E kē iloa pe ko he ā te Mālō tēnei e talanoa ki tatou ki ei?​— Io, ko te Mālō o te Atua, ko te Mālō tēnā ka huia te lalolagi ki he palataiho. E fia iloa atili e koe e fakatatau ki te Mālō tēnei?​—

I nā mālō uma e i ei tona tupu. Ko te tupu e pule ki nā tino o tona fenua. E kē iloa pe ko ai te Tupu o te Mālō o te Atua? ​— Ko Iehu Keliho. E nofo ia i te lagi. Ka toeitiiti kavea ia ma Tupu e pule i nā tino uma i te lalolagi! He ā hō manatu, e fiafia ki tatou ke kavea ia Iehu ma Tupu o te lalolagi kātoa?​—

Ka matuā fiafia ki tatou! I te Palataiho, ka hē toe i ei ni tino e miha pe olo ki nā taua. Ka alofa tētahi tino ki tētahi tino. E hē i ei he tino e tauale pe oti. Ka toe kikila nā mata o nā tino e tauaho, ka toe fakalogo nā tino tutuli, ka toe vili ma ohooho nā tino nae hē havavali. Ka lahi foki nā meakai. Ka lalata nā manu uma ma ki tatou. Ka toetutū nā tino na feoti. Te tokalahi o nā tino kua kē iloa mai te tamātuhi tēnei e vē ko Lepeka, Laava, Tavita, ma Elia ka toe foki ki te ola!  E fia fetaui koe ma ki latou i te taimi e toe foki mai ai ki latou?​—

Ko Ieova e alofa ki a te koe ma fofou ke fiafia koe. Kāfai e akoako pea koe e uiga ki a Ieova ma fakalogo ki ei, ka mafai koe ke ola e fakavavau i he palataiho gali! E fofou koe ki te mea tēnā?​—