LEHONA 01

E Vefea Ona Fehoahoani Atu Te Tuhi Paia Kia Te Koe?

TᾹ

E toeitiiti lava ko ki tatou uma e tofu ma na fehili e fakatatau ki te olaga, na mafatiaga, te oti ma te lumanaki. E iei foki o tatou popolega i aho takitahi, ve ko te tauhiga o te kaiga ma maua he kaiga fiafia. Kua fehoahoani te Tuhi Paia ki te tokalahi o tagata ke tali na fehili tāua o te olaga ma kua haunia ai foki ni fautuaga lelei mo na aho takitahi. E mafai nei te Tuhi Paia ke fehoahoani ki he tino e ke iloa?

1. Ni a ni fehili e mafai ke tali e te Tuhi Paia?

E tali e te Tuhi Paia na fehili tāua ienei: Na vefea ona kamata te olaga? Heā te uiga o te olaga? Aiheā te puapuaga ai na tino lelei? Heā te tupu kafai te tino e oti? Kafai ko tagata uma e fofou ki te filemu, heā la te iei ai ni taua? Heā te ka pa ki ei te lalolagi i te lumanaki? Kua fautua mai te Tuhi Paia ke hakili na tali ki na fehili ienei, ma e faitau miliona ki latou kua maua na tali fakamalie loto.

2. E vefea ona fehoahoani mai te Tuhi Paia ke ki tatou maua te fiafia i na aho takitahi?

Kua kaumai e te Tuhi Paia ni fautuaga lelei mo ki tatou. Mo he fakatakitakiga, e akoako na kaiga i te auala e maua ai te fiafia moni. Kua haunia mai ni fautuaga i te auala e feagai ai ma na popolega ma te auala e maua ai te fiafia i na galuega. Ko te hukehuke o te lomiga tenei ka ke iloa ai na akoakoga a te Tuhi Paia fakatatau ki na matakupu ienei ma ni ietahi matakupu. Atonu ko koe e kau ki te manatu tenei “O tusitusiga paia uma e aogā.”—2 Timoteo 3:16.

Ko te lomiga tenei e he huia ai te Tuhi Paia, kae e fehoahoani atu kia te koe ke hukehuke ai te Tuhi Paia. Ko te mea ia e fakamalohi atu ai ke faitau na mau e lihi i na lehona ienei ma fakatuhatuha ki na mea e ke akoakoa.

HAKILIKILI ATILI

Iloilo pe vefea ona fehoahoani te Tuhi Paia ki tagata, pe vefea foki ona ke maua te fiafia i te faitau ki ei, ma aiheā e tāua ai te iei o he fehoahoani ke malamalama ai.

3. E mafai e te Tuhi Paia oi takitaki ki tatou

Ko te Tuhi Paia e ve he hulu e huhulu malohi. E mafai te Tuhi Paia ke fehoahoani mai ki a te ki tatou ke fai ni filifiliga lelei, ma fakailoa mai na mea ka tutupu i te lumanaki.

Faitau te Salamo 119:105, ma talanoa ki na fehili ienei:

Heā te manatu o te fai Salamo fakatatau ki te Tuhi Paia?
Heā to manatu fakatatau ki te Tuhi Paia?

4. E mafai e te Tuhi Paia oi tali a tatou fehili

Na iloa e he fafine ko na tali ki na fehili nae mafaufau ia ki ei mo ni tauhaga e lahi ei loto o te Tuhi Paia. Fakaali te VITIŌ oi talanoa ai ki na fehili e mulimuli mai.

VITIŌ: Na He Mou Atu To Fakamoemoe! (1:48)

I te vitiō, ni a na fehili a te fafine nae ia fia maua ni tali ki ei?
Na vefea ona fehoahoani te hukehuke o te Tuhi Paia ki a te ia?

E fakamalohi mai ki tatou e te Tuhi Paia ke fai ni fehili. Faitau te Mataio 7:7, ma talanoa ki te fehili e hohoko mai:

Ni a ni au fehili atonu e mafai ke tali e te Tuhi Paia?

5. E mafai koe ke fiafia faitau te Tuhi Paia

E tokalahi ia tagata e fiafia faitau te Tuhi Paia ma maua mai ai na aogā. Fakaali te VITIŌ, oi talanoa ai ki na fehili ienei.

VITIŌ: Faitauga Tuhi Paia (2:05)

I te vitiō, heā na manatu o talavou e fakatatau ki te faitau?
E ui lava e he fiafia ki latou oi faitau, kae aiheā kua fiafia ai oi faitau te Tuhi Paia?

E maua e ki tatou na fakatonuga mai te Tuhi Paia e mafai ke fakamafanafana ai ki tatou ma maua ai he fakamoemoe. Faitau te Roma 15:4, oi talanoa ai te fehili tenei:

E fiafia koe ki na folafolaga a te Tuhi Paia e fakatatau ki na fakamafanafanaga ma te fakamoemoe?

6. E mafai ona fehoahoani mai ni ietahi tino ki a te ki tatou ke malamalama i te Tuhi Paia

E he gata i te faitau o te Tuhi Paia, kae e tokalahi ki latou kua iloa te aogā o te hukehuke fakatahi ma ietahi. Faitau te Galuega 8:26-31, oi talanoa ai ki te fehili tenei:

E vefea ona malamalama ki tatou i te Tuhi Paia? (Kikila ki te fuaikupu 30, 31.)

Na manakomia e te tamaloa Aitiope te fehoahoani ke malamalama ai ki na tuhituhiga paia. E tokalahi ia tagata i na aho nei kua ki latou iloa te aogā o te hukehuke fakatahi o te Tuhi Paia ma ietahi

LEAMAI IETAHI TINO: “E māumau te taimi e hukehuke ai te Tuhi Paia.”

Ka heā to manatu ki ei? Aiheā?

OTOOTOGA

E maua i te Tuhi Paia na fautuaga mo te olaga i na aho takitahi, e tali ai na fehili tāua ma kaumai ai na fakamafanafanaga ma te fakamoemoe mo tagata.