Noong Mayo 25 at 26, 2019, idinaos ang “Maging Malakas!” na pansirkitong asamblea sa Lóvua refugee camp sa wikang Lingala at Tshiluba. Ang camp ay 1,022 kilometro mula sa Luanda, kabisera ng Angola. Noong panahon ng asamblea, 177 ang mamamahayag na nakatira sa Lóvua camp kasama ang pamilya nila. Pero mga 380 ang dumalo sa programa sa wikang Lingala at 3 ang nabautismuhan, habang 630 naman ang dumalo sa wikang Tshiluba at 6 ang nabautismuhan.

Ang karamihan ng mga kapatid na lumikas sa Lóvua ay dahil sa karahasan sa Democratic Republic of the Congo. Ang mga kapatid natin sa Lóvua ay hindi makakadalo sa espirituwal na mga pagtitipon sa ibang lunsod kasi hindi sila malayang magbiyahe. Kaya isinaayos ng sangay na magkaroon ng asamblea sa camp at nagtayo rin sila ng dalawang temporary Kingdom Hall. Ang mga Kingdom Hall na ito ay ginagamit ng apat na kongregasyon—tatlo sa wikang Tshiluba at isa sa wikang Lingala.

Noong Mayo 24, 2019, nagpunta ang isang tagapangasiwa ng sirkito at isang kinatawan ng sangay sa Lóvua camp para tumulong sa pagse-set up ng mga equipment sa sound at stage. Sa kabila ng mga hamon sa mga kapatid nating refugee, naglaan pa rin sila ng mga tarpaulin, pole, lubid, pako, at iba pang kagamitan.

Pagkatapos ng programa, sinabi ni Honoré Lontongo, isang ministeryal na lingkod sa isa sa mga kongregasyong Tshiluba sa refugee camp: “Kapag nakikita naming idinaraos ang mga asamblea dito sa loob ng refugee camp sa kabila ng mahihirap na kalagayan, nararamdaman namin ang pag-ibig ni Jehova, hindi lang sa amin bilang isang grupo, kundi bilang mga indibidwal. Masayang-masaya ako!”

Patuloy nating ipapanalangin ang mga kapatid nating lumikas dahil sa karahasan sa bansa nila. Alam nating patuloy silang susuportahan ni Jehova at paglalaanan ng espirituwal na pagkain nasaan man sila.​—Roma 8:38, 39.