OKTUBRE 29, 2019
BRAZIL

May Espesyal na Exhibit ang mga Saksi ni Jehova sa Isang Book Fair sa Rio Para sa mga Pipi’t Bulag sa Brazil

I-PLAY

Kasali ang mga Saksi ni Jehova sa 19th International Book Biennial ng Rio de Janeiro, na ginanap sa Riocentro Convention and Event Center mula Agosto 30 hanggang Setyembre 8, 2019. Tampok sa pinakamalaking cultural festival na ito sa Brazil ang 520 exhibit na dinaluhan ng tinatayang 600,000 bisita. Naglagay ang mga kapatid ng booth tungkol sa website natin at sa ginagawang pagsisikap para maging available sa lahat ang mga salig-Bibliyang publikasyon. Sa 10 araw ng Book Biennial, ang 258 kapatid na nagboluntaryo sa booth ay nakapamahagi ng 3,737 publikasyon.

May exhibit ang booth na dinisenyo para sa mga pipi, bingi, o bulag. Nakapagpanood ang mga kapatid ng mga video sa Brazilian Sign Language (LIBRAS), at nandoon ang mga kapatid na marunong mag-LIBRAS para tulungan ang mga bisita. Ipinaliwanag ng isa sa mga boluntaryo: “Kapag may pumupunta sa booth, komportable silang kausapin kami at hindi sila nahihiya. Laging may nakatao doon para ipaliwanag ang jw.org at kung paano ginagawa ang Bible study.”

Isang 10-taóng-gulang na mamamahayag na bulag na sinasabi sa isang reporter kung paano nakatulong sa kaniya ang publikasyong Braille ng mga Saksi ni Jehova

Bumisita ang isang guro sa display kasama ang pitong estudyante na pipi. Humanga siya sa mga sign-language na video para sa mga kabataan na nasa jw.org. Ipinaliwanag niyang madalas na nagpapatulong sa kaniya ang mga magulang para maipakipag-usap ang personal na mga bagay sa mga anak nilang pipi. Sinabi ng guro na ipapakita niya sa susunod ang website natin sa mga magulang.

Ipinapakita ng sister ang salig-Bibliyang publikasyon sa isang bisita

Tampok din sa booth ang mga interactive display na isinalin sa mga katutubong wika na available ngayon sa jw.org, gaya ng Guarani, Ticuna, at Xavante. Sinabi ni Ricardo Carneiro, isang tagapagsalita para sa mga Saksi ni Jehova: “Tunguhin naming matulungan ang mga tagarito na mas maintindihan ang Bibliya sa sarili nilang wika.”

Tunguhin ng Rio International Book Biennial na mas mapabuti ang buhay ng mga nakatira sa Brazil sa tulong ng pagbabasa. Ang libo-libong bisita sa booth ng jw.org ay nabigyan ng pagkakataong basahin ang Bibliya at ang iba pang publikasyon sa sarili nilang wika, na matagal nang nakakatulong para mapabuti ang buhay ng mga tao.—2 Timoteo 3:16, 17.