LEHONA 12
E mafai vēhea oi fakatafapili koe ki te Atua?
1. Pe fakalogo te Atua ki nā tatalo uma?
E valakaulia e te Atua ia itukaiga uma o tagata ke fakatafapili atu ki a te ia i te tatalo. (Halamo 65:2) Kae, e hē fakalogo pe talia e ia, nā tatalo uma. Mo he fakatakitakiga, e mafai ke taofia nā tatalo a he tāne e faikino ki tana āvaga. (1 Petelu 3:7) I te taimi o Ihalaelu na fai pea nā mea kino, na hē fia fakalogo te Atua ki a latou tatalo. E manino, ko te tatalo ko he avanoa fakapitoa. E ui, e talia e te Atua nā tatalo e tuha lava pe na fai ni agahala mamafa kae kua halamō.—Faitau te Ihaia 1:15; 55:7.
Matamata ki te vitiō E Fakalogo te Atua ki na Tatalo Uma?
2. Pe tatalo vēhea ki tatou?
Ko te tatalo ko he vaega o te tatou tāpuakiga, ko teia e tatau oi tatalo ki tatou ki Tē na Fai ki tatou, ko Ieova. (Mataio 4:10; 6:9) E ui, e hē lelei katoatoa ki tatou, kae e tatau ki tatou ke tatalo i te igoa o Iehu auā na oti ia mo a tatou agahala. (Ioane 14:6) E hē finagalo ia Ieova ke taku ma toe taku tauloto pe faitau nā tatalo. E finagalo ia ke tatalo atu mai o tatou loto.—Faitau te Mataio 6:7; Filipi 4:6, 7.
E fakalogo mai Tē na Fai ki tatou ki nā tatalo e heai he leo. (1 Hamuelu 1:12, 13) E valakaulia ki tatou ke tatalo atu i ho he tulaga, e vē ko te kamataga ma te fakaikuga o he aho, te taimi e kai ai, pe feagai foki ki tatou ma ni fakafitauli.—Faitau te Halamo 55:22; Mataio 15:36.
3. Aiheā e feiloaki fakatahi ai Kelihiano?
E faigatā ke fakatafapili atu ki te Atua auā e nonofo ki tatou ma nā tagata e heai he fakatuatua ki te Atua ma fakatauemu ki tana folafolaga ki he lalolagi fīlēmū. (2 Timoteo 3:1, 4; 2 Petelu 3:3, 13) Teia lā e manakomia e ki tatou te fakatahitahi fakamalohi ma nā uho talitonu e manakomia foki e ki latou ia ki tatou.—Faitau te Epelu 10:24, 25.
Ko te fakapipiki ma nā tino e alolofa ki te Atua e fehoahoani ki a te ki tatou ke fakatafapili ki te Atua. Ko nā hauniga a Molimau a Ieova e fōki mai ni avanoa lelei ke maua ai nā aogā mai te fakatuatua o iē tahi.—Faitau te Loma 1:11, 12.
4. E mafai vēhea oi fakatafapili koe ki te Atua?
E mafai oi fakatafapili koe ki a Ieova i te mafaufau mamafa ki nā mea nae akoako e koe mai tana Kupu. Ke mafaufau ki nā akoakoga e maua mai ana gaoioiga, ana fautuaga, ma tana folafolaga. Ko te tatalo ma mafaufau mamafa e fakatupu ai te tatou lotofakafetai ki te alofa ma te atamai o te Atua.—Faitau te Iohua 1:8; Halamo 1:1-3.
E mafai oi tafapili oioti koe ki te Atua kāfai koe e talitonu ma fakatuatua ki a te ia. Kae ko te fakatuatua e vē ko he mea e ola e manakomia te fafaga pea. E tatau ke fafaga pea tō fakatuatua e ala i te toe iloilo ki nā mafuaaga o tō talitonuga.—Faitau te Mataio 4:4; Epelu 11:1, 6.
5. Ko he ā te aogā e kē maua mai te fakatafapili atu ki te Atua?
E manatu Ieova mo ki latou e alolofa ki a te ia. E mafai ke ia puipuia ki latou mai hō he mea e mafai ke fakalavelavea ai te latou fakamoemoe i te ola e fakavavau. (Halamo 91:1, 2, 7-10) E lapatakia ki tatou fakahaga ki nā auala e fakamataku ai to tatou ola mālōlō ma te fiafia. E akoako ki tatou e Ieova i te auala hili e ola ai.—Faitau te Halamo 73:27, 28; Iakopo 4:4, 8.
