullar 24:15). Şonda direlen adamlar «täze ýerde» ýaşar we gaýdyp hiç haçan ölmez (2 Petrus 3:13; Ylham 21:3, 4).
Reinkarnasiýa we Mukaddes Kitap barada ýalan düşünjeler
Ýalan düşünje: Mukaddes Kitapda Ylýas pygamberiň suwa çümdürýän Ýahýa bolup gelendigi aýdylýar.
Delil: Hudaý: «Özüm size Ylýas pygamberi ibererin» diýip pygamberlik etdi; Isa Mesih hem şu sözleri suwa çümdürýän Ýahýanyň ýerine ýetirendigini aýtdy (Melek 4:5, 6; Matta 11:13, 14). Emma bu Ylýasyň suwa çümdürýän Ýahýa bolup gelendigini aňlatmaýar. Ýahýanyň hut özi Ylýas pygamber däldigini aýtdy (Ýahýa 1:21). Ýahýa Ylýas pygamberiňki ýaly ýumşy ýerine ýetirmelidi, ýagny Hudaýyň habaryny yglan edip, adamlary toba etmäge höweslendirmelidi (1 Patyşalar 18:36, 37; Matta 3:1). Ýahýa-da «Ylýas pygamberiňki ýaly ruh we güýç bilen» hereket etmelidi (Luka 1:13—17).
Ýalan düşünje: Mukaddes Kitapda «täzeden dogulmak» diýlende, reinkarnasiýa göz öňünde tutulýar.
Delil: Mukaddes Kitapda «täzeden dogulmak» diýlende, ölümden soň däl-de, ýaşap ýören wagtyň ruhy taýdan dogulmak göz öňünde tutulýar (Ýahýa 1:12, 13). Täzeden dogulmak öňki eden günäleriň netijesi däl-de, gaýtam, Hudaýyň berýän aýratyn sylagy we berekedi hasaplanýar. Ol bu sylagy diňe käbir adamlara berýär (Ýahýa 3:3; 1 Petrus 1:3, 4).
a Ölmeýän jan we reinkarnasiýa baradaky düşünje gadymy Wawilondan gelip çykdy. Birnäçe wagtdan soň hindi filosoflary şoňa esaslanyp, ýazgyt baradaky taglymaty girizipdirler. Britan ensiklopediýasyna laýyklykda, ýazgyt — bu «sebäp we netije baradaky kanun. Ol adamyň edýän her bir hereketi onuň indiki ýaşajak durmuşyna täsir edýär diýip öwredýär» («Britannica Encyclopedia of World Religions», sah. 913).
You May Also Like
MUKADDES KITABA DEGIŞLI SORAGLARYŇ JOGABY
Täzeden dogulmak nämäni aňladýar?
Siz mesihçi bolmak üçin täzeden doguldyňyzmy?
ESSENTIAL BIBLE TEACHINGS
Adam ölensoň, oňa näme bolýar?
Mukaddes Kitapda Lazar ýaly ençeme adamlaryňam tizden ölüm ukusyndan oýanjakdygy wada berilýär.
MUKADDES KITABA DEGIŞLI SORAGLARYŇ JOGABY
Jan näme?
Adamyň içinde bir zat barmy? Ol adam ölensoň ýaşaýarmy?
MUKADDES KITABA DEGIŞLI SORAGLARYŇ JOGABY
Direliş näme?
Siz gelejekde kimleriň direljekdigini bilip, haýran galsaňyz gerek.
