1, 2. He ā te Mālō o te Atua?

 NA AKOAKO e Iehu ona hoko ke tatalo vē: “To mātou Tamana i te lagi: Ke tapu tō igoa. Ke pa mai tō Mālō, ke fai tō loto i te lalolagi e vē oi faia i te lagi.” (Mataio 6:9, 10) E tatau oi tatalo ki tatou ke pa mai te Mālō o te Atua. Ko he ā te Mālō o te Atua? Ko he mālō e i te lagi. Kua tofia e Ieova tona Ataliki pele, ko Iehu Keliho, ke kavea ma Tupu. He ā te ka fai e te Mālō mo ki tatou?

² I te hilia atu te 2,500 tauhaga kua teka, na fakaohofakia e te Atua te pelofeta ko Tanielu ke lea vē: “Ko onapō o nā tupu e fakatū ai e te Atua o te lagi he mālō e hē fakaumatia e fakavavau; ko te mālō tēnā, e hē tukua ki he tahi nuku, ka tukimomomo ma fakaumatia nā mālō uma, kae e tumau e fakavavau.” (Tanielu 2:44) Ko te valoaga tēnei e fakahino mai te tatau ona kave kehe muamua e te Mālō o te Atua nā pulega fakatetagata, e fakatupu ai nā fevaevaeakiga ma nā puapuagā i te lalolagi i aho nei, ka kaumai he pulega fīlēmū ma fakavavau mo tagata uma. Ka tupu afea na mea iēnei? Pe ka kikila ki tatou ki ei?

3-5. Aiheā e tumau ai o tatou talitonuga ki te Mālō o te Atua ka toeitiiti tali mai ki nā fakafitauli uma o te lalolagi?

³ I te taimi na i te lalolagi ai ia Iehu, na fehili ona hoko ki ei: “Taku mai ake ki a te ki mātou pe ko āfea te ka fakataunuku ai te mea tēnei, ma pe he ā foki he fakailoga ke iloa ai e ki mātou te taimi e haele mai ai koe, ma te taimi e uma ai te ōlaga tēnei?” Na tali ia Iehu, ka tutupu nā taua i te lalolagi, nā ogemeakai, nā mafuie e lahi, ma te fakalahi o te amiokino. Ka i ei nā faiākoga lotu hehē ma takitaki hehē te tokalahiga, ma kavea ona hoko moni ma tino fakahauāgia ma te inoino ki ei, ka makalili te alofa o te tokalahiga o tagata, ma e tālaki te tala lelei o te Mālō o te Atua i te lalolagi uma. (Mataio 24:3-14) Pe kua kē kitea nā mea iēnei kua tutupu? Ko te tokalahiga o tagata matamata e kau ki te manatu, i te taua muamua a te lalolagi i te 1914, na ulu ai te lalolagi o tagata ki faigatā, ma fatoa tupu ai lava he mea vē. Na tuhi te faifilihofia ko Bertrand Russell: “Mai te 1914, ko tagata uma e hāfia nā mea e tutupu i te lalolagi kua matataku i nā mea e vē kua uma te fuafua ma kua filifili muamua ka fakaholo atu ki he mala lahi.” Kua tuhi mai e Peter Munch he tuhitala talafakaholopito Tenemaka: “I te kamataga o te taua i te 1914 e lahi te huiga ki talafakaholopito o tagata. . . . Na pa ki te lahi o nā puapuagā, matakutia, inoino, ma hēai he haogalemu.”

⁴ E hē ko nā taua oioti, kae kua fakaholo mai i te 1914, nā oge, nā fāmai, nā mafuie, te hauā, na fatoā fakalalahi i he tulaga vēnā i te lalolagi kātoa. Kae e fakanoanoa, ona kua fakalahi te agai ki mua o te fakahaienihi ma mea fakaonapōnei, e hē mafai oi togafitia e tagata nā fakafitauli faigatā. E fakamaonia talu mai te 1914, te kitea o nā fakailoaga a Iehu e uiga ki te gataaga. Nae hē kitea e tagata uma te kamataga o te pulega a Iehu i te lagi. Kua ulu atu te lalolagi ki te taimi o te gataaga!

⁵ Ko nā mea iēnei e tutupu i o tatou aho, e feagai ai ki tatou ma he filifiliga e iku ki te ola pe ko te oti. He ā te filifiliga tēia? I te talanoaga a Iehu e uiga ki te ikuga o te faiga o mea a te lalolagi, ka vaelua nā tino mai nā fenua uma, e vē ko he leoleomamoe e vavae kehe nā mamoe mai nā oti. Ko tagata e vē ko ni mamoe​—e alolofa ki te amiotonu ma fakalagolago ki te Mālō o te Atua​—ka haoloto i te ikuga o te faiga o mea a te lalolagi kino ma fiafia ki nā fakamanuiaga a te Mālō o te Atua e tumau.​—Mataio 25:31, 33.

6, 7. (a) Ko ni ā nā fakamanuiaga ka kaumai e te Mālō o te Atua? (e) Ko he ā te valakaulia kua tuku atu ki a te koe?

⁶ Ko ni ā nā fakamanuiaga ka kaumai e te Mālō o te Atua mo tagata uma? Ko nā mea ka fai e te Mālō o te Atua e aofia ai:

1.   Te fakaumatiaga fakavavau o nā taua, nā holitulagafono, ma te hāuā.​—Halamo 46:8, 9; Ihaia 2:4.

2.   Ka tutuha nā tino uma e hē toe i ei te fakapito; te fakailogalanu, te fakailoga o nā tino matitiva ma iētahi itūkāiga tino.​—Galuega 10:35; Fakaaliga 7:9, 10.

3.   Ka lahi nā meakai, nā fale, ma maua nā galuega e fiafia ki ei nā tino tokatahi.​—Halamo 72:16; Ihaia 25:6; 65:21, 22.

4.   Ka hē toe i ei he tauale, he hē lelei katoatoa o te malohi, he olaga matua, ma he oti.​—Ihaia 25:8; 35:5, 6; Fakaaliga 21:4.

5.   Ka toe tutū nā tino kua feoti.​—Ioane 5:28, 29; Fakaaliga 20:12.

6.   Ka kavea te lalolagi kātoa ma he palataiho.​—Luka 23:43; Halamo 98:7-9.

⁷ Na lea mai ia Iehu: “Ma ko te uiga o te ola fakavavau, ko te iloa o koe, te Atua moni e tokatahi, ma te iloa o Iehu Keliho, tē na uga mai e koe.” (Ioane 17:3) E valakaulia koe ke fakaavanoa he taimi ke hukehuke ai te Tuhi Paia ma iloa nā mea e manakomia ke maua ai te fakamoemoe ma ola fiafia ai e fakavavau i te lalolagi Palataiho i lalo o te Mālō o te Atua. E fakamalohia koe ke kau fakatahi pea ma Molimau a Ieova. I te lalolagi, e i ei te fia miliona o tagata e kau fakatahi i te tāpuaki ki te Tupu e Fakavavau, ko Ieova. Tēnei te taimi ke kau fakatahi koe ma ki latou. Tēnei te taimi ke fai ai hau gaoioiga fakavave. Koe na hē fakatali. Ke kau koe ma ki latou ma talia te valakaulia ke: “Hau! Ko ai lava e fia inu, hau oi talia te vai o te ola, e hēai he totogi.”​—Fakaaliga 22:17.