E i loto o te Tuhi Paia te tala lelei gali a te Atua fiafia. (1 Timoteo 1:​11) Ko te Atua fiafia e fofou ke fiafia nā kāiga uma. Ko ia na mafua ai te fakaipoipoga. Ko nā fakaipoipoga tau tulafono e tāua ki te fiafia o te kāiga auā e foki mai he hikomaga haogalemu i te tauhi ake ai o nā fānau. Ko nā Kelihiano e tatau ke fakaaloalo ki nā tulafono a te mālō e fakatatau ki te lehitala o nā fakaipoipoga.​—Faitau te Luka 2:​1, 4, 5.

Ko te ā te hilafaga a te Atua ki te fakaipoipoga? E fofou ia ke kavea nā fakaipoipoga ma ni hokofakatahiga e tumau i te vā o te tamāloa ma te fafine. E finagalo Ieova ke fakamāoni nā tāne ma nā āvaga te tahi ki te tahi. (Epelu 13:4) E inoino ia ki nā āvaga kua tatala. (Malaki 2:​16) Kae e fakataga e ia nā Kelihiano ke tatala a latou fakaipoipoga kāfai e mulilua te tahi.​—Faitau te Mataio 19:​3-6, 9.

Na fai e Ieova nā tāne ma nā āvaga ke fehoahoani te tahi ki te tahi i nā tiute taukave o te fakaipoipoga. (Kenehe 2:​18) I te kavea ai ma ulu o te kāiga, ko te tāne e tatau ke ia takitakia ma tauhi i nā meafaitino o te kāiga ma akoako ki latou e fakatatau ki te Atua. E tatau ia ke fakataulaga tona alofa mo tana āvaga. E tatau te tāne ma te āvaga oi alofa ma fakaaloalo te tahi ki te tahi. Taluai ko nā tāne ma nā āvaga uma e hē lelei katoatoa, ko te akoako ke fakamāgalo ko te kī tēnā o he fakaipoipoga fiafia.​—Faitau te Efeho 4:​31, 32; 5:​22-​25, 33; 1 Petelu 3:7.

Kāfai e tupu ni fakafitauli i te koulua fakaipoipoga, ko koulua uma e tatau ke galulue ke fakaali te alofa o te tahi ki te tahi.  (1 Kolinito 13:​4, 5) E hē fautua mai te Kupu a te Atua ko te nofo kehekehe ko te auala tēnā e fakalelei ai nā fakafitauli e mahani i nā fakaipoipoga.​—Faitau te 1 Kolinito 7:​10-​13.

E finagalo Ieova koutou ke fiafia. E foki atu ki a te koutou nā fautuaga lelei i te auala e fiafia ai to talavou. E finagalo ia ki a te koe ke maua e koe te aogā mai te atamai ma te poto mahani o mātua. (Kolohe 3:​20) E finagalo foki Ieova ki a te koe ke maua te fiafia ma fai mea uma mo Tē na Faia koe ma tona Ataliki.​—Faitau te Failauga 11:9–​12:1; Mataio 19:13-​15; 21:15, 16.

E tatau koulua ke galulue mamafa i te kaumai o nā meakai, fale, ma nā kofu mo te koulua fānau. (1 Timoteo 5:8) Kae ke maua te fiafia e te koulua fānau, e tatau foki koulua ke akoako ki latou ke alolofa ki te Atua ma akoako mai i a te ia. (Efeho 6:4) Ko te koulua fakatakitakiga i te fakaalia o te koulua alofa ki te Atua e mafai ke fakamalohi ai nā loto o te koulua fānau. Kāfai e fakavae i te Kupu a te Atua, ko te koulua fakatonuga e mafai ke liliu ai nā maufaufau a te koulua fānau i he auala lelei.​—Faitau te Teutelonome 6:​4-7; Fataoto 22:6.

E maua e te koulua fānau nā aogā kāfai koulua e fakamalo ma fakamalohi ki a te ki latou. E manakomia foki e ki latou ni fakahakoga ma ni akoakiga. E puipui ki latou e nā toleniga iēnei mai nā amio e kavekehe ai tō latou fiafia. (Fataoto 22:15) Kae, ko nā akoakiga e hē tatau ke mamafa pe hāuā.​—Faitau te Kolohe 3:21.

E lolomi e Molimau a Ieova ni nai tuhi nā tuhia fakapitoa lava ke fehoahoani atu ki mātua ma fānau. E fakavae i luga o te Tuhi Paia nā tuhi iēnei.​—Faitau te Halamo 19:​7, 11.