Nakibahagi sa malaking kampanya ng pangangaral ang mahigit 1,000 Saksi ni Jehova sa Brazil mula Marso 1 hanggang Hunyo 30, 2024. Nangyari ito matapos i-release ang publikasyong Masayang Buhay Magpakailanman sa 11 wika na sinasalita sa bansa. Dahil dito, halos 300 ang humiling ng pag-aaral sa Bibliya.

Sa isang pag-uusap, tinanong ng isang babaeng nagsasalita ng Xavante sa Campinápolis ang mga Saksi: “Kayo ba y’ong gumagawa ng mga video sa wika ko? Matagal ko na kayong hinahanap. Sa wakas, nakita ko rin kayo!” Sinabi niya na dati siyang nakikipag-aral ng Bibliya sa mga Saksi ni Jehova pero huminto siya kasi hindi niya maintindihan ang wikang Portuguese. Pero nang malaman niyang mayroon na tayong mga publikasyon at video sa Xavante, hinanap niya ang mga Saksi. Nag-Bible study na ulit siya.

Sa Santa Maria de Jetibá, isang sister ang tatlong beses na nakipag-usap sa isang interesadong babae na nagsasalita ng Pomeranian. Noong ikatlong beses na dinalaw siya ng sister, sinabi ng babae na nananalangin siya sa Diyos noong araw bago sila unang nag-usap. Hiniling niya na sana malaman niya kung paano sasambahin ang Diyos sa tamang paraan. Nagpa-Bible study siya.

Sa isang maliit na nayon sa timog ng Brazil, may nakausap ang ating mga kapatid na isang babaeng nagsasalita ng Kaingang na ngayon lang nakakausap ng mga Saksi ni Jehova. Binasa ng mga kapatid sa babae ang Awit 83:18 at sinabi na Jehova ang pangalan ng Diyos. Naantig ang babae, sinabi niya na wala pang nagturo sa kaniya na may personal na pangalan pala ang Diyos. Tinanggap niya agad ang alok na mag-Bible study.

Nakikisaya tayo sa mga kapatid sa Brazil kasi napakarami ang natuto tungkol sa “walang-hanggang mabuting balita” na nasa Salita ng Diyos. Umaasa tayong makakasama rin natin sila sa pagluwalhati kay Jehova.—Apocalipsis 14:6, 7.