Noong Mayo 20, 2023, ibinigay ni Brother Mark Sanderson, isang miyembro ng Lupong Tagapamahala, ang pahayag sa pag-aalay ng bagong Kingdom Hall sa Iqaluit, Nunavut, Canada. May 44 na dumalo nang in-person sa programa, at 388 naman sa pamamagitan ng videoconference. Isa ang Nunavut sa mga lupain na napakakaunti ng nakatira. Wala pang 40,000 ang residente sa lugar na ito, na may lawak na halos 1,837,000 kilometro kuwadrado. Gaya ng nabanggit sa naunang ulat sa jw.org, maraming hamon ang napaharap sa mga kapatid habang itinatayo ang Kingdom Hall na ito. Tiniis ng matatapang na kapatid na nangaral sa liblib na lugar na ito ang matinding lamig at hirap sa paglalakbay. Itinampok sa programa ng pag-aalay ang napakagandang halimbawa nila.

Noong 1976, lumipat si Sister Margaret Gallie sa isang komunidad na mga 2,052 kilometro ang layo mula sa Montreal, Quebec. Kilala ngayon ang lugar na iyon na Iqaluit, Nunavut. Siya ang unang Saksi na nangaral sa napakalawak at tigang na lupaing ito. Nang taon ding iyon, dumalaw kay Sister Gallie si Brother Hans Pintar, na tagapangasiwa ng sirkito, at ang asawa niyang si Minerva, para patibayin siya at makibahagi sa ministeryo sa loob ng isang linggo.

Noong 1983 naman, nagpunta ang isang maliit na grupo ng masisigasig na Saksi sa Iqaluit. Napangaralan nila ang isang pamilya, at ang pamilyang ito ang pinakaunang nabautismuhan sa lugar na iyon. Sa sumunod na 20 taon, maraming beses na pinuntahan ng masisigasig na tagapaghayag ng Kaharian ang liblib na lugar na ito para ibahagi ang mabuting balita. Noong 2008, isang group ang naitatag sa Iqaluit. Noong 2010, ang maliit na group na ito ay naging isang kongregasyon, na nagtitipon sa isang gymnasium ng paaralan. Tuwang-tuwa ang mga kapatid nang lumipat sila sa kanilang bagong Kingdom Hall noong Oktubre 2022.

Bukod sa Iqaluit, nangaral din ang mga special pioneer kasama ng iba pa sa iba’t ibang liblib na lugar sa buong Nunavut. Kabilang dito si Brother Joel Therrien at ang asawa niyang si Cheryl. Lumipat sila sa Baker Lake, na 1,329 na kilometro sa kanluran ng Iqaluit. Sinabi ni Brother Therrien: “Kahit napakalamig doon, liblib, at magastos din, sulit ang lahat ng sakripisyo. Kitang-kita ang pagpapala ni Jehova sa pagtugon ng mga tao sa Baker Lake. Ipinagpapasalamat namin ang pribilehiyong maibahagi ang mensahe ng Bibliya sa mga tagaroon.”

Tinanggap ni Joseph Utatnaq, na nakatira sa Baker Lake, ang mabuting balita tungkol sa Kaharian. Nagpa-Bible study siya kay Brother Therrien at nabautismuhan noong 2021. Si Brother Utatnaq lang ang Saksi sa Baker Lake ngayon. Nang malaman niya ang tungkol sa programa ng pag-aalay ng Kingdom Hall sa Iqaluit noong Mayo 2023, ginawa niya ang lahat para makadalo doon. Iyon din ang unang pagkakataon pagkatapos ng bautismo niya na makita ang mga kapatid sa Kingdom Hall. Sinabi niya: “Hangang-hanga ako nang makita ko ang bagong Kingdom Hall. Hindi tagaroon ang marami sa mga tumulong sa pagtatayo ng Kingdom Hall, at hindi sila sanay sa klima at kalagayan ng buhay doon. Talagang pag-ibig kay Jehova at sa kapuwa ang nagpakilos sa kanila.”

Sa ngayon, 178 kapatid ang naglilingkod sa apat na kongregasyon sa mga teritoryong iyon sa hilaga, isang kongregasyon sa Nunavut, dalawa sa Northwest Territories, at isa sa Yukon. Ang mga teritoryong ito ay halos 40 porsiyento ng lupain ng Canada. Mahirap puntahan ang mga nakatira doon dahil bulubundukin ang dulong hilaga ng Canada at napakalamig, kaya hanga tayo sa pagsisikap ng ating mga kapatid na ipangaral ang mabuting balita sa liblib na mga lugar na ito.​—Gawa 1:8.