Ke akoako ki tatou ki he tama talavou na fakahao te tuagane o tona mātua, ko te apohitolo ko Paulo. E hē iloa e ki tatou tona igoa, kae e iloa e ki tatou na fai e ia he gaoioiga lotomakeke. E fia fakalogo koe ki te gaoioiga na fai e ia?​—

Ko Paulo na falepuipui i Ieluhalema. Na puke ia auā ko ia na tālaki e uiga ki a Iehu. Ko ni tamāloa kino na fili ki a Paulo, ma fai he latou fuafuaga kino. Na lea ki latou vēia: ‘Ke fehili ki tatou ki te takitakikau ke uga mai ana fitafita ke kaumai ia Paulo ki te fale fakamahino. Ke mumuni ki tatou i te tafāauala, i te taimi e kui mai ai ia Paulo, ke finau!’

Na fakalogo te ataliki o te tuafafine o Paulo ki na fuafuaga. He ā tana mea ka fai? Na fano ma taku hako ki a Paulo i te falepuipui. Na lea ia Paulo ki ei ke taku ki te takitakikau te fuafuaga kino. He ā tō manatu pe faigofie ke tautala te ataliki o te tuafafine o Paulo ki te takitakikau?⁠— Hēai, auā he tino tāua te takitakikau. Kae na lotomakeke te ataliki o te tuafafine o Paulo ke tautala ki te takitakikau.

Na iloa e te takitakikau tana mea ka fai. Na hauni e ia he kautau e toka 500 ke puipui ia Paulo! Na taku ki a te ki latou ke kave ia Paulo ki Kaihaleia i te po tēnā. Na haoloto ia Paulo?​— Io, na heki ohofaki ia e nā tamāloa kino! Na heki taunuku te latou fuafuaga kino.

He ā he akoakoga e kē maua mai te tala tēnei?​— E mafai oi lotomakeke koe e vē ko te ataliki o te tuafafine o Paulo. E tatau ke lotomakeke ki tatou i te tautala ki iētahi e uiga ki a Ieova. Pe ka lotomakeke koe ma tautala pea e uiga ki a Ieova?​— Kāfai e fai vēia koe, hōvē ka kē fakahao he tahi.