LEHONA 22

E Vefea Ona Ke Fakailoa Atu te Tala Lelei?

TᾹ

Ko te ke akoakoa o na kupu moni a te Tuhi Paia, e ono mafaufau ai koe, ‘E tatau ke iloa e tagata uma na mea ienei!’ E hako te manatu tenā, e tatau ke iloa e tagata uma te kupu moni mai te Tuhi Paia! Kae, e ono ke lagona te popole oi taku atu na mea kua ke akoakoa ki ietahi tino. Tatou kikila pe vefea ona fakailoa atu ma te fiafia te tala lelei o te Tuhi Paia e aunoa ma te popole.

1. E vefea ona ke fakailoa atu ki ietahi tino na mea kua ke akoakoa?

Na leamai na hoko o Iesu: “E lē mafai ona ma lē ta’u atu mea ua ma vāai ma faalogo i ai.” (Galuega 4:20) Na ki latou fakatāua te kupu moni ma fofou ke fakailoa atu ki tagata uma. E venā o fakalagona? Kafai ko tenā, hakili la ho he avanoa e fakailoa atu ai ma te fakaaloalo ki o kaiga ma uō na mea kua ke akoakoa.—Faitau te Kolose 4:6.

Ni auala e kamata ai

Kafai e talanoa koe ki to kaiga, kamata he talanoaga i te lea ve atu: “E i ei te mea manaia na ko akoakoa i te vaiaho tenei.”
Fakailoa atu he mau fakalakeikau ki hau uō e tauale pe popole foki.
Kafai e fehili atu he tino i te galuega pe a mai te vaiaho, taku atu ki ei he mea na ke akoakoa mai tau hukehukega fakate-Tuhi Paia pe ko he hauniga.
Fakailoa ki au uō te tatou tuātuhi initaneti ko te jw.org.
Valakaulia ietahi ke auai ki tau hukehukega fakate-Tuhi Paia, pe fakailoa atu te auala e talohaga ai mo he hukehukega fakate-Tuhi Paia i te jw.org.

2. Aiheā e kavea ai te talaki fakatahi ma te fakapotopotoga, ma hini aogā?

Na fai e na hoko o Iesu he mea e hili atu nailō te talaki atu ki na tino e mahani ki latou ki ei. Na “aauina atu [e Iesu] i latou ta’ito’alua . . . i aai uma” ke talaki atu. (Luka 10:1) Ko te maopoopo o te auala na fai ai te talakiga, na maua ai e te tokalahi o tagata te avanoa ke fakalogo ai ki te tala lelei. Ko te talaki fakatahi foki o na hoko na maua ai e ki latou te fiafia. (Luka 10:17) Kae e mafai nei ke fai ma au hini te talaki fakatahi ma te fakapotopotoga?

HAKILIKILI ATILI

Iloilo pe vefea ona fakateka te popole ma tofo ki te fiafia e maua mai i te fakailoa atu o te tala lelei.

3. E fehoahoani ia Ieova ki a te koe

E fofou ietahi ke auai atu ki te talakiga, kae e popole foki ki te auala e tali mai ai na tino.

E popole nei koe oi fakailoa atu ki na tino na mea kua ke akoakogia? Aiheā?

Fakaali te VITIŌ, ma talanoa te fehili tenei.

VITIŌ: Ko Au na Tatalo ki a Ieova mo te Lototele (4:05)

Na vefea ona he toe matataku na talavou Molimau a Ieova ienei?

Faitau te Isaia 41:10, ma talanoa te fehili tenei:

Kafai e ke lagona te mataku oi talaki atu, e vefea ona fehoahoani te tatalo ki a te koe?

E ke iloa?

E tokalahi na Molimau a Ieova na manatu ve i te taimi muamua, e faigatā ona ki latou fakailoa atu te tala lelei ki ietahi tino. Mo he fakatakitakiga, na lagona e Sergey tona he aogā ma na faigatā ai oi talanoa atu ki na tino. Kae, i te hukehukega o te Tuhi Paia, kua leamai ve: “E ui lava nae ko lagona te mataku, na mafai au ke kamata talanoa atu ki ietahi e fakatatau ki na mea kua ko akoakoa. Kae kua fakatekia au i te ko lagona o te totoka kafai au e talanoa atu ki ietahi e fakatatau ki te Tuhi Paia. Na fakamalohia ai foki toku fakatuatua ki na talitonuga fou ienei.”

4. Ke fakaaloalo

Kafai e fakailoa atu te tala lelei, filifili lelei na kupu ma te auala e talanoa atu ai. Faitau te 2 Timoteo 2:24 ma te 1 Peteru 3:15, ma talanoa na fehili ienei:

E vefea tau fakatatau ki na fuaikupu ienei kafai koe e talanoa atu ki ni tino e fakatatau ki te Tuhi Paia?
Kafai e he fiafia ni tino o to kāiga pe ko ni uō foki e a koe, ko heā te tatau ona ke faia? Ko heā te he tatau ke ke faia?
Aiheā e tāua ai te fai o ni fehili fakaoho manatu nailō te fakamalohia o ki latou ke talitonu ki na mea e lea atu ai?

5. Ko te fakailoa atu o te tala lelei e maua ai te fiafia

Na foki atu e Ieova ki a Iesu te gaulega ko te fakailoa atu o te tala lelei. E vefea na fakalagona o Iesu ki te galuega tenei? Faitau te Ioane 4:34, ma talanoa na fehili ienei:

Ko te kai ki na meakai lelei e fakatumau ai te ola ma maua ai te fiafia. Aiheā na fakatuha ai e Iesu te faia o te finagalo o te Atua, te e aofia ai ma te fakailoa atu o te tala lelei, ki te taumafa o he meakai?
Ko ni a na fakamanuiaga, e maua ai te fiafia, kafai e fakailoa atu te tala lelei?

Fehoahoani

I te hauniga kamata o te vaiaho, mātau ni auala e kamata ai ni talanoaga.
Talanoa ki to faiaoga ki te auala e kavea ai koe ma tagata aoga i te hauniga kamata o te vaiaho. Ko na fakaeaga e foki atu ki na tagata aoga, e koleni ai ki latou i te auala e taku atu ai ki ietahi na mea kua ki latou akoakogia.
Fakaaogā te vaega “Leamai Ietahi Tino” pe ko te vaega “Kafai e Fehili he Tino” i loto o te tuhi tenei e fakatakitaki atu ai he auala e tali atu ai koe ki na fehili ma na tetekega mahani.

KAFAI E FEHILI HE TINO: “E a mai?”